ވިލިމާލޭ ފުނަވާ ސަރަހައްދުގައި ސަރުކާރުން ޓަވަރުތަކެއް އިމާރާތްކުރަން ފުނަ ގަސްތައް ކަނޑާތީ މަދު ބަޔަކު ނިކުމެ ކުރި ޕްރެޝަރުތަކަށް ދީލާލައި، އޭގެ ތެރެއިން ޓަވަރެއް އެހެން ސަރަހައްދަކަށް ބަދަލުކުރަން ނިންމާފައިވާ ކަމަށް ހައުސިން މިނިސްޓަރު އަބްދުﷲ މުއްތަލިބު އިއްޔެ ވިދާޅުވެއްޖެ އެވެ.
ފުނަވަލަކީ ގްރޭޓާ މާލެ ސަރަހައްދުގައި ސަލާމަތުން ހުރި ހަމައެކަނި ގުދުރަތީ ފެހި ސަރަހައްދެވެ. އެހެންވެ، މި ތަން ހިމާޔަތްކުރަން ގޮވާލާ ތިމާވެށީގެ އެކްޓިވިސްޓުންނާއި މަދަނީ ޖަމިއްޔާތަކުން އަންނަނީ އަޑުއުފުލަމުންނެވެ. މި ޕްރޮޖެކްޓު ހުއްޓުވައިދޭން އެދި ސުޕްރީމް ކޯޓަށް ވެސް ވަނީ މައްސަލައެއް ހުށަހަޅާފަ އެވެ.
މި ކަންބޮޑުވުންތަކަށް އެތައް ހަފުތާތަކެއް ވީފަހުން، އެކްޓިވިސްޓުން ޑިމާންޑު ކުރަމުންދާ ބައެއް ކަންކަމަށް އިޖާބަދީ މުއްތަލިބު ކުރި ޕޯސްޓެއްގައި ވިދާޅުވީ، ސަރުކާރުން އަބަދު ވެސް ބަލާފައި ވަނީ ބޮޑެތި ފުނަގަސް ނުކަނޑައި ޕްރޮޖެކްޓު ކުރިއަށް ގެންދަން ކަމަށެވެ.
"ނަމަވެސް ތިން ޓަވަރުގެ ތެރެއިން އެއް ޓަވަރު އަޅަން ކަނޑައެޅި ތަނުގައި ހުރި ގަސްތައް ނަގަންޖެހޭތީ އާއި، ބައެއް ބޮޑެތި ގަސްތަކުގެ ގޮފިތައް ކަނޑަން ޖެހޭތީ އެޓަވަރު އެހެން ސަރަހައްދަކަށް ބަދަލުކުރުމަށް މިހާރުވަނީ ނިންމާފަ،" އޭނާ ލިޔުއްވާފައިވެ އެވެ.
ވިލިމާލޭގައި އަޅަން ނިންމި ޓަވަރެއް ބަދަލުކުރާނެ ކަމަށް ބުނި ނަމަވެސް އެ ޓަވަރު ބަދަލުކުރާނެ ތަނެއް މުއްތަލިބު ވިދާޅެއް ނުވެ އެވެ.
ވިލިމާލޭ ޓަވަރުތަކުގެ ޕްރޮޖެކްޓަކީ ބޭންކް އޮފް މޯލްޑިވްސް (ބީއެމްއެލް) ގެ "އެފޯޑަބަލް ހައުސިން" ގެ ދަށުން އެ ބޭންކުގެ ހަރަދުގައި އިމާރާތްކުރާ ޓަވަރުތަކެކެވެ. މި މަސައްކަތް ހަވާލުކޮށްފައި ވަނީ ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ އެވެ.
ފުނަވަލުގައި އަޅަން އުޅުނު "އަގު ހެޔޮ" ޓަވަރުތައް
- 17 ފަންގިފިލާގެ ތިން ޓަވަރު
- 300 ހައުސިން ޔުނިޓު (އެޕާޓްމަންޓު)
- ތިން ކޮޓަރީގެ އެޕާޓްމަންޓު
- ބޮޑުމިނުގައި 900 އަކަފޫޓު
މި ޕްރޮޖެކްޓަކީ ލޯކަލް ކައުންސިލް އިންތިހާބުގެ ވޯޓަށް ކައިރިވެފައި ވަނިކޮށް ސަރުކާރުން މަސައްކަތް ފެށި ސަތޭކަ އެތައް ޕްރޮޖެކްޓުގެ ތެރޭގައި ހިމެނޭ ޕްރޮޖެކްޓެކެވެ.
