މުމްބާއި (އޭޕްރީލް 17) - ކެޕްޓަން ޝްރޭޔަސް އަޔަރުގެ މޮޅު ކުޅުމާ އެކު، ހަތް ވިކެޓުން މުމްބައި އިންޑިއަންސް (އެމްއައި) ބަލިކޮށް، ޕަންޖާބް ކިންގްސް އިން ބަލިނުވުމުގެ ރެކޯޑް ދަމަހައްޓައި، އިންޑިއަަން ޕްރިމިއާ ލީގު (އައިޕީއެލް)ގެ ތާވަލުގެ އެއް ވަނަ އަށް ޖެހިލައިފި އެވެ.
ދިހަ ޓީމު ކުޅޭ އައިޕީއެލްގައި ބަލިނުވެ އޮތް ހަމައެކަނި ޓީމަކީ ޕަންޖާބް އެވެ.
ދުނިޔޭގެ އެންމެ އަގުބޮޑު އަދި ފޯރިގަދަ ފްރެންޗައިސް ކްރިކެޓް. ލީގު އައިޕީއެލްގެ އެއް ވަނައިގައި ޕަންޖާބް އޮތީ ފަސް މެޗު ކުޅުނުއިރު، ހަތަރު މެޗުން މޮޅުވެ، ނުވަ ޕޮއިންޓާ އެކު އެވެ. ޕަންޖާބުން ކަލްކަތާ ނައިޓް ރައިޑާސްއާ ދެކޮޅަށް ކުޅެން އޮތް މެޗު ވިއްސާރައިގެ ސަބަބުން، ނޯ ރިޒަލްޓް (ނަތީޖާއެއް ނެތް) މެޗެއް ގޮތަށް ކަނޑައަޅައި، ކޮންމެ ޓީމަކަށް ޕޮއިންޓެއް ދިނެވެ. ދެ ވަނައިގައި އޮތް އެންމެ ފަހުގެ ޗެމްޕިއަން ރޯޔަލް ޗެލެންޖާސް ބެންގަލޫރު (އާރްސީބީ) އާއި ތިން ވަނައިގައި އޮތް ރާޖަސްތާން ރޯޔަލްސް އަށް ފަސް މެޗުން އަށް ޕޮއިންޓް ލިބިފައިވާއިރު، މި ދެ ޓީމު ބަލިވީ އެއް މެޗުންނެވެ.
މުމްބައިގެ މަޝްހޫރު ވަންކެޑޭ ސްޓޭޑިއަމްގައި ކުޅުނު މެޗުގައި، ޕަންޖާބް ކިންގްސް އިން ޓޮސް ދިމާވުމުން ނިންމީ ހޮވާށެވެ. މުމްބައި އިން ކުޅެން އަރައި، 20 އޯވަރުގެ ތެރޭގައި ހަ ކުޅުންތެރިން ނުބައިވެގެން ހެދުނީ 195 ލަނޑެވެ. އެންމެ ރަނގަޅު ކުޅުމެއް ދެއްކި ދެކުނު އެފްރިކާގެ ކުއިންޓަން ޑި ކޮކް ވަނީ 60 ބޯޅައިން 112 ލަނޑު ހަދައިފަ އެވެ. މި އިނިންގްސްގައި، ޕަންޖާބްގެ ކެޕްޓަން ޝްރޭޔަސް، ބައުންޑަރީ ކައިރިން ވެއްޓިގެންފައި ހިކި ބޯޅަ އަށް ގިނަ ބަޔެއްގެ ސަމާލުކަން ހުއްޓުނެވެ.
ޖަވާބުގައި ކުޅެން އަރައި 16.3 އޯވަރުގެ ތެރޭގައި ތިން ކުޅުންތެރިން ނުބައިވެގެން ޕަންޖާބުން 198 ލަނޑު ހަދައި މެޗުން މޮޅުވި އެވެ. މި އިނިންސްގައި ޝްރޭޔަސް ވަނީ 35 ބޯޅައިން 66 ލަނޑު ހަދައިފަ އެވެ. އެ ޓީމުން އެންމެ ރަނގަޅު ކުޅުމެއް ދެއްކީ ނުބައިނުވެ، 39 ބޯޅައިން 80 ލަނޑު ހެދި ޕްރަބްސިމަރަން ސިންގް އެވެ.
ފަސް ފަހަރު ޗެމްޕިއަންކަން ހޯދާފައިވާ މުމްބައި އިން މި ފަހަރުގެ މުބާރާތުގައި ކުޅުނު ފަސް މެޗުގެ ތެރެއިން މޮޅުވީ އެއް މެޗުންނެވެ. އެ ޓީމު އޮތީ ލީގު ތާވަލުގެ ނުވަަ ވަަނައިގަ އެވެ.
