ތެހެރާން، އިރާން (މެއި 7) - ފީފާ ވޯލްޑް ކަޕްގައި އިރާންގެ ހޯސްޓަކީ އެމެރިކާއެއް ނޫން ކަމަށާއި އެއީ ފީފާ ކަމަށް އިރާންގެ ފުޓްބޯލް އެސޯސިއޭޝަންގެ ރައީސް، މެހެދީ ތާޖު ވިދާޅުވެއްޖެ އެވެ.
އޭނާ މިހެން ވިދާޅުވެފައިވަނީ، ފީފާގެ ރައީސް ޖިއާނީ އިންފަންޓީނޯ، އިރާނުން މި ފަހަރު، ކެނަޑާ، މެކްސިކޯ އަދި އެމެރިކާގައި ބާއްވާ ވޯލްޑް ކަޕްގައި ކުޅޭނެ ކަމުގެ ޔަގީންކަން ދެއްވުމާ ބެހޭގޮތުން ވާހަކަ ދައްކަވަމުންނެވެ.
ފެބްރުއަރީ މަަހު، އެމެރިކާ އާއި އިޒްރޭލުން އިސްވެ، އިރާނާ ދެކޮޅަށް ފަށާފައިވާ ހަނގުރާމައިގެ ސަބަބުން އިރާނުގެ ސަރުކާރުން ވޯލްޑް ކަޕްގައި ނުކުޅޭނެކަމަށް ބުނެފައިވީ ނަމަވެސް، ފީފާ އިން ބުނަމުން އަންނަނީ އިރާން ވޯލްޑް ކަޕްގައިި ކުޅޭނެ ކަމަށެވެ.
މިދިޔަ ހަފްތާގެ ބުރާސްފަތި ދުވަހު އޮތް ފީފާގެ ކޮންގްރެސްގައި، އެ ފެޑެރޭޝަންގެ 211 ގައުމުގެ ތެރެއިން ބައިވެރިނުވެވުނީ އިރާންގެ އޮފިޝަލުންނަށް އެކަންޏެވެ. އިރާންގެ މީޑިއާއެއް ކަމަށްވާ ތަސްނީމް އިން ރިޕޯޓްކުރި ގޮތުގައި، އިރާންގެ ފުޓްބޯޅަ ފެޑެރޭޝަންގެ ރައީސް، މެހެދީ ތާޖު ހިމެނޭހެން އިރާންގެ އޮފިޝަލުންނަށް ކެނަޑާ އަށް އެރުމުގެ ހުއްދަ ކެނަޑާ އިމިގްރޭޝަނުން ދީފައިނުވެ އެވެ. ކެނަޑާގެ ފޮރިން އެފެއާޒް މިނިސްޓަރު، އަނިޓާ އަނަންދު ވިދާޅުވީ، އިރާންގެ އޮފިޝަލުން ކެނަޑާ އަށް އެތެރެވުމަަށް ހުއްދަ ދެވޭނެ ހާލަތެއް ނެތް ކަމަށެެވެ.
ފީފާ ކޮންގްރެސް އަށް ނާދެވުނަސް، އިރާން ވޯލްޑް ކަޕްގައި ކުޅޭނެ
ކެނަޑާގެ ވެންކޫވާގައި ކުރިއަށްދިޔަ ފީފާގެ ކޮންގްރެސް އަށް އިރާނަށް ނާދެވުނު ކަމުގައި ވިޔަސް، ޖޫން/ޖުލައި ގައި އެމެރިކާ، މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕްގައި އިރާން ކުޅޭނެ ކަމަށް ފީފާގެ ރައީސް ޖިއާނީ އިންފަންޓީނޯ ވަނީ ވިދާޅުވެފައި.
ރިޕޯޓްތައް ބުނާގޮތުން، އިރާންގެ ފުޓްބޯޅަ ރައީސް ތާޖު އަކީ، އެ ގައުމުގެ އިސްލާމިކް ރިވުލޫޝަނަރީ ގާޑް (އައިއާރްޖީސީ)އާ ގުޅުން އޮންނަ ފަރާތެއް ކަމަށް ބުނެ، ކެނަޑާ އަށް އައުމަށް އޭނާ އަށް ފުރުސަތު ނުދިނީ، އައިއާރްޖީސީ އަކީ ކެނަޑާ އިން ލިސްޓު ކޮށްފައިވާގޮތުގައި، ޓެރަރިސްޓް ޖަމާއަތެކެވެ. ތާޖު ވަނީ މީގެ ކުރިން، އައިއާރްޖީސީގެ އިސް އޮފިޝަލެއްގެ މަގާމު އަދާކޮށްފަ އެވެ. އެކަމަކު، އިރާންގެ އެފްއޭގެ މަގާމާ ހަވާލުވުމުގެ މާ ކުރިން، ތާޖު ވަނީ އައިއާރްޖީސީގެ މަގާމުން ދުރުވެފަ އެވެ.
އިރާނުގެ މީޑިއާ އަކަށް ދިން އިންޓަވިއުއެއްގައި، ތާޖު ވަނީ އޭނާ މިހާރު ހުރި މަގާމުގެ ޒިންމާ އަދާކުރުމަށް ހުރަސް އެޅޭ ގޮތަށް އައިއާރްޖީސީގެ ތުހުމަތެއް ކުރުމަކީ ރަނގަޅު ގޮތެއް ނޫން ކަމަށް ވިދާޅުވެފަ އެވެ. އިރާނުން މި ފަހަރުގެ ވޯލްޑް ކަޕްގައި ކުޅެން ދާނީ ސަލާމަތާއި ރައްކާތެރިކަން ފީފާ މެދުވެރިވެގެން ޔަގީންކަން ލިބޭ ގޮތަށް ކަަމަށް ތާޖު ވިދާޅުވެފައިވެ އެވެ.
"ފުރަތަމަ ކަމަކަށް ކެނަޑާގައި މި ހިނގި ކަހަލަ ކަމެއް ވެގެންނުވާނެ، އަހަރެމެން ވޯލްޑް ކަޕަކަށް މި ދާން ޖެހެނީ ކޮލިފައިވެފައި އޮތީމަ. އަހަރެމެންގެ ހޯސްޓަކަށްވާން ޖެހޭނީ ފީފާ. ޓްރަމްޕެއް ނޫން، އެމެރިކާއެއް ވެސް ނޫން. އަހަރެމެން ހޯސްޓްކުރަން ފީފާ އިން އެއްބަސްވަންޏާ، އަހަރެމެންގެ މިލިޓަރީ އާއި ރައްޔިތުންނަށް އިހުތިރާމް ކުޑަކުރަން ފުރުސަތު އޮވެގެން ނުވާނެ،" ތާޖު ވިދާޅުވި އެވެ.
ދުނިޔޭގެ އެންމެ މަގުބޫލު ކުޅިވަރު މުބާރާތް ފީފާ ވޯލްޑް ކަޕުގައި އިރާން އޮތީ ގްރޫޕް ޖީ ގަ އެވެ. އިރާނުގެ ހުރިހާ މެޗުތަކެއް ވެސް ކުޅެން ހަމަޖެހިފައި އޮތީ އެމެރިކާގަ އެވެ. އިރާނާއެކު އެ ގްރޫޕުގައި ދެން އޮތީ ބެލްޖިއަމް، އިޖިޕްޓް އަދި ނިއުޒީލެންޑެވެ. އިރާން ކުޅޭ ފުރަތަަމަ ދެ މެޗު އޮތީ ލޮސް އެންޖެލްސްގައި، ނިއު ޒީލެންޑާއި ބެލްޖިއަމާ ދެކޮޅަށް ޖޫން 15 އާއި 21 ގަ އެވެ. އަދި، މިސްރާ ދެކޮޅަށް ކުޅެން އޮތް މެޗު، ޖޫން 26 ގައި ކުޅޭނީ ސިއޭޓަލްގަ އެވެ.
އިރާނުން ވަނީ ވޯލްޑް ކަޕްގައި ކުޅެން ތައްޔާރީތައް ފަށައިފަ އެވެ. ރިޕޯޓްތައް ބުނާގޮތުން، މި މަހުގެ 20 ވަނަ ދުވަހު ސްވިޒަލެންޑުގެ ޒިއުރިކްގައި އިރާންގެ ފުޓްބޯޅަ އޮފިޝަލުންނާއި ފީފާ އިން ބައްދަލުވުމެއް ބާއްވަން ވަނީ ނިންމައިފަ އެވެ. މިއީ، އިރާނުން މި ފަހަރުގެ ވޯލްޑް ކަޕްގައި ކުޅޭއިރު، ސެކިއުރިޓީގެ ކަންކަން ހަމަޖެހިފައި އޮންނަ ގޮތް ދެނެގަންނަން އިރާން އެފްއޭ އިން އެދިގެން ފީފާ އިން ބާއްވާ ބައްދަލުވުމެކެވެ.
