މެޑްރިޑް (އޭޕްރީލް 25) - ސްޕެނިޝް ލީގުގައި ރޭ ރެއާލް ބެޓިސް އިން ފަހު ވަގުތު ލަނޑު ޖަހައި، ރެއާލް މެޑްރިޑާ 1-1 އިން އެއްވަރުކުރުމާ އެކު، ލީގުގެ ރޭހުގައި ކުރިއަށްދިއުމަށްޓަކައި އެއް ވަނައިގައި އޮތް ބާސެލޯނާ އަށް ފަސޭހަވެއްޖެ އެވެ.
ބާސެލޯނާ، މި ވަގުތު އެއް ވަނައިގައި އޮތީ އަށް ޕޮއިންޓުގެ ލީޑަކާ އެކު އެވެ. އެކަމަކު، މިރޭ ގެޓަފޭއާ ދެކޮޅަށް ކުޅޭ މެޗުން މޮޅުވެއްޖެނަމަ، ލީގުގެ ބާކީ ފަސް މެޗާ ކުރިމަތިލާއިރު ބާސެލޯނާ އޮންނާނީ 11 ޕޮއިންޓުގެ ލީޑެއްގަ އެވެ. ބާސެލޯނާ އަށް 32 މެޗުން 82 ޕޮއިންޓް ލިބިފައިވާއިރު، ދެ ވަނައިގައި އޮތް ރެއާލަށް 33 މެޗުން ލިބުނީ 74 ޕޮއިންޓެވެ.
ސެވިލްގެ އެސްޓަޑިއޯ ލަ ކަރްޓޫހާ ސްޓޭޑިއަމްގައި ކުޅުނު މެޗުގެ 17 ވަނަ މިނިޓްގައި ރެއާލުން ލީޑުނެގި އެވެ. މި ލަނޑު ޖެހީ ވިނީޝިއުސް ޖޫނިއާ އެެވެ. މިއީ، ރެއާލްގެ ފެޑެރީކޯ ވަލްވޭޑޭ ފޮނުވާލި ބޯޅައެއް ބެޓިސްގެ ކީޕަރު، އަލްވާރޯ ވަލެސް އަތުގައި ޖެހިފައި ނުކުތް ވަގުތު ވިނީޝިއުސް ޖެހި ލަނޑެކެވެ.
ރެއާލަށް 100 ވަނަ މެޗު ކުޅެދިން ކީލިއަން އެމްބާޕޭ އަށް އެ ޓީމުގެ ލީޑުފުޅާކޮށްދޭން ލިބުނު ފުރުސަތުގެ ބޭނުން ނުހިފުނެވެ. އަދި، ރެއާލްގެ ވިނީޝިއުސް އާއި ކީލިއަން އެމްބާޕޭ އަށް ލިބުނު ބޯޅަތައް ވެސް ގޯލަަކަށް ހަދައިނުލެވުނެވެ. ބެޓިސް އިން ލަނޑެއް ޖެހޭތޯ ކުރަމުން ދިޔަ މަސައްކަތް ހުއްޓުވަން ރެއާލްގެ ކީޕަރު އަންޑްރީ ލުނިން މޮޅު ކުޅުމެއް ދެއްކި އެވެ.
ބެޓިސް އިން އެއްވަރުކުރި ލަނޑު ޖެހީ އިތުރު ވަގުތުގެ ތެރޭގަ އެވެ. މި ގޯލު ކާމިޔާބުކުރީ ކުރިން އާސެނަލާއި ބާސެލޯނާ އަށް ކުޅުނު ފުލްބެކް، ހެކްޓަ ބެލެރިން އެވެ. މިއީ، ރެއާލްގެ ފުލްބެކް، ފާލަންޑް މެންޑީ ހެދި ގޯހެއްގެ ފައިދާނަގައި، ބެލެރިން ޖެހި ގޯލެކެވެ.
ރެއާލުން ދެން ކުޅޭ މެޗުގައި އެސްޕަންޔޯލާ ކުޅުމަށް ފަހު، ދެން، އޮންނާނީ ބާސެލޯނާއާ ދެކޮޅަށް ލީގުގައި ކުޅޭ މެޗެވެ. ކުރިއަށް އޮތް މެޗުތަކުން މޮޅުވެ، ރެއާލް އަތުން ވެސް ބާސެލޯނާ ކުރިހޯދައިފިނަމަ، އެ މެޗުން އެ ޓީމަށް ލީގު ޗެމްޕިއަންކަން ޔަގީންވުމުގެ ފުރުސަތު އެބައޮތެވެ.
