ވެންކޫވާ، ކެނަޑާ (އޭޕްރީލް 28) - މެކްސިކޯ، ކެނަޑާ އަދި އެމެރިކާގައި އަންނަ ޖޫން/ޖުލައި މަހު ކުރިއަށްދާ ފީފާ ވޯލްޑް ކަޕްގެ އިނާމް ފައިސާ އިތުރު ކުރަން ފީފާ އިން މަޝްވަރާކުރަމުން އަންނަ ކަމަށް ބުނެފި އެވެ.
ފީފާ އިން ވަނީ މިދިޔަ އަހަރުގެ ޑިސެމްބަރު މަހު، މި އަހަރުގެ ވޯލްޑް ކަޕްގެ އިނާމް ފައިސާ ކުރިން ފަހަރުތަކަށް ވުރެން އިތުރުވާނެ ކަމަށް އިއުލާނުކޮށްފަ އެވެ. އެ ގޮތުން، ފީފާ އިން އިއުލާނުކުރި ގޮތުގައި، މި އަހަރުގެ ޖޫން 11 އިން ޖުލައި 19 އަށް ކުރިއަށްދާ ފީފާ ވޯލްޑް ކަޕްގެ ޕްރައިޒް ފަންޑްގެ ޖުމްލަ އަކީ، 727 މިލިއަން ޑޮލަރެވެ.
އިނާމް ފައިސާ ދޭ ގޮތުގެ ތަފްސީލް ހާމަކޮށްފައިވާ ގޮތަށް ބަލާއިރު، ބައިވެރިވާ 48 ގައުމުގެ ތެރެއިން ކޮންމެ ގައުމަކަށް، 10.5 މިލިއަން ޑޮލަރު ދޭ ގޮތަށް ވަނީ ނިންމައިފަ އެވެ. އަދި، މުބާރާތުގެ ޗެމްޕިއަންކަން ހޯދާ ގައުމަކަށް 50 މިލިއަން ޑޮލަރު ދޭން ވަނީ ހިމަނައިފަ އެވެ.
މިދިޔަ މަހު، ދި އެތުލެޓިކްގައި ރިޕޯޓްކޮށްފައިވާ ގޮތުގައި، ޔުއެފާ އިން ހުށަހަޅައިގެން ފީފާ އިން އަންނަނީ އިނާމް ފައިސާ އިތުރު ކުރުމާ މެދު ރަސްމީކޮށް ކަންކަން ނިންމުމުގެ މަސައްކަތް ކުރަމުންނެވެ.
އެ ގޮތުން، އަންނަ ބުރާސްފަތި ދުވަހު ވެންކޫވާގައި ކުރިއަށްދާ ފީފާގެ 76 ވަނަ ކޮންގްރެސްގެ ތެރެއިން ކުރިއަށްދާ ބައްދަލުވުންތަކުގައި ވޯލްޑް ކަޕްގެ އިނާމް ފައިސާގެ ކަންކަން ކަނޑައެޅިގެންދާނެ އެވެ. ރިޕޯޓްތައް ބުނާގޮތުން، ފުރުސަތު ބޮޑީ، ފީފާ އިން މިދިޔަ ޑިސެމްބަރު މަހު އިއުލާނު ކުރި ވޯލްޑް ކަޕް އިނާމް ފައިސާ ފަންޑްގައި އޮތްގޮތަށް ފާސްކުރުމަށެވެ.
ފީފާ އިން ޕްރޮޖެކްޓްކުރާ ގޮތުގައި މި ފަހަރުގެ ވޯލްޑް ކަޕްގެ ރެވެނިއުގެ ޖުމްލަ، 11 ބިލިއަން ޑޮލަރަށް އަރާނެ އެވެ. ފީފާ އިން އަންނަނީ މި ފަަހަރުގެ ވޯލްޑް ކަޕްގެ އޮޕަރޭޝަނަލް ހަރަދުތައް ކުޑަކުރަން ވެސް މަސައްކަތްތަކެއް ކުރަމުންނެވެ. އެ ގޮތުން، އޮޕަރޭޓިން ބަޖެޓްގެ ތެރެއިން 100 މިލިއަން ޑޮލަރު މަދުކުރަން ނިންމާފައިވާއިރު، ސެކިއުރިޓީ އާއި އެހެނިހެން ކަންކަމުގައި ބޭނުންކުރަމުން އަންނަ ބަޖެޓާ މެދު ވެސް ކަންކަން ކުރުމަށް އަންނަނީ މަޝްވަރާ ކުރަމުންނެވެ.
