ލަންޑަން (އޭޕްރީލް 24) - އެމެރިކާ، މެކްސިކޯ އަދި ކެނަޑާގައި ޖޫން މަހު ފަށާ ފީފާ ވޯލްޑް ކަޕް ފުޓްބޯޅަ މުބާރާތުގައި ކުޅުމުގެ ފުރުސަތު ޗެލްސީގެ ބްރެޒިލް ތަރި، އެސްޓެވާއޯ އަށް ގެއްލުމުގެ ބިރު ބޮޑުވެއްޖެ އެވެ.
އުމުރުން 18 އަހަރުގެ އެސްޓެވާއޯގެ ފަލަމަސްގަނޑަށް ލިބުނު އަނިޔާއާ ހެދި ޗެލްސީން އެންމެ ފަހުން ކުޅުނު މެޗުގައި ވެސް އެސްޓެވާއޯ ނުކުޅެ އެވެ. އެސްޓެވާއޯ އަށް އަނިޔާވީ، މެންޗެސްޓާ ޔުނައިޓެޑް އަތުން 1-0 އިން ޗެލްސީ ބަލިވި މެޗުގަ އެވެ. އެހެންވެ، ޗެލްސީގެ ކޯޗު ލިއަމް ރޮސެނިއާ އެ ޓީމަށް އިރުޝާދުދިން ފަހު މެޗު، ބްރައިޓަން އަތުން 3-0 އިން ބަލިވި މެޗުގައި އެސްޓެވާއޯ ނުފެނެ އެވެ.
ބްރެޒިލްގެ ކޯޗުކަމާ ކާލޯ އަންޗެލޮޓީ ހަވާލުވެ، އެ ޓީމުން ގަވާއިދުން ފުރުސަތު ދެމުން އަންނަ ކުޅުންތެރިންގެ ތެރޭގައި އެސްޓެވާއޯ ހިމެނެ އެވެ. އަދި، އެސްޓެވާއޯ އަކީ މި ފަހަރުގެ ވޯލްޑް ކަޕްގައި ބްރެޒިލްގެ މުހިންމު ކުޅުންތެރިއަކަށް ވުމުގެ އިތުރުން މުބާރާތުގައި ވެސް ފާހަގަކޮށްލެވޭ މޮޅު ކުޅުމެއް ދައްކާނެ ޒުވާން ތަރި އެއް ކަމަށް އަންޗެލޮޓީ ވަނީ ބުނެފަ އެވެ.
ވޯލްޑް ކަޕްގައި ބްރެޒިލް ހިމެނެނީ، މޮރޮކޯ، ހައިޓީ އަދި ސްކޮޓްލެންޑާ އެއް ގްރޫޕެއްގަ އެވެ. ބްރެޒިލްގެ ފުރަތަމަ މެޗު އޮތީ ޖޫން 13 ވަނަ ދުވަހު މޮރޮކޯއާ ދެކޮޅަށެވެ. ރިޕޯޓްތައް ބުނާގޮތުން، އެސްޓެވާއޯ އަށް ވޯލްޑް ކަޕަށް ފިޓްވުމުގެ ފުރުސަތު މި ވަގުތަށް ބަލާއިރު އެންމެ ބޮޑުކޮށް ނެތް ކަމުގައި ވިޔަސް، ކުރިއަށް އޮތް ދެ ހަފްތާއެއްހާ ދުވަސް ތެރޭ، އޭނާގެ ރިހެބިލިޓޭޝަން ދާ ގޮތުން، ވޯލްޑް ކަޕްގައި ކުޅެވޭނެކަމާ މެދު ސީދާކޮށް ކަންކަން ސާފުވެގެންދާނެ އެވެ.
އެސްޓެވާއޯގެ އަނިޔާގެ ކަންކަަމުގައި އަމަލުކުރަމުން އަންނަނީ، ޗެލްސީ އާއި ބްރެޒިލްގެ މެޑިކަލް ޓީމު ގުޅިގެންނެވެ.
ބްރެޒިލް ގައުމީ ޓީމުން މީގެ ދެ އަހަރު ކުރިން، އެންމެ ފުރަތަމަ ޖާގަ ހޯދި އެސްޓެވާއޯ ވަނީ އެ ޓީމަށް މިހާތަނަށް ޖުމްލަ އެކު، 11 މެޗު ކުޅެދީފަ އެވެ. އެ މެޗުތަކުގައި އޭނާ ވަނީ ފަސް ލަނޑު ޖަހައިފަ އެވެ.
