ޗެއްނާއި، އިންޑިއާ (މެއި 3) - އަށް ވިކެޓުން ޗެއްނާއި ސުޕަ ކިންގްސް (ސީއެސްކޭ) އަތުން ބަލިވެ، މުމްބައި އިންޑިއަންސް (އެމްއައި)، މި ފަހަރުގެ އިންޑިއަން ޕްރިމިއާ ލީގު (އައިޕީއެލް)ގެ ޕްލޭއޮފުން ފުރުސަތެއް ނުލިބި މުބާރާތުން ކަޓައިފި އެވެ.
ފަސް ފަހަރު އައިޕީއެލްގެ ޗެމްޕިއަންކަން ހޯދި މުމްބައި އަށް ކިރިޔާ ވެސް މުބާރާތުގައި ކުރިއަށްދިއުމުގެ ފުރުސަތެއް އޮތީ ރޭގެ މެޗުން މޮޅުވެގެންނެވެ. ރޭގެ މެޗުން ނާކާމިޔާބުވެ، ޖެހިޖެހިގެން ތިން ވަނަ މެޗުން ބަލިވި މުމްބައި، އޮތީ 10 ޓީމު ވާދަކުރާ އައިޕީއެލްގެ ތާވަލުގެ ނުވަ ވަނައިގަ އެވެ. މުމްބައި އަށް ނުވަ މެޗުން ހަަތަރު ޕޮއިންޓް ލިބުނުއިރު، އެ ޓީމު މޮޅުވީ ދެ މެޗުންނެވެ. ހަތް މެޗުން ވަނީ ބަލިވެފަ އެވެ. އެންމެ ފުލުގައި އޮތް ލަކްނައު ސުޕަ ޖަޔަންޓްސް އިން ވަނީ އަށް މެޗުން ހަތަރު ޕޮއިންޓް ހޯދައިފަ އެވެ. ލަކްނައު އިން ދެން ކުޅޭ މެޗުން މޮޅުވެއްޖެނަމަ، މުމްބައި އެންމެ ފުލަށް ވެއްޓޭނެ އެވެ.
ޗިޕަކްގެ ޗިދަމްބަރަމް ސްޓޭޑިއަމްގައި ރޭ ކުޅުނު މެޗުގައި މުމްބައި އިންޑިއަންސް އަށް ޓޮސް ދިިމާވުމުން ނިންމީ ކުޅެން އެރުމަށެވެ. އެ ގޮތުން، އެ ޓީމުން 20 އޯވަރުގެ ތެރޭގައި، ހަތް ކުޅުންތެރިން ނުބައިވެގެން ހެދުނީ 159 ލަނޑެވެ. އެންމެ ގިނަ ލަނޑު ހަދައިދިނީ، 37 ބޯޅައިން 57 ލަނޑު ހެދި ނަމަން ދީރު އެވެ. މި އިނިންސްގައި، ޗެއްނާއިގެ އަންޝުލް ކަންބޯޖް ވަނީ ހަތަރު އޯވަރަށް ތިން ވިކެޓް ނަގައިފަ އެވެ. އަދި، ނޫރު އަހުމަދު ވަނީ ހަތަރު އޯވަރަށް ދެ ވިކެޓް ނަގައިފަ އެވެ.
ޖަވާބުގައި ކުޅެން އަރައި، ޗެއްނާއި އިން ވަނީ 18.1 އޯވަރުގެ ތެރޭގައި ދެ ކުޅުންތެރިން ނުބައިވެގެން 160 ލަނޑު ހަދައި މެޗުން މޮޅުވެފަ އެވެ. ޗެއްނާއިގެ ރުތުރާޖު ގައިކްވާޑް އާއި ކާތިކް ޝަރްމާ ވަނީ ރަނގަޅު ކުޅުމެއް ދައްކައިފަ އެވެ. އެ ގޮތުން، ނުބައިނުވެ، ގައިކްވާޑް، 48 ބޯޅައިން 67 ލަނޑު ހެދިއިރު، ޝަރްމާ ވަނީ ނުބައިނުވެ، 40 ބޯޅައިން 54 ލަނޑު ހަދައިފަ އެވެ.
މި މޮޅާ އެކު، ޗެއްނާއި ވަނީ ޕްލޭއޮފްގެ އުންމީދު އާ ކޮށްފަ އެވެ. ނުވަ މެޗުން އަށް ޕޮއިންޓާ އެކު، ޗެއްނާއި އޮތީ ލީގުގެ ހަ ވަނައިގަ އެވެ. ރޭގެ މެޗަކީ، މި ފަހަރުގެ މުބާރާތުގައި ޗެއްނާއި މޮޅުވި ހަތަރު ވަނަ މެެޗެވެ. ޗެއްނާއި ވަނީ ފަސް މެޗުން ބަލިވެފަ އެވެ.
މުބާރާތުގައި މިއަދު ދެ މެޗެއް އެބައޮތެވެ. މެންދުރު ފަހު ކުޅޭ މެޗުގައި ސަންރައިޒާސް ހައިދަރުއާބާދުން ކުޅޭނީ ކަލްކަތާ ނައިޓް ރައިޑާސްއާ އެެވެ. އަދި، މިރޭ ގުޖުރާތު ޓައިޓަންސް އިން ޕަންޖާބް ކިންގްސްއާ ބައްދަލުކުރާނެ އެވެ.
