މެޑްރިޑް (އޭޕްރީލް 22) - ކީލިއަން އެމްބާޕޭ އާއި ވިނީޝިއުސް ޖޫނިއާގެ ލަނޑުތަކުން ރޭ ސްޕެނިޝް ލީގުގައި ރެއާލް މެޑްރިޑުން 2-1 އިން އަލަވޭސްގެ މައްޗަށް ކުރިހޯދައިފި އެވެ.
މި ނަތީޖާއާ އެކު ލީގުގެ އެއް ވަަނައިގައި ބާސެލޯނާގެ ލީޑު ވަނީ ހަ ޕޮއިންޓަށް ކުޑަވެފަ އެވެ. ބާސެލޯނާ، އެއް ވަނައިގައި އޮތީ 31 މެޗުން 79 ޕޮއިންޓް ހޯދައިގެންނެވެ. ދެ ވަނައިގައި އޮތް ރެއާލް މެޑްރިޑަށް 32 މެޗުން ވަނީ 73 ޕޮއިންޓް ލިބިފަ އެވެ. ރޭގެ މެޗުގެ ކުރިން ރެއާލުން ލީގުގައި އެންމެ ފަހުން ކުޅުނު ދެ މެޗުން ވެސް މޮޅެއް ނުވެ އެވެ. އެއް މެޗުން އެއްވަރުވިއިރު، އަނެއް މެޗުން ވަނީ ބަލިވެފަ އެވެ. މަޔޯކާ އަތުން ބަލިވިއިރު، ޖިރޯނާއާ ވަނީ އެއްވަރުވެފަ އެވެ.
ރެއާލްގެ ސަންޓިއާގޯ ބާނަބެއުގައި ރޭ ކުޅުނު މެޗުގައި އެ ޓީމުން ލީޑުނެގީ 30 ވަނަ މިނިޓްގައި އެމްބާޕޭ ޖެހި ގޯލުންނެވެ. މިއީ، ރެއާލަށް ކުޅޭ ތުރުކީގެ ތަރި، އާޑާ ގުލާ ދިން ބޯޅައަކުން އެމްބާޕޭ ޖެހި ގޯލެކެވެ. މިއީ، މި ފަހަރު ލީގުުގައި އެމްބާޕޭ ޖެހި 24 ވަަނަ ގޯލެވެ. ދެ ވަނަ ހާފުގެ ކުޅުން ފެށިގެން ފަސް މިނިޓް ތެރޭ ރެއާލުން ދެ ވަަނަ ލަނޑު ޖެހި އެވެ. މިއީ، ފެޑެރީކޯ ވަލްވޭޑޭ ތަނަވަސްކޮށްދިން ފުރުސަތަކުން، ގޯލުގެ ތިރީ ކަނަށް ބޯޅަ އަމާޒުކޮށްލައިގެން ވިނީޝިއުސް ޖެހި ލަނޑެކެވެ. މިއީ، މި ފަހަރު ލީގުގައި ވިނީޝިއުސްގެ 12 ވަނަ ގޯލެވެ.
އިތުރު ވަގުތުގެ ތެރޭގައި އަލަވޭސް އިން މެޗުގައި ޖެހި ހަމައެކަނި ލަނޑު ކާމިޔާބުކުރި އެވެ. މި ލަނޑު އެ ޓީމަށް ޖަހައިދިނީ ޓޯނީ މާޓީނޭޒް އެވެ.
މި ފަހަރުގެ ލީގު ނުލިބިއްޖެނަމަ، ރެއާލުން މި ގަަރުނުގެ ތެރޭގައި، ފަސް ވަނަ ސީޒަނުގައި ތަށްޓެއް ނުލިބި ނިންމާލަން ޖެހޭނެ އެވެ. މީގެ ކުރިން، ރެއާލުން މި ފަހުން ހުސްއަތާ ސީޒަން ނިންމާލަން ޖެހުނު ސީޒަން ތަކަކީ، 2004/05، 2005/06، 2009/10 އަދި 2020/21 އެވެ.
ރެއާލަށް ލީގުގައި ބާކީ ހަ މެޗު އޮތްއިރު، އޭގެ ތެރޭގައި ބާސެލޯނާ ދަނޑުގައި ކުޅެން ޖެހޭ އެލް ކްލަސިކޯ މެޗު ވެސް ހިމެނެ އެވެ. ބާސެލޯނާ އަށް ރެއާލް މެޗު ނުލައި، ބާކީ ހަ މެޗު އެބައޮތެވެ.
