ބާސެލޯނާ (އޭޕްރީލް 23) - ސްޕެނިޝް ލީގުގައި ރޭ ސެލްޓަ ވީގޯ އަތުން 1-0 އިން ބާސެލޯނާ މޮޅުކޮށްދިން ޕެނަލްޓީ ޖެހި ވަގުތު އެ ޓީމުގެ ތަރި، ލަމީން ޔަމާލަށް އަނިޔާވެެއްޖެ އެވެ.
މެޗުގެ 40 ވަނަ މިނިޓްގައި ޕެނަލްޓީ ކާމިޔާބުކުރި ގޮތަށް ޔަމާލް، 18، ވަނީ އަނިޔާވިކަން ބެންޗަށް އަންގައިފަ އެވެ. މި ޕެނަލްޓީ ލިބުނީ ވެސް ޔަމާލަށް ކުރި ފައުލަކަށެވެ. އެއީ، ސެލްޓަ ވީގޯގެ އޭރިއާތެރެއިން އެ ޓީމުގެ ޔޮއެލް ލޯގޯ ކުރި ފައުލެކެވެ. ޕެނަލްޓީ ޖެހި ވަގުތު އަނިޔާވީ ޔަމާލްގެ ވާތުފައިގެ ފަލަމަސްގަނޑަށެވެ.
ޔަމާލްގެ އަނިޔާ ސީރިއަސް ނުވާނެކަމުގެ ޔަގީންކަން ދެވޭނީ މިއަދު ހަދާ ޓެސްޓްތަކަށް ފަހު ކަމަށް ބާސެލޯނާގެ ކޯޗު ހަންސީ ފްލިކް ވަނީ ބުނެފަ އެވެ. އަދި، ލީގުގައި ކުރިއަށް ހުރީ މުހިންމު މެޗުތަކެއް ކަމަށާއި ޓީމުގެ އެންމެ ރަނގަޅު ކުޅުންތެރިންނަށް އެ މެޗުތަކުގައި ކުޅެވޭގޮތް ވުމަކީ އެންމެ އެދޭ ގޮތް ކަމަށް ފްލިކް ވަނީ ބުނެފަ އެވެ.
މި ސީޒަނަށް ބަލާއިރު ޔަމާލް ހުރީ ރަނގަޅު ފޯމެއްގަ އެވެ. އޭނާ ވަނީ ލީގުގަައި ކުޅުނު މެޗުތަކަށް އެކަނި ބަލާއިރު، 16 ގޯލު ޖަހައި، 11 ގޯލު ޖަހަން ފުރުސަތު ތަނަވަސްކޮށްދީފަ އެވެ. ބާސެލޯނާ އިން އެންމެ އެދެނީ އަންނަ މަހު ރެއާލް މެޑްރިޑާ ދެކޮޅަށް ކުޅޭ އެލް ކްލަސިކޯ މެޗަށް ޔަމާލް ފިޓްކޮށް ހުރުމަށެވެ.
ސެލްޓަ ވީގޯ އަތުން ލިބުނު މޮޅާ އެކު، ބާސެލޯނާ އިން ވަނީ ލީގުގެ އެއް ވަނައިގައި އެ ޓީމުގެ ލީޑު ދަމަހައްޓައިފަ އެވެ. ލީގުގައި ބާކީ ހަ މެޗު އޮތްއިރު، ބާސެލޯނާ އެއް ވަނައިގައި އޮތީ ނުވަ ޕޮއިންޓުގެ ލީޑަކާ އެކު، 32 މެޗުން 82 ޕޮއިންޓް ހޯދައިގެންނެވެ. ދެ ވަނައިގައި އޮތް ރެއާލް މެޑްރިޑަށް 32 މެޗުން ލިބިފައިވަނީ 73 ޕޮއިންޓެވެ.
