ލަންޑަން (މެއި 2) - އިނގިރޭސި ޕްރިިމިއާ ލީގުގައި މިރޭ ފުލަމް އަތުން 3-0 އިން މޮޅުވެ، އާސެނަލުން ލީގުގެ އެއް ވަނައިގައި ހަ ޕޮއިންޓުގެ ލީޑަކާ އެކު، ހާލަތުގެ ފައިދާނަގައި ހަމަޖެހިލައިފި އެވެ.
އާސެނަލުން ވަނީ ދެ ވަނައިގައި އޮތް މެންޗެސްޓާ ސިޓީ އަށް ވުރެން ދެ މެޗު އިތުރަށް ކުޅެފަ އެވެ. އާސެނަލް، އެއް ވަނައިގައި އޮތީ 35 މެޗުން 76 ޕޮއިންޓާ އެކު އެވެ. ދެ ވަނައިގައި އޮތް ސިޓީ އަށް 33 މެޗުން ލިބުނީ 70 ޕޮއިންޓެވެ.
އެމިރޭޓްސް ސްޓޭޑިއަމްގައި މިރޭ އާސެނަލުން ކުޅުނު މެޗުގައި އެ ޓީމުން ޖެހި ތިން ގޯލު ވެސް ކާމިޔާބުކުރީ ފުރަތަމަ ހާފުގަ އެވެ. އެ ގޮތުން، އެ ޓީމުން ނުވަ ވަނަ މިނިޓްގައި ލީޑުނެގީ ސްވިޑެންގެ ފޯވާޑް، ވިކްޓަ ޔޯކެރޭޝް ޖެހި ގޯލުންނެވެ. މިއީ، އާސެނަލްގެ ކެޕްޓަން، ބޭންޑް އަޅައިގެން މި މެޗުގައި ކުޅުނު ބުކާޔޯ ސަކާ ނަގައިިދިން ހުރަހަކަށް އަރައި ޔޯކެރޭޝް ޖެހި ލަނޑެކެވެ.
އާސެނަލުން ވަރުގަދަކޮށް ފެށި މި މެޗުގައި، އެ ޓީމުގެ ލެއަންޑްރޯ ޓްރޮސާޑް ނަގައިދިން ހުރަހަކުން ރިކާޑޯ ކަލަފިއޯރީ ވަނީ ބޮލުން ގޯލެއް ޖަހައިދީފަ އެވެ. އެކަމަކު، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލިއިރު، ކަލަފިއޯރީ ހުރީ އޮފްސައިޑްގައި ކަމަށްވުމުން އެ ގޯލު ބަަލައެއްނުގަތެވެ.
މެޗުގައި އާސެނަލުން ލީޑުފުޅާކުރީ، 40 ވަަނަ މިނިޓްގަ އެވެ. މިއީ، ޔޯކެރޭޝް ދިން ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު ގޯލުގެ ކައިރީ ކަނަށް އަމާޒުކޮށްލައިގެން ސަކާ ޖެހި ގޯލެކެވެ. އަދި. ފުރަތަަމަ ހާފުގެ އިތުރު ވަގުތުގެ ތެރޭގައި، ޓްރޮސާޑް ނެގި ބޯޅައެއް ބޮލުން ގޯލަށް ފޮނުވާލައިގެން، ޔޯކެރޭޝް ވަނީ އާސެނަލްގެ ތިން ވަނަ ލަނޑު ޖަހައިދީފަ އެވެ. މި ލަނޑާ އެކު، ޔޯކެރޭޝް މި ފަހަރުގެ ހުރިހާ މުބާރާތެއްގައި ޖެހި ގޯލު 20 އަށް ވުރެން އިތުރުވިއިރު، އޭނާ އަކީ، 2015 ވަނަ އަހަރު އަލެކްސިސް ސަންޗޭޒަށް ފަހު، އާސެނަލާ ގުޅުމަށް ފަހު ފުރަތަމަ ސީޒަނުގައި އެ އަދަަދަށް ގޯލު ޖެހި ފުރަތަމަ ކުޅުންތެރިޔާ އެވެ.
ދެ ވަނަ ހާފުގައި ލަނޑެއް ޖެހޭތޯ ފުލަމް އިން މަސައްކަތްތަކެއް ކުރި އެވެ. އެ ގޮތުން، ފުލަމް އިން ލަނޑެއް ޖެހޭތޯ ކުރި މަސައްކަތުގައި، އެ ޓީމުގެ އެޓޭކްތައް ހުއްޓުވުމަށް އާސެނަލްގެ ކީޕަރު ޑޭވިޑް ރާޔާ ވަނީ މޮޅު ކުޅުމެއް ދައްކައިފަ އެވެ. އާސެނަލުން މި ވަނީ އަމިއްލަ ދަނޑުގައި ފުލަމް އަތުން ބަލިނުވެ، ޖެހިޖެހިގެން 33 މެޗު ހަަމަކޮށްފަ އެވެ.
ލީގުގައި މިރޭ ވެސްޓް ހޭމް ކުޅުނު މެޗުން ބްރެންޓްފޯޑް އަތުން 3-0 އިން ބަލިވިއިރު، ނިއުކާސަލް ޔުނައިޓެޑުން ވަނީ 3-1 އިން ބްރައިޓަން ބަލިކޮށްފަ އެވެ. އަދި، ސަންޑަލެންޑުން މެޗުގެ ބޮޑުބައި ކުޅުންތެރިއަކު މަދުކޮށް ކުޅުނުއިރު، ވުލްވްސްއާ ވަނީ 1-1 އިން އެއްވަރުވެފަ އެވެ.
