ބެންގަލޫރު (މެއި 7) - ދުނިޔޭގެ އެންމެ ފޯރިގަދަ ފްރެންޗައިސް ކްރިކެޓް ލީގު، އިންޑިއަން ޕްރިމިއާ ލިގު (އައިޕީއެލް)ގެ ފައިނަލް މެޗު އަހުމަދުއާބާދުގެ ނަރެންދުރަ މޯދީ ސްޓޭޑިއަމްގައި ކުޅޭ ގޮތަށް ބަދަލުކޮށްފި އެވެ.
ކުރިން ފައިނަލް މެޗު ކުޅެން ހަމަޖެހިފައި އޮތީ ބެންގަލޫރުގެ ޗިންނަސްވާމީ ސްޓޭޑިއަމްގަ އެވެ.
އެކަމަކު، އައިޕީއެލްގެ އޮގަނައިޒަރުން ބުނެފައިވަނީ، ފައިނަލް މެޗު ކުޅޭ ދަނޑު ބަދަލުކުރަން ޖެހިފައިވަނީ، ކުއްލިއަކަށް އުސޫލުތަކަށް ގެނެވުނު ބަދަލުތަކެއްގެ ސަބަބުންނެވެ. މި އުސޫލުތަކަކީ، އިންޑިއާގެ ކްރިކެޓްގެ މައި ޖަމިއްޔާ، ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި) އިން ލޯކަލް (ސްޓޭޓް) އެސޯސިއޭޝަންތަކާއި ރަސްމީ އިދާރާތަކާ ގުޅިގެން ސަލާމަތާއި ރައްކާތެރިކަން ކަށަވަރުކުރާ ގައިޑްލައިނެއްގެ ތެރެއިން އައި ބަދަލެކެވެ.
ނަރެންދުރަ މޯދީ ސްޓޭޑިއަމަކީ މުޅި ދުނޔޭގެ ނިސްބަތުން ބެލިޔަސް އެންމެ ބޮޑު އެއް ކްރިކެޓް ސްޓޭޑިއަމް އެވެ. އެ ސްޓޭޑިއަމަކީ 1،32،000 މީހުންގެ ޖާގައިގެ ދަނޑެކެވެ.
އެ ގޮތުން، މީގެ ކުރިން ވެސް އައިޕީއެލްގެ ފައިނަލް ތިން ފަހަރެއްގެ މަތިން އެ ދަނޑުގައި ހޯސްޓްކޮށްފައިވެ އެވެ. އެ އަހަރުތަކަކީ، 2022 އާއި 2023 ވަނަ އަހަރުގެ ފައިނަލްގެ އިތުރުން 2025 ވަނަ އަހަރުގެ ފައިނަލް އެވެ.
މީގެ އިތުރުން، އިންޓަނޭޝަނަލް ކްރިކެޓް ކައުންސިލް (އައިސީސީ) އިން 2023 ވަނަ އަހަރު އިންޑިއާގައި ހޯސްޓްކުރި، 50 އޯވަރުގެ ވޯލްޑް ކަޕް ފައިނަލް މެޗު ވެސް ހޯސްޓްކުރީ އެ ސްޓޭޑިއަމްގަ އެވެ. މި ފަހަރުގެ އައިޕީއެލް ފައިނަލް ކުޅޭ ގޮތަށް ކަނޑައަޅާފައި އޮތީ މި މަހުގެ 31 ވަނަ ދުވަހު އެވެ. އޭގެ ކުރިން، މެއި 26 ވަނަ ދުަވަހު، އައިޕީއެލްގެ އެއް ވަނަ އާއި ދެ ވަނަ ކުޅޭ ކޮލިފަޔާ 1 އޮންނާނީ ދަރަމްޝާލާގަ އެވެ. އަދި، އައިޕީއެލްގެ ތިން ވަނަ އާއި ހަތަރު ވަނަ ބައްދަލުކުރާ އެލިމިނޭޓާ މެޗު މި މަހު 27 ގައި ނިއު ޗަންދީގަރުގައި ކުޅޭއިރު، އެ ދަނޑުގައި ކޮލިފަޔާ 2 ކުޅޭނީ މި މަހުގެ 29 ވަނަ ދުވަހު އެވެ. ކޮލިފަޔާ 2 ގައި ބައްދަލުކުރާނީ ކޮލިފަޔާ 1 އިން ބަލިވި ޓީމާއި އެލިމިނޭޓާ އިން މޮޅުވި ޓީމެވެ.
އައިޕީއެލްގެ މި ވަގުތުގެ ތާވަލަށް ބަލާއިރު، 11 މެޗުން 14 ޕޮއިންޓާ އެކު، އެއް ވަނައިގައި އޮތީ ސަންރައިޒާސް ހައިދަރުއާބާދު އެވެ. ދެ ވަނައިގައި އޮތީ 10 މެޗުން 13 ޕޮއިންޓް ހޯދައިގެން، ޕަންޖާބް ކިންގްސް އެވެ. އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު ތިން ވަނައިގައި އޮތީ ނުވަ މެޗުން 12 ޕޮއިންޓާ އެކު އެވެ. އަދި، ހަތަރެއްގައި އޮތް ރާޖަސްތާން ރޯޔަލްސް އަށް 10 މެޗުން 12 ޕޮއިންޓް ލިބިފައިވާއިރު، ފަސް ވަނައިގައި އޮތް ގުޖުރާތު ޓައިޓަންސް އަށް ވެސް 10 މެޗުން 12 ޕޮއިންޓް ލިބިފައިވެ އެވެ.
