ބެންގަލޫރު، އިންޑިއާ (އޭޕްރީލް 25) - އިންޑިއަން ޕްރިމިއާ ލިގު (އައިޕީއެލް)ގެ އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) އިން ފަސް ވިކެޓުން ގުޖުރާތު ޓައިޓަންސް ބަލިކޮށް ލީގު ތާވަލުގެ ދެ ވަނަ އަށް ޖެހިލައިފި އެވެ.
ދުނިޔޭގެ އެންމެ ފޯރިގަދަ ފްރެންޗައިސް ކްރިކެޓް ލީގު، އައިޕީއެލްގެ 19 ވަނަ ސީޒަން މިހާރު ކުރިއަށްދާއިރު، އެއް ވަނައިގައި އޮތީ މެޗަކުން ބަލިނުވެ، ހަ މެޗުން 11 ޕޮއިންޓް ހޯދާފައިވާ ޕަންޖާބް ކިންގްސް އެވެ. ދެ ވަނަ އަށް ޖެހިލި އާރްސީބީ އާއި ތިން ވަނައިގައި އޮތް ރާޖަސްތާން ރޯޔަލްސް އަށް ހަތް މެޗުން ވަނީ 10 ޕޮއިންޓް ލިބިފަ އެވެ. ހަަތަރެއްގައި އޮތް ސަންރައިޒާސް ހައިދަރުއާބާދަށް ވަނީ ހަތް މެޗުން އަށް ޕޮއިންޓް ލިބިފަ އެވެ.
ބެންގަލޫރުގެ ޗިންނަސްވާމީ ސްޓޭޑިއަމްގައި ރޭ ޓޮސް ދިމާވުމުން، ބެންގަލޫރުން ނިންމީ ހޮވާށެވެ. ގުޖުރާތުން ކުޅެން އަރައި، 20 އޯވަރުގެ ތެރޭގައި، ފަސް ކުޅުންތެރިން ނުބައިވެގެން، 205 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ 58 ބޯޅައިން 100 ލަނޑު ހަދައި، ސެންޗަރީއެއް ފުރިހަމަކުރި، ސައި ސުދަރްސަން އެވެ. ސުދަރްސަން ވަނީ، އައިޕީއެލްގައި އެންމެ މަދުން މެޗު ކުޅެ، 2000 ލަނޑު ހަމަކުރި ކުޅުންތެރިޔާގެ ރެކޯޑް ހަދައިފަ އެވެ. ސުދަރްސަން އެ އަދަދަށް ލަނޑު ހެދީ 58 ބޯޅައިންނެވެ.
ޖަވާބުގައި ކުޅެން އަރައި ބެންގަލޫރުން އެންމެ ރަނގަޅު ކުޅުމެއް ދެއްކީ، ވިރާތު ކޯލީ އެވެ. އެ ގޮތުން، 44 ބޯޅައިން 81 ލަނޑު ހެދި ވިރާތުގެ މޮޅު ކުޅުމާ އެކު، ބެންގަލޫރުން ވަނީ، 18.5 އޯވަރުގެ ތެރޭގައި ފަސް ކުޅުންތެރިން ނުބައިވިިއިރު، 206 ލަނޑު ހަދައި މެޗުން މޮޅުވެފަ އެެވެ. އެ ޓީމުގެ ފިލް ސޯލްޓް އަނިޔާގެ ސަބަބުން ނުކުޅޭއިރު، އިންގްލެންޑްގެ ޒުވާން ތަރި، ޖޭކަބް ބެތެލް ވަނީ ކުޅެފަ އެވެ. މި ފަހަރުގެ އައިޕީއެލްގައި ފުރަތަމަ ފަހަރަށް މެޗެއް ކުޅުނު ބެތެލް، ނުބައިވީ 10 ބޯޅައިން 14 ލަނޑު ހަދާފައިވަނިކޮެށެވެ.
މި ފަހަރުގެ އައިޕީއެލްގައި ބެންގަލޫރަށް މޮޅު ކުޅުމެއް ދައްކަމުން އަންނަ ދޭވްދަތު ޕަޑިއްކަލް ވަނީ 27 ބޯޅައިން 55 ލަނޑު ހަދައިފަ އެވެ.
އައިޕީއެލްގައި މިއަދު ދެ މެޗެއް ކުޅޭނެ އެވެ. ފުރަތަމަ މެޗުގައި ދިއްލީ ކެޕިޓަލްސް އިން ޕަންޖާބް ކިންގްސްއާ ކުޅޭއިރު، ދެ ވަނަ މެޗުގައި، ރާޖަސްތާން ރޯޔަލްސް އިން ކުޅޭނީ ސަންރައިޒާސް ހައިދަރުއާބާދުއާ އެވެ.
