މިލާން (އޭޕްރީލް 23) - އެމެރިކާގެ ރައީސް ޑޮނާލްޑް ޓްރަމްޕް އެދުނު ކަމުގައި ވިޔަސް އިރާންގެ ބަދަލުގައި، މި އަހަރުގެ ފީފާ ވޯލްޑް ކަޕްގައި ކުޅެން އިޓަލީން ބޭނުންނުވާ ކަމަށް އެ ގައުމުގެ ސަރުކާރުން ބުނެފި އެވެ.
އިޓަލީގެ ސަރުކާރުގެ ގިނަ ވަޒީރުން ވަނީ އެކަމާ ޝުއޫރުފާޅުކުރައްވައިފަ އެވެ.
އެމެރިކާގެ ރައީސް ޓްރަމްޕްގެ އެންވޯއި ޕައޮލޯ ޒަމްޕޯލީ ވަނީ ފީފާ އަށް ޕްރޮޕޯސަލެއް ހުށަހަޅައިފަ އެވެ.
އެ ޕްރޮޕޯސަލަކީ، އިޒްރޭލާއި އެމެރިކާ އިން އިސްވެ، އިރާނާ ދެކޮޅަށް ފަށާފައިވާ ހަނގުރާމައިގެ ސަބަބުން، އިރާނުން އަންނަ ޖޫން/ޖުލައި މަހު، އެމެރިކާ އާއި މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕްގައި ކުޅެން ނުދެވޭނެކަން އަންގާފައިވާއިރު، އެ ޓީމުގެ ބަދަލުގައި، މި ފަހަރުގެ ވޯލްްޑް ކަޕަށް ކޮލިފައިނުވެ، ޖެހިޖެހިގެން ތިން ވަނަ ވޯލްޑް ކަޕުން ފުރުސަތު ގެއްލުނު އިޓަލީ އަށް އެ ޖާގަ ދިނުމަށެވެ.
އެ ޕްރޮޕޯސަލާ ބެހޭގޮތުން، އިޓަލީގެ ސްޕޯޓްސް މިނިސްޓަރު އަންޑްރެއާ އަބޯޑީ އާއި އިކޮނޮމިކް މިނިސްޓަރު ޖިއަންކާލޯ ޖިއޯޖެއްޓީ އަދި އިޓަލީގެ އޮލިމްޕިކް ކޮމިޓީގެ ރައީސް ލޫޝިއާނޯ ބޮންފިގްލިއޯލީ ވާހަކަ ދެއްކެވިއިރު، ވިދާޅުވީ، އިރާނުގެ ބަދަލުގައި އިޓަލީން ވޯލްޑް ކަޕްގައި ކުޅުމަކީ އެއްގޮތަކަށް ވެސް ކޮށްގެން ވާނެ ކަމެއް ނޫން ކަމަށެވެ.
"އެއީ ކުރެވޭނެ ކަމެއް ވެސް ނޫން، ކޮށްގެން ވާނެ ވެސް ކަމެއް ނޫން. އަހަރެެމެން ގަބޫލުކުރަނީ ވޯލްޑް ކަޕްގައި ކުޅެން ޖެހޭނީ ދަނޑުމަތީގައި ކޮލިފައިން ކުޅެގެން، އެ ހައްގުވެރިކަން ހޯދައިގެންކަން،" ސްޕޯޓްސް މިނިސްޓަރު އަބޯޑީ ވިދާޅުވި އެވެ.
އިޓަލީގެ ކުރީގެ ކުޅުންތެރިން ވެސް ވަނީ ފީފާ އިން އެ ގޮތަށް ދޭ ފުރުސަތެއްގެ ބޭނުން ހިފައިގެން ވޯލްޑް ކަޕް ކުޅުމަކީ އެންމެ ރަނގަޅު ގޮތެއް ނޫން ކަމަށް ބުނެފަ އެވެ.
ޕްލޭން ބީ އެއް ނެތް، އިރާން ވޯލްޑް ކަޕް ކުޅޭނެ: އިންފަންޓީނޯ
އެމެރިކާ، މެކްސިކޯ އަދި ކެނަޑާގައި އަންނަ ޖޫން/ޖުލައި ގައި ކުރިއަށްގެންދާ ގޮތަށް ތާވަލުކޮށްފައިވާ ފީފާ ވޯލްޑް ކަޕްގައި އިރާން ކުޅޭނެ ކަމަށާއި އެކަމާ ގުޅޭގޮތުން، ފީފާ އިން ޕްލޭން ބީއެއް ނުގެންގުޅޭ ކަމަށް ފީފާގެ ރައީސް ޖިއާނީ އިންފަންޓީނޯ ވަނީ ވިދާޅުވެފައި.
ދާދި ފަހުން، ފީފާގެ ރައީސް ޖިއާނީ އިންފަންޓީނޯ ވަނީ، ޖޫން 11 އިން ޖުލައި 19 އަށް ކުރިއަށްދާ ފީފާ ވޯލްޑް ކަޕްގައި ކުޅެން އިރާނުން ޖެހޭނީ އެމެރިކާ އަށް އަންނަން ކަމަށް ވިދާޅުވެފަ އެވެ. އަދި، އިރާން ފުޓްބޯޅަ ޓީމަށް ބޭނުންވާ ރައްކާތެރިކަން ކަށަވަރުކޮށްދޭން އެމެރިކާ އިން ފަސްނުޖެހޭނެ ކަމަށް ވެސް އިންފަންޓީނޯ ވަނީ ވިދާޅުވެފަ އެވެ.
އިންފަންޓީނޯ ވަނީ، އިރާން ނުލައި ވޯލްޑް ކަޕް ކުޅެން ފީފާ އިން އިތުރު ޕްލޭނެއް ނުގެންގުޅޭ ކަމަށް ވެސް ވިދާޅުވެފަ އެވެ.
އެންމެ ފަހުން ބޭއްވި ތިން ވޯލްޑް ކަަޕަށް ވެސް އިޓަލީ ކޮލިފައިނުވީ ޕްލޭއޮފުން ކުރިއަށް ނުދެވިގެންނެވެ. މި ފަހަރުގެ ކުރިން، ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ކޮލިފައިން ޕްލޭއޮފުން އިޓަލީ ކެޓީ ސްވިޑެން އަތުން 1-0 އިން ބަލިވެގެންނެވެ. އަދި، ގަތަރުގައި، 2022 ގައި ބޭއްވި ވޯލްޑް ކަޕުން ވެސް އިޓަލީ އަށް ފުރުސަތު ގެއްލުނީ ކޮލިފައިން ޕްލޭއޮފްގައި ބަލިވުމުންނެވެ. ނޯތު މެސެޑޯނިއާ އިން، 1-0 އިން އިޓަލީ ބަލިކުރި ގޯލު ޖެހީ އިތުރު ވަގުތުގައި އަލެކްސަންޑަ ޓްރަޖޯވްސްކީ އެވެ. ކުރިން ފަހަރުތަކާ ހިލާފަށް އިޓަލީން މި ފަހަރުގެ ޕްލޭއޮފް ފުރަތަމަ މެޗުން ވަނީ މޮޅުވެފަ އެވެ. އެކަމަކު، ޕްލޭއޮފް ފައިނަލުން ބޮސްނިއާ އަތްދަށުވެ ކެޓީ އެވެ.
ވޯލްޑް ކަޕަށް އިޓަލީ ކޮލިފައިނުވުމުން އިޓަލީ ފުޓްބޯޅަ ފެޑެރޭޝަންގެ ރައީސް، ގަބްރިއެލް ގްރަވީނާ ވަނީ މަގާމުން އިސްތިއުފާ ދީފަ އެވެ.
އިޓަލީގެ ކޯޗިން ސްޓާފުންގެ ގޮތުގައި މަސައްކަތްކުރި، ކުރީގެ އެއް ވަނަ ގޯލްކީޕަރު، ޖިއަންލުއިޖީ ބުފޮން ވަނީ ޓީމު ދޫކޮށްލައިފަ އެވެ. އަދި، ކޯޗު ޖެނާރޯ ގަޓޫސޯ ވެސް ވަނީ މަގާމުން އިސްތިއުފާދީފަ އެވެ.
