ރާއްޖޭން ބޭރަށް ދަތުރުކުރާ ކޮންމެ ދިވެއްސަކަށް ދޫކުރާ ޑޮލަރުގެ މިންވަރު 1,000 އަށް އިތުރުކުރުމަށް ރައީސް މުހައްމަދު މުއިއްޒު ވެވަޑައިގެންނެވި ވައުދު، މި އަހަރުގެ ފުރަތަމަ ކުއާޓަރު ނިމިގެން ދިޔައިރުވެސް ނުފުއްދުނެވެ.
ނަމަވެސް މި ވައުދު ނުފުއްދުނީ ކީއްވެގެން ކަން ވެސް ސަރުކާރުން ހާމައެއް ނުކުރެ އެވެ.
މިދިޔަ އަހަރު ބޭއްވި ރައްޔިތުންގެ މަޖިލިސް ހުޅުވުމުގެ ޖަލްސާގައި ރިޔާސީ ބަޔާން އިއްވަވަމުން މުއިއްޒު ވިދާޅުވެފައިވަނީ ވެލާނާ އިންޓަނޭޝަނަލް އެއާޕޯޓުން ފުރާ ކޮންމެ ދިވެއްސަކަށް ދޫކުރާ 500 ޑޮލަރުގެ ލިމިޓް މި އަހަރުގެ އަހަރުގެ ފުރަތަމަ ކުއާޓަރުގައި 1,000 ޑޮލަރަށް އިތުރުކުރާނެ ކަމަށެވެ. ނަމަވެސް، މިއަހަރުގެ އޭޕްރިލް މަސް ފެށިގެން ދާއިރުވެސް ދޫކުރަމުންދަނީ ކުރީގެ އުސޫލުން 500 ޑޮލަރެވެ.
ރައީސް މުއިއްޒު 2025 ގެ ރިޔާސީ ބަޔާނުގައި ވައުދުވެވަޑައިގަތް މައިގަނޑު ކަންތައްތަކަކީ:
- ފުރާ މީހުންނަށް ޑޮލަރު: 500 ޑޮލަރުން 1,000 ޑޮލަރަށް ބޮޑުކުރުން (2026ގެ ފުރަތަމަ ކުއާޓަރުގައި).
- ކްރެޑިޓް ކާޑު ލިމިޓް: 750 ޑޮލަރުން 1,400 ޑޮލަރަށް ބޮޑުކުރުން (2026ގެ ދެވަނަ ކުއާޓަރުގައި).
- ވިޔަފާރިވެރިންނަށް: ޓީޓީ ހެދުމަށް ބޭންކުތަކުން ދޫކުރާ ޑޮލަރުގެ ނިސްބަތް އިތުރުކުރުން.
- ކުންފުނިތަކަށް: ސަރުކާރު ހިއްސާވާ ކުންފުނިތަކަށް ބޭނުންވާ ޑޮލަރު ކަޅު ބާޒާރަށް ނުގޮސް ސެޕްޓެމްބަރުން ފެށިގެން ހޯދޭނެ ގޮތް ހެދުން.
ފުރާ މީހުންނާއި ކްރެޑިޓު ކާޑުތަކުގެ ލިމިޓް ބޮޑުކޮށްދޭން މުއިއްޒު ވައުދުވެވަޑައުގަތީ ރިސޯޓުތަކުން ކޮންމެ ޓޫރިސްޓަކަށް 500 ޑޮލަރު (ކެޓެގަރީ އޭ) އަދި ގެސްޓްހައުސްތަކުން 25 ޑޮލަރު (ކެޓެގަރީ ބީ) މާރުކުރަން ޖެހޭ ގޮތަށް ހެދުމުން، އޭގެ ހެޔޮ ބަދަލު ފެންނާނެ ކަމަށެ ވިދާޅުވުމަށް ފަހު އެވެ. ނަމަވެސް، ޑޮލަރުގެ މި ސިޔާސަތުގެ ހެޔޮ ބަދަލެއް ނުފެނި ކަޅު ބާޒާރުގައި ޑޮލަރުގެ ރޭޓު ވަނީ 20ރ. އަށް ވުރެ މައްޗަށް އަރައިފަ އެވެ.
މީގެ އިތުރުން މުދާ އެތެރެކުރަން ޓީޓީ ހެދުމަށް ބީއެމްއެލްއިން ދެމުން ދިޔަ ޑޮލަރު ސަޕޯޓު މި މަހުގެ ނިޔަލަށް ހުއްޓާލާފައިވާ ކަމަށް ވެސް ބައެއް ކުންފުނިތަކުން ވަނީ ބުނެފަ އެވެ.
