ނިއު ދިއްލީ، އިންޑިއާ (އޭޕްރީލް 28) - ދުނިޔޭގެ އެންމެ ފޯރިގަދަ ފްރެންޗައިސް ކްރިކެޓް ލީގު، އިންޑިއަން ޕްރިމިއާ ލިގު (އައިޕީއެލް)ގައި 9000 ލަނޑު ހަމަކުރި ފުރަތަމަ ކުޅުންތެރިޔާގެ ޝަރަފް، ރޯޔަލް ޗެެލެންޖާސް ބެންގަލޫރު (އާރްސީބީ)ގެ ތަރި، ވިރާތު ކޯލީ އަށް ލިބިއްޖެ އެވެ.
އުމުރުން 37 އަހަރުގެ ވިރާތު ވަނީ ރޭ ބެންގަލޫރުން ނުވަ ވިކެޓުން ދިއްލީ ކެޕިޓަލްސް ބަލިކުރި މެޗުގައި ނުބައިނުވެ، 15 ބޯޅައިން 23 ލަނޑު ހަދައިފަ އެވެ. ވިރާތު، 9000 ލަނޑު ހަމަކުރީ 275 ވަނަ މެޗުގަ އެވެ. ވިރާތު ވަނީ އެ މެޗުތަކުގައި، އަށް ސެންޗަރީ (100 ލަނޑު) އާއި ހަ ހާފް ސެންޗަރީ (50 ލަނޑު) ހަދައިފަ އެވެ.
ވިރާތުއާ އެންމެ ގާތުގައި އޮތީ މުމްބައި އިންޑިއަންސް (އެމްއައި)ގެ ކުރީގެ ކެޕްޓަން، ރޯހިތު ޝަރްމާ އެވެ. ރޯހިތު ވަނީ މިހާތަނަށް ކުޅުނު މެޗުތަކުގައި ޖުމްލަ އެކު، 7183 ލަނޑު ހަދައިފަ އެވެ. ތިން ވަނައިގައި އޮތީ ކުރީގެ ތަރި، ޝިކަރް ދަވަން އެވެ. އޭނާ ވަނީ 6769 ލަނޑު ހަދައިފަ އެވެ.
އަރުން ޖެޓްލީ ސްޓޭޑިއަމްގައި ރޭ ކުޅުނު މެޗުގައި ޓޮސް ދިމާވުމުން ބެންގަލޫރުން ނިންމީ ހޮވާށެވެ. ފީލްޑިން އަށް ނުކުމެ، ބެންގަލޫރުން ވަނީ ތަފާތު ދައްކައިފަ އެވެ. ދިއްލީ ކެޕިޓަލްސްގެ ހުރިހާ ކުޅުންތެރިން، 16.3 އޯވަރުގެ ތެރޭގައި ނުބައިވީ 75 ލަނޑަށެވެ. އެ ގޮތުން، ފުރަަތަމަ ހަތަރު އޯވަރުގެ ތެރޭގައި، ހަ ކުޅުންތެރިން ވަނީ އަށް ލަނޑަށް ނުބައިވެފަ އެވެ. އެންމެ ރަނގަޅު ކުޅުމެއް ދެއްކީ، 3.3 އޯވަރުގެ ތެރޭ ހަތަރު ވިކެޓް ނެގި ޖޯޝް ހޭޒަލްވުޑް އާއި ތިން އޯވަރުގެ ތެރޭގައި ތިން ވިކެޓް ނެގި، ބުވްނޭޝްވަރު ކުމާރު (ބޫވީ) އެވެ.
ޖަވާބުގައި ކުޅެން އަރައި، ބެންގަލޫރުން ވަނީ 6.3 އޯވަރުގެ ތެރޭގައި އެއް ކުޅުންތެރިއަކު ނުބައިވިއިރު، 77 ލަނޑު ހަދައިފަ އެވެ. އެންމެ ރަނގަޅު ކުޅުމެއް ދެއްކީ ނުބައިނުވެ، 13 ބޯޅައިން 34 ލަނޑު ހެދި ދޭވްދަތު ޕަޑިއްކަލް އެވެ.
އައިޕީއެލްގެ އެއް ވަނައިގައި އޮތީ ކުޅުނު ހަތް މެޗުގެ ތެރެއިން ހަ މެޗުން މޮޅުވެ، (އެއް މެޗު ނޯ ރިޒަލްޓް) އަށް ފަހު 13 ޕޮއިންޓް ހޯދި، ޕަންޖާބް ކިންގްސް އެވެ. ދެ ވަނައިގައި އޮތް ބެންގަލޫރަށް އަށް މެޗުން 12 ޕޮއިންޓް ލިބިފައިވާއިރު، ތިން ވަނައިގައި އޮތް ސަންރައިޒާސް ހައިދަރުއާބާދު އާއި ހަތަރެއްގައި އޮތް ރާޖަސްތާން ރޯޔަލްސް އަށް ވަނީ އަށް މެޗުން 10 ޕޮއިންޓް ލިބިފަ އެވެ.
