ޑޮލަރު ތާށިކަމުގެ މައްސަލަ ބޮޑުވެ ބީއެމްއެލްގެ ކަސްޓަމަރުންގެ ކާޑުތަކަށް ފުރިހަމައަށް ހިދުމަތް ނުދެވޭ ހިސާބަކަށް ކަންކަން ދިޔައިރު، އެ ބޭންކުގައި ދާއިމީ ޗީފް ފައިނޭންޝަލް އޮފިސަރު (ސީއެފްއޯ) އެއް ނެތި ނިންމުންތައް ނިންމަމުންދާތީ މާލީ މާހިރުން ކަންބޮޑުވުން ފާޅުކުރަން ފަށައިފި އެވެ.
ބީއެމްއެލްގައި އެންމެ ފަހުން ހުރި ސީއެފްއޯ، ނަންދަނަ ސެނަވިރަތުނެ އެ ބޭންކުން ވަކިވީ މިިދިޔަ އަހަރުގެ އޮކްޓޫބަރު 16، ގައި އެވެ. އެ ފަހުން މިއަދާ ހަމައަށް އެ ބޭންކުން މަސައްކަތް ކުރަމުން އަންނަނީ "ސީ-ސޫޓް" ނުވަތަ އެންމެ މަތީ ފަންތީގެ މެނޭޖުމަންޓު ލެވަލްގައި ފައިނޭންޝަލް އޮފިސަރަކާ ނުލަ އެވެ.
އެ ބޭންކުގެ ވަޒީފާ ޕޯޓަލްގައި ސީއެފްއޯއެއް ހޯދަމުން އަންނަ ކަމަކަށް ވެސް ނެތެވެ. އަދި، އެ ބޭންކުން ކޮށްފައިވާ އިއުލާނެއް ވެސް ފެންނާކަށް ނެތެވެ.
މިކަމާ ގުޅިގެން ނަން ނުޖަހާ ގޮތަށް އަދަދު ނޫހާ، ވާހަކަ ދެއްކި މާލީ ދާއިރާގެ ތަޖުރިބާކާރަކު ބުނި ގޮތުގައި ސީއެފްއޯގެ ޒިންމާތަކުގެ ތެރޭގައި މެނޭޖުމަންޓުން އާ ކަމެއް ކުރަން ބޭނުންވާއިރު، ހިސާބުތަކަށް ބަލާފައި ތިކަން ކުރަން ފައިސާ ނެތޭ ބުނުން ހިމެނެ އެވެ.
"މިސާލަކަށް ބޮޑު ލޯނެއް ދޭން ވިޔަސް، ނޫނީ ޓީބިލު ގަންނަން ވިޔަސް، ނޫނީ ބޭންކުން ބޮޑު އިންވެސްމަންޓެއް ކުރަން ވިޔަސް، ނަމްބަރުތަކަށް ބަލާފައި ފަހު ބަސް ބުނާނީ ސީއެފްއޯ،" ތަޖުރިބާކާރު ބުންޏެވެ.
ބޭންކިން ދާއިރާގައި ވެސް ގިނަ އަހަރުތަކެއް ވަންދެން މަސައްކަތްކޮށްފައިވާ، ތަޖުރިބާކާރު ބުނީ އެންމެ ބޮޑު ކަންބޮޑުވުމަކީ ސީއެފްއޯ ނެތުމުން ބޭންކުގެ އެތެރޭގެ ފާރަވެރިވުމުގެ ނިޒާމު ބަލިކަށިވުމެވެ. އޭނާ ބުނީ، ކޮންމެ މާލީ އިދާރާއެއް އަދި ބޮޑު ކުންފުންޏެއްގައި ވިޔަސް، "ޗެކް އެންޑް ބެލެންސް" ނިޒާމު ފުރިހަމަވާނީ ސީއެފްއޯއެއް ހުރެގެން ކަމަށެވެ.
މި ކަންބޮޑުވުންތައް ހިއްސާކުރާ އެހެން ތަޖުރިބާކާރަކު ވެސް ނަން ނުޖަހާ ގޮތަށް ވާހަކަ ދައްކަމުން ބުނީ، ސީއެފްއޯއަކީ ހަގީގަތް މެނޭޖުމަންޓަށް ކިޔައިދީ، "ރިއަލިޓީ ޗެކް" ދޭން ހުންނަ މީހާ ކަމަށެވެ. އަދި، މިހާރު މި ލައިގަނެގެން އުޅޭ އިގުތިސޯދީ އުނދަގޫތަކުގެ ތެރޭގައި މި މަގާމުގައި މީހަކު ކޮންމެހެން ވެސް ހުންނަން ޖެހޭ ކަމަށް އޭނާ ބުންނެވެ.
"މިއީ ބިޔަ އާގު ބޯޓެއްގައި ތެޔޮ ހުރި މިންވަރު ބަލާނެ މީހަކު ނެތި ދަތުރުފަށައިގެން އުޅެނިކޮށް، ތޫފާނެއް ލައިގަނެގެން އޭގެ ތެރެއިން ދަތުރުކުރުންހާ ނުރައްކާތެރި ކަމެއް،" އޭނާ ބުންޏެވެ.
މި ނޫހަށް މައުލޫމާތު ލިބިފައިވާ ގޮތުގައި ބީއެމްއެލްގެ ސީއެފްއޯގެ ޒިންމާތައް މި ވަގުތު އަދާކުރަމުން އަންނަނީ ފިނޭންސުގެ ޑިރެކްޓަރެކެވެ. ނަމަވެސް، މި ސުވާލާއި ސީއެފްއޯއެއް ނެތި މިހާ ގިނަ ދުވަސްވެގެން ދިޔަ ސަބަބާ އަދި ސީއެފްއޯއެއް ހޯދަން މަސައްކަތް ކުރަމުންދާތޯ ބީއެމްއެލްއާ ސުވާލުކުރި ނަމަވެސް އެ ބޭންކުގެ ޖަވާބެއް ނުލިބެ އެވެ.
