އިރާން ހަނގުރާމައާ ގުޅިގެން ރާއްޖޭގެ ޓޫރިޒަމަށް އައިސްފައިވާ ހީނަރުކަމުގެ ސަބަބުން ބޭންކް އޮފް މޯލްޑިވްސް (ބީއެމްއެލް) އަށް ލިބޭ ޑޮލަރަށް ވުރެ ބޭރުވާ ޑޮލަރުގެ އަދަދު އިތުރުވެފައިވާތީ، ވަގުތީ ފިޔަވަޅުތަކެއް އަޅަން ޖެހިދާނެ ކަމަށް އެ ބޭންކުން މިއަދު ބުނެފި އެވެ.
ބީއެމްއެލްގެ ފުރަތަމަ ކުއާޓަރުގެ ރިޕޯޓުގައި ޑޮލަރު ތާށިކަމުގެ މައްސަލައިގައި ބުނީ، ޓޫރިސްޓުން ނާންނާތީ އާއި އަންނަ ޓޫރިސްޓުން ހޭދަކުރާ މިންވަރު މަދުވުމުން ކާޑުތަކުން ބޭންކަށް ކާޑުތަކުން ވަންނަ ފައިސާގެ އަދަދު (ނެޓް ކާޑް އިންފްލޯ) ދަށްވެފައިވާ ކަމަށެވެ. އެ ބޭންކުން ބުނީ، ކާޑުތަކުން ލިބުނި މިންވަރު މި މަހުގެ މިހާތަނަށް ގާތްގަޑަކަށް ތިންބައިކުޅައެއްބައި ދަށްވެފައިވާކަން ފާހަގަކުރެވިފައިވާ ކަމަށެވެ.
ޑޮލަރު ވަންނަ މިންވަރު މަދުވިޔަސް ބޭންކުން ވިއްކާ ޑޮލަރުގެ އަދަދު ވަރަށް ބޮޑަށް އިތުރުވެފައިވާ ކަމަށް ބީއެމްއެލްއިން ހިއްސާކުރި ތަފާސްހިސާބުތަކުން ދައްކަ އެވެ. އެ ބޭންކުން ވަނީ މި އަހަރުގެ ފުރަތަމަ ތިން މަސް ދުވަހުގެ ތެރޭގައި ވިޔަފާރިތަކާއި އާންމުންގެ ބޭނުންތަކަށް 226 މިލިއަން ޑޮލަރު ވިއްކާފަ އެވެ.
ބީއެމްއެލްއިން ބުނީ ޑޮލަރު ސަޕޯޓުގެ ގޮތުގައި އެވަރެޖުކޮށް މަހަކު 35.4 މިލިއަން ޑޮލަރު ވިއްކާފައިވާ ކަމަށެވެ. އަދި ޑެބިޓު ކާޑުތަކާއި ކްރެޑިޓު ކާޑުތަކަށް އެވަރެޖުކޮށް މަހަކު 40 މިލިއަން ޑޮލަރު ވިއްކާފައިވާ ބީއެމްއެލްއިން ބުންޏެވެ.
ބީއެމްއެލްއަށް ފުރަތަމަ ކުއާޓަރުގައި 631 މިލިއަން ރުފިޔާގެ ސާފު ފައިދާ
ބޭންކަށް ނިމުނު ކުއާޓަރުގައި ބޮޑު އާމްދަނީއަކާއި ސާފު ފައިދާއެއް ލިބުނު ނަމަވެސް، އިރާން ހަނގުރާމައިގެ ސަބަބުން ޓޫރިޒަމަށް އައި ހީނަރުކަމާ ގުޅިގެން ޑޮލަރު ގޮންޖެހުންތައް އެބަހުރި ކަމަށް ބޭންކުން ބުނި.
މިދިޔަ އަހަރުގެ ފުރަތަމަ ކުއާޓަރާ އަޅާބަލާއިރު ކާޑުތަކަށް އެވަރެޖުކޮށް މަހަކު ވިއްކި ޑޮލަރުގެ އަދަދު 20 ޕަސެންޓު އިތުރުވެފައިވާއިރު، ޑޮލަރުގެ ސަޕޯޓުގެ ގޮތުގައި ވިއްކި އަދަދު ވަނީ 142 ޕަސެންޓު އިތުރުވެފަ އެވެ.
ބީއެމްއެލްގެ ފުރަތަމަ ކުއާޓަރުގެ ޑޮލަރު ތަފާސްހިސާބުތައް
- ޑެބިޓު ކާޑުތަކާއި ކްރެޑިޓު ކާޑުތަކަށް ވިއްކި އަދަދު - 119.9 މިލިއަން ޑޮލަރު
- ވިޔަފާރިތަކަށް ވިއްކި އަދަދު - 106.2 މިލިއަން ޑޮލަރު
- ޑޮލަރު ވިއްކި ޓީޓީތަކުގެ އަދަދު - 32،000
ބީއެމްއެލްއިން ބުނީ މުދާ އެތެރެކުރުމަށާއި ބޭރުގެ ހިދުމަތްތަކަށް ރާއްޖޭން ބޭރަށް ފައިސާ ފޮނުވާ މިންވަރު ދެ ގުނަ އިތުރުވެފައިވާ ކަމަށެވެ. ބޭންކުން އަންދާޒާ ކުރަނީ މިހާރުގެ އިގުތިސޯދީ ހާލަތާ ގުޅިގެން ބޭންކު މެދިވެރިކޮށް އަންނަ ފައިސާއަށް ވުރެ ބޭރަށް ފޮނުވާ ފައިސާ ބޮޑުތަނުން އިތުރުވާނެ ކަމަށެވެ.
ޑޮލަރު ތާށިކަން ހުއްޓަސް، ބޭރު ފައިސާގެ މުއާމަލާތްތައް ހަރުދަނާކޮށް މެނޭޖުކުރަމުން އަންނަ ކަމަށް ބީއެމްއެލްއިން ބުންޏެވެ. އެކަމަކު، މިހާރުގެ ހާލަތު ދިގުލައިގެން ގޮސް، ބޭރުން ވަންނަ ޑޮލަރު މަދުވާ މިންވަރު އިތުރުވިޔަސް، ވަގުތީ ފިޔަވަޅެއް ނޫނީ ނާޅާނެ ކަމުގެ ޔަގީންކަން އެ ބޭންކުން ދިނެވެ.
"ރާއްޖެއިން ބޭރުން އަންނަ ފައިސާ މަދުވާ މިންވަރު އިތުރުވެގެން ދާނަމަ، ނިސްބަތުން އެއާ އެއްވަރަކަށް ބޭރު ފައިސާ ވިއްކާ އަދަދަށް ވަގުތީ ގޮތުން އަޅަންޖެހިދާނެ ފިޔަވަޅެއް މެނުވީ، ބޭންކުން މަސައްކަތް ކުރާނީ މެދުނުކެނޑި ވިޔަފާރިތަކާއި އާންމު ފަރުދުންގެ މުހިންމު ބޭނުންތަކަށް ބޭރުފައިސާގެ އެހީތެރިކަން ފޯރުކޮށްދިނުމަށް." ބީއެމްއެލްއިން ބުންޏެވެ.
ވަގުތީ ފިޔަވަޅުތަކެއް ނޫނީ ނާޅާނެ ކަމަށް ބީއެމްއެލްއިން ޔަގީންކަން ދިންއިރު، މިއަދާ ހަމައަށް އެއްވެސް ވިޔަފާރިއަކުން އެދިގެން ޓީޓީއަށް ޑޮލަރު ސަޕޯޓު ނުދީ ނޯންނާނެ ކަމަށް އެ ބޭންކުން ވަނީ ބުނެފަ އެވެ.
ވިޔަފާރިވެރިންގެ ބަސް ދޮގުކޮށް، ޓީޓީއަށް ޑޮލަރު ދޫކުރުން ހުއްޓާނުލާ ކަމަށް ބީއެމްއެލް އިން ބުނެފި
ވިޔަފާރިތަކަށް ޓީޓީ ހެދުމަށް ދޫކުރާ ޑޮލަރު ސަޕޯޓު ބީއެމްއެލްއިން މެދުކަނޑާލި ކަމަށް ބުނި ހަބަރަކާ ގުޅޮގެން ބޭންކުން ހާމަކުރި ގޮތުގައި ކަނޑައެޅިފައިވާ އުސޫލުގެ ތެރެއިން ވިޔަފާރިތަކަށް ޑޮލަރު ވިއްކަމުންދާ ކަމަށް. އަދި މިދިޔަ އަހަރާ އަޅާބަލާއިރު މިއަހަރު ޑޮލަރު ވިއްކި މިންވަރު ވަނީ 142 ޕަސެންޓު އިތުރު ކަމަށް ބުނި.
ބީއެމްއެލްއިން މިހެން ބުނީ މި މަހުގެ ނިޔަލަށް ޑޮލަރު ސަޕޯޓު ނުލިބޭނެ ކަމަށް ވިޔަފާރިވެރިން ބުނެގެން އަދަދު ނޫހުން ޖެހި ހަބަރަކަށް ރައްދު ދެމުންނެވެ.. އެ ހަބަރު ދޮގުކުރަމުން ބީއެމްއެލްއިން ބުނީ ކުރިއެކާ ވެސް އެއް ގޮތަށް ޑޮލަރު ވިއްކަމުން އަންނަ ކަމަށެވެ.
ޓޫރިސްޓުން ނާންނާތީ ކާޑުތަކުން ވަންނަ ޑޮލަރު ނުލިބިގެން ފިޔަވަޅުތަކެއް އަޅާނެ ކަމަށް ބީއެމްއެލްއިން އިޝާރާތްކުރިއިރު، ވިޔަފާރިތަކަށް ވިއްކަން ބޭންކަށް ޑޮލަރު ދެނީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިންނެވެ. އަދި، ސީދާ ސަރުކާރުގެ އެންގުމަކަށް ބީއެމްއެލްއިން ކާޑުތަކުގެ ލިމިޓު މަތިކުރީ ވެސް އެމްއެމްއޭއިން ޑޮލަރު ފޯރުކޮށްދޭ ގޮތަށް ކަމަށް ވަނީ މައުލޫމާތު ލިބިފަ އެވެ.
