ނިއު ދިއްލީ، އިންޑިއާ (އޭޕްރީލް 26) - ދުނިޔޭގެ އެންމެ ފޯރިގަދަ ފްރެންޗައިސް ކްރިކެޓް ލީގު، އިންޑިއަން ޕްރިމިއާ ލީގު (އައިޕީއެލް)ގައި އެންމެ ފަހުން ކުޅުނު މެޗުތަކުގައި ތާރީހީ ރެކޯޑްތަކެއް ފެނިގެންގޮސްފި އެވެ.
އެ ގޮތުން، ޕަންޖާބް ކިންގްސް އިން ދިއްލީ ކެޕިޓަލްސް ހަ ވިކެޓުން ބަލިކުރި މެޗުގައި ދެ ރެކޯޑަކާ އެކު ނިމުނުއިރު، ރާޖަސްތާން ރޯޔަލްސް އަތުން ފަސް ވިކެޓުން ސަންރައިޒާސް ހައިދަރުއާބާދު މޮޅުވި މެޗުގައި ވެސް ރެކޯޑެއް ފެނިގެންދިޔަ އެވެ.
ދިއްލީ ކެޕިޓަލްސް އިން ކުޅެން އަރައި އިއްޔެގެ މެޗުގައި 20 އޯވަރުގެ ތެރޭގައި، ދެ ކުޅުންތެރިން ނުބައިވެގެން 264 ލަނޑު ހެދިއިރު، އެ ޓީމުގެ ތަރި، ކޭއެލް ރާހުލް ވަނީ 67 ބޯޅައިން 152 ލަނޑު ހަދައިފަ އެވެ. އޭނާ އަަކީ އައިޕީއެލްގެ 19 އަހަރުވީ ތާރީހުގައި، 150 އަށް ވުރެން ގިނަ ލަނޑުހެދި އިންޑިއާގެ ފުރަަތަމަ ކުޅުންތެރިޔާ އެވެ. އަދި، މިދިޔަ 15 އަަހަރު ތެރޭ އެކަން ހާސިލްކުރި ހަމައެކަނި ކުޅުންތެރިޔާ އެވެ.
މީގެ ކުރިން، އައިޕީއެލްގައި 150 އަށް ވުރެން ގިނަ ލަނޑު ހެދީ، 2013 ވަނަ އަަހަރު ޕޫނޭ ވޯރިއާސް ދެކޮޅަށް ކުޅުނު މެޗުގައި ރޯޔަލް ޗެލެންޖާސް ބެންގަލޫރު (އާރްސީބީ)ގެ ކްރިސް ގޭލް، 66 ބޯޅައިން 175 ލަނޑެވެ. އަދި، 2008 ވަނަ އަހަރު ކަލްކަތާ ނައިޓްރައިޑާސް (ކޭކޭއާރް)ގެ ބްރެންޑަން މެކްކުލަމް ވަނީ 73 ބޯޅައިން 158 ލަނޑު ހަދައިފަ އެވެ.
ރާހުލްގެ އާދަޔާހިލާފު ކުޅުމާ އެކު ވެސް ދިއްލީ އަށް ޕަންޖާބް ބަލިނުކުރެވުނެވެ. ޖަވާބުގައި ކުޅެން އަރައި ޕަންޖާބުން ވަނީ، 18.5 އޯވަރުގެ ތެރޭގައި، ހަތަރު ކުޅުންތެރިން ނުބައިވެގެން، 265 ލަނޑު ހަދައި، ޓީ20 ކްރިކެޓް ތާރީހުގައި ޗޭސް ކޮށްގެން އެންމެ ބޮޑު ސްކޯއެއް އަނބުރާލި ޓީމުގެ ރެކޯޑް ގާއިމްކޮށްފަ އެވެ.
މި މޮޅާ އެކު، ޕަންޖާބް ވަނީ ހަތް މެޗުން 13 ޕޮއިންޓް ހަމަކޮށް، އެއް ވަނައިގައި ތިން ޕޮއިންޓުގެ ލީޑެއް ނަގައިފަ އެވެ. ދެ ވަނައިގައި އޮތް އާރްސީބީ އަށް ހަތް މެޗުން 10 ޕޮއިންޓް ލިބިފައިވާއިރު، ތިން ވަނައިގައި ސަންރައިޒާސް ހައިދަރުއާބާދު އޮތީ ރޭ ރާޖަސްތާން ރޯޔަލްސް ބަލިކޮށްފަ އެވެ. ހައިދަރުއާބާދާއި ރާޖަަަސްތާނަށް ވެސް އަށް މެޗުން ލިބިފައިވަނީ 10 ޕޮއިންޓެވެ.
ހައިދަރުއާބާދުން ރޭ ޓޮސް ދިމާވުމުން ނިންމީ ހޮވާށެެވެ. ރާޖަސްތާނުން ކުޅެން އަރައި، 15 އަހަރުގެ ވައިބަވް ސޫރްޔަވަންޝީ، 37 މެޗުން ހަަމަކުރި 103 ލަނޑާ އެކު، ރާޖަސްތާނުން ވަނީ 20 އޯވަރުގެ ތެރޭގައި ހަ ކުޅުންތެރިން ނުބައިވެގެން 228 ލަނޑު ހަދައިފަ އެވެ. ސޫރްޔަވަންޝީ އަކީ، އައިޕީއެލްގެ އެއް ސީޒަނެއްގައި، އަންކެޕް ކުޅުންތެރިއެއްގެ ގޮތުގައި ހުރެ، ދެ ސެންޗަރީ ފުރިހަަމަ ކުރި ފުރަތަމަ ކުޅުންތެރިޔާ އެވެ.
ހައިދަރުއާބާދުން މި މެޗު ކާމިޔާބުކުރީ، ޖަވާބުގައި ކުޅެން އަރައި، 18.3 އޯވަރުގެ ތެރޭގައި، ފަސް ކުޅުންތެރިން ނުބައިވެގެން 229 ލަނޑު ހަދައިގެންނެެވެ.
