ޖައިޕޫރު، އިންޑިއާ (މެއި 2) - އޮސްޓްރޭލިއާގެ ކުޅަދާނަ ބޯލަރު، މިޗެލް ސްޓާކް، މި ފަހަރުގެ އިންޑިއަން ޕްރިމިއާ ލީގު (އައިޕީއެލް)ގައި ކުޅުނު ފުރަަތަމަ މެޗުގައި ދެއްކި ތަފާތު މޮޅު ކުޅުމާ އެކު، ދިއްލީ ކެޕިޓަލްސް އިން ހަތް ވިކެޓުން ރާޖަސްތާން ރޯޔަލްސް ބަލިކޮށްފި އެވެ.
މިދިޔަ އަހަރު ކޮނޑަށް ލިބުނު އަނިޔާއަކާ ހެދި ކުޅުމާ ދުރުގައި ހުރެފައި ސްޓާކް އެނބުރި އައިސް ކުޅުނު ރަސްމީ ފުރަތަމަ މެޗަކީ ރޭގެ މެޗެވެ. ދުނިޔޭގެ އެންމެ ވަރުގަދަ ފްރެންޗައިސް ކްރިކެޓް ލީގު، އައިޕީއެލްގައި ދިއްލީ އަށް ގަދަ ހަތަރެއްގައި ނިންމައި، ޕްލޭއޮފަށް ދިއުމަށް ރޭގެ މެޗުގައި މޮޅެއް ހޯދުން އޮތީ މަޖުބޫރުވެފަ އެވެ. އެ ހާލަތުގައި ސްޓާކްގެ ތަޖުރިބާގެ ބޭނުންކޮށް ދިއްލީން ވަނީ މެޗުން މޮޅުވެފަ އެވެ.
ރޭގެ ނަތީޖާއާ އެކު ދިއްލީ ކެޕިޓަލްސް އޮތީ 10 ޓީމު ކުޅޭ އައިޕީއެލްގެ ހަ ވަނައިގަ އެވެ. ދިއްލީ ކެޕިޓަލްސް އަށް ނުވަ މެޗުން އަށް ޕޮއިންޓް ލިބިފައިވާއިރު، ފަސް ވަނައިގައި އޮތް ގުޖުރާތު ޓައިޓަންސް އަށް ވަނީ ނުވަ މެޗުން 10 ޕޮއިންޓް ލިބިފަ އެވެ. ތިން ވަނަ އާއި ހަތަރެއްގައި އޮތް ސަންރަައިޒާސް ހައިދަރުއާބާދާއި ރާޖަސްތާނަށް ވަނީ 12 ޕޮއިންޓް ލިބިފަ އެވެ. ހައިދަރުއާބާދުން ނުވަ މެޗު ކުޅެފައިވާއިރު، ރާޖަސްތާނުން ވަނީ 10 މެޗު ކުޅެފަ އެވެ. އެއް ވަނައިގައި އޮތް ޕަންޖާބް ކިންގްސް އަށް އަށް މެޗުން 13 ޕޮއިންޓް އަދި ދެ ވަނައިގައި އޮތް އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު އަށް ވަނީ ނުވަ މެޗުން 12 ޕޮއިންޓް ލިބިފަ އެވެ.
ރާޖަސްތާނުން ޓޮސް ދިމާވުމުން ކުޅެން އެރިއިރު، 20 އޯވަރު ތެރޭގައި ހެދުނީ ހަ ކުޅުންތެރިން ނުބައިވެެގެން 225 ލަނޑެވެ. އެ ޓީމުގެ ޔަޝަޝްވީ ޖޭސްވާލް އާއި ވައިބަވް ސޫރްޔަވަންޝީ ވަނީ އަަވަހަށް ނުބައިވެފަ އެވެ. ޔަޝަޝްވީ ތިން ބޯޅައިން ހަ ލަނޑަށް އަދި ސޫރްޔަވަންޝީ ވަނީ ދެ ބޯޅައިން ހަތަރު ލަނޑަށް ނުބައިވެފަ އެވެ. މި އިނިންސްގައި ތަފާތަކީ، ސްޓާކް އެވެ. އޭނާ ވަނީ ހަތަރު އޯވަރަށް ތިން ވިކެޓް ނަގައިފަ އެވެ. އެއީ، ޔަޝަޝްވީގެ އިތުރުން، ރިޔާން ޕަރާގް އާއި ރަވިންދުރަ ޖަދޭޖާގެ ވިކެޓް އެވެ.
ޖަވާބުގައި ކުޅެން އަރައި، ދިއްލީ ކެޕިޓަލްސް އިން ވަނީ 19.1 އޯވަރުގެ ތެރޭގައި، ތިން ކުޅުންތެރިން ނުބައިވެގެން 226 ލަނޑު ހަދައި މެޗުން މޮޅުވެފަ އެވެ. އެންމެ ރަނގަޅު ކުޅުމެއް ދެއްކީ ރަނގަޅު ފޯމެއްގައި ހުރި ކޭއެލް ރާހުލް އާއި ޕަތުމް ނިސަންކަ އެވެ. ރާހުލް ވަނީ 40 ބޯޅައިން 75 ލަނޑު ހަދައިފަ އެވެ. އަދި، ނިސަންކަ ވަނީ 33 ބޯޅައިން 62 ލަނޑު ހަދައިފަ އެވެ.
އައިޕީއެލްގައި މިރޭ ކުޅޭ މެޗުގައި ޗެންނާއި ސުޕަ ކިންގްސް އިން ކުޅޭނީ މުމްބައި އިންޑިއަންސްއާ އެވެ. ޗެންނާއި ހަތް ވަނައިގައި އޮތްއިރު، މުމްބައި އޮތީ ނުވަ ވަނައިގަ އެވެ.
