ބޭންކު އޮފް މޯލްޑިވްސް (ބީއެމްއެލް) އިން ވިޔަފާރިތަކަށް ޓީޓީ ހެދުމަށް ދެމުން އައި ޑޮލަރު ސަޕޯޓު ކުއްލިއަކަށް މެދުކަނޑާލާފައިވާ ކަމަށް ބައެއް ވިޔަފާރިތަކުން ބުނަމުން އައި ނަމަވެސް އެފަދަ ފިޔަވަޅެއް އަޅާފައިނުވާނެ ކަމަށް ބޭންކުން ބުނެފި އެވެ.
ޑޮލަރު ސަޕޯޓު މެދުކަނޑާނުލާ ކަމަށް ބީއެމްއެލް އިން ބުނީ އަދަދު އިން ޖެހި ހަބަރަކަށް ރައްދު ދެމުންނެވެ. ބޭންކުން ބުނީ ކުރިން ވެސް ވިޔަފާރިތަކަށް ވިއްކަމުން އައިސްފައިވާ އުސޫލުން، ކަނޑައެޅިފައިވާ ލިމިޓުގެ ތެރެއިން ޑޮލަރު ވިއްކަމުން އަންނަ ކަމަށެވެ.
މި މަހުގެ ތެރޭގައި ޓީޓީއަށް ޑޮލަރު ބޭނުންވާ ކޮންމެ ކަސްޓަމަރަކަށް ލިމިޓާ ހަމައަށް ޑޮލަރު ވިއްކާފައިވާނެ ކަމަށް ވެސް އެ ބޭންކުން ބުންޏެވެ.
ބީއެމްއެލްގެ ޑޮލަރު ސަޕޯޓު ކުއްލިއަކަށް ހުއްޓާލައިފި ކަމަށް ބައެއް ވިޔަފާރިތަކުން ބުނެފި
ބީއެމްއެލްއިން ވިޔަފާރިތަކަށް ޓީޓީ ހެދުމަށް ދެމުން އައި ޑޮލަރު ސަޕޯޓު ކުއްލި ގޮތަކަށް މެދުކަނޑާލުމާ ގުޅިގެން، މުދާ އެތެރެކުރާ ކުންފުނިތަކަށް ބޮޑެތި ގޮންޖެހުންތަކެއް ވަނީ ކުރިމަތިވެފަ. މިކަމުގެ ސަބަބުން ކަޅު ބާޒާރުން ބޮޑު އަގުގައި ޑޮލަރު ގަންނަން މަޖުބޫރުވެ، ބާޒާރުގައި ތަކެތީގެ އަގު އިތުރަށް އުފުލުމުގެ ބިރު އެބަ އޮތް
ބީއެމްއެލްއިން ބުނި ގޮތުގައި ވިޔަފާރިތަކުން ބޭނުންވާ ޖުމްލަ އަދަދު ނުދެވުނަސް، ޓީޓީ ހަދަން ޑޮލަރުގެ އެހީއަށް އެދިފައިވާ އެއްވެސް ވިޔަފާރިއަކަށް ޑޮލަރުގެ އެހީތެރިކަން ފޯރުކޮށްނުދީ ނޯންނާނެ އެވެ.
"މިހާތަނަށް ޓީޓީ ހަދަން ޑޮލަރުގެ އެހީއަށް އެދިފައިވާ އެއްވެސް ވިޔަފާރިއަކަށް ޑޮލަރުގެ އެހީތެރިކަން ފޯރުކޮށްނުދެވިފައެއްނެތް. އެހެންނަމަވެސް އެ ވިޔަފާރީގެ ޓީޓީއަށް ބޭނުންވާ ޖުމްލަ އަދަދު ބޭންކުން ނުދެވުން އެކަށީގެންވޭ،" ބީއެމްއެލްގެ ބަޔާނުގައި ބުންޏެވެ.
ޑޮލަރު ސަޕޯޓު ނުދޭ ކަމަށް ވިޔަފާރިވެރިން ދިން މައުލޫމާތު ދޮގުކުރުމާއެކީ، ބީއެމްއެލްއިން ވަނީ ކުރިއަށް ވުރެ އިތުރަށް ވިޔަފާރިތަކަށް ޑޮލަރު ވިއްކަމުން އަންނަ ކަމަށް ވެސް ބުނެފަ އެވެ.
އެ ގޮތުން މި އަހަރުގެ ފުރަތަމަ ތިން މަސް ދުވަހުގެ ތެރޭގައި، އެވަރެޖުކޮށް މަހަކަށް 35.4 މިލިއަން ރޭޓުގައި، 106.2 މިލިއަން ޑޮލަރު ވިއްކާފައިވާ ކަމަށް ބީއެމްއެލްއިން ބުންޏެވެ. މިއީ މިދިޔަ އަހަރުގެ އެ މުއްދަތުގައި އެ ބޭންކުން އެވަރެޖުކޮށް މަހަކަށް ވިއްކި ކަމަށް ބުނެފައިވާ 14.6 މިލިއަން ޑޮލަރަށް ވުރެ 142 ޕަސެންޓު ބޮޑު އަދަދެކެވެ.
ބީއެމްއެލްގެ ޑޮލަރު ސަޕޯޓުގެ ތަފާސްހިސާބުތައް
- 38،855 ޓީޓީއަށް ޑޮލަރު ސަޕޯޓު ދިން
- މި މަހު އިތުރު 6،800 ޓީޓީއަށް ޑޮލަރު ސަޕޯޓު ދީފި
- އިއްޔެ އެކަނި 327 ޓީޓީއަށް 9 ލައްކައަށް ވުރެ ގިނަ ޑޮލަރު ވިއްކި
ބީއެމްއެލްގެ ބަޔާނުގައި ދެއްކި ވާހަކަތަކާ ގުޅިގެން އަދަދު އިން ވާނީ މައުލޫމާތު ދިން ވިޔަފާރިވެރިންނަށް ގުޅައިގެން، އެ މީހުން ދިން މައުލޫމާތުގެ ސައްހަކަން ކަށަވަރުކޮށްފަ އެވެ. އަދި، ބޭންކުން އެ ވާހަކަ ދޮގުކުރާ ކަމަށް ބުނުމުން ވެސް އެ ވިޔަފާރިވެރިން ވަނީ އެކައުންޓު މެނޭޖަރުން މެދުވެރިކޮށް ގުޅައިގެން އެ ކަން މުއާމަލާތްކޮށްފައިވާ ކަމަށް ބުނެފަ އެވެ.
ސަރުކާރުގެ އެންގުމަކަށް ބީއެމްއެލް އިން ވަނީ މިދިޔަ އަހަރުގެ ތެރޭގައި ޑޮލަރު ސަޕޯޓު ދޭ މިންވަރު އިތުރުކޮށްފަ އެވެ. ނަމަވެސް މި ގޮތަށް އިތުރުކުރީ ބޭންޑުތަކެއް ކަނޑައަޅައިގެންނެވެ.
ބީއެމްއެލްއިން ކަނޑައަޅާފައިވާ ބޭންޑުތަކުގެ ދަށުން 2500 ޑޮލަރުން ދަށުގެ ޓީޓީތަކަށް 50 ޕަސެންޓާ ހަމައަށް ޑޮލަރު ސަޕޯޓު ލިބެ އެވެ. 2500 ޑޮލަރާއި 5000 ޑޮލަރާ ދެމެދުގެ ޓީޓީތަކަށް ލިބެނީ 30 ޕަސެންޓެވެ. 5000 ޑޮލަރަށް ވުރެން އަގު ބޮޑު ޓީޓީތަކަށް ލިބެނީ 15 ޕަސެންޓެވެ.
