ބޭންކް އޮފް މޯލްޑިވްސް (ބީއެމްއެލް) އަށް މި އަހަރުގެ ފުރަތަމަ ކުއާޓަރުގެ ތެރޭގައި އާމްދަނީގެ ގޮތުގައި ލިބުނު 1.2 ބިލިއަން ރުފިޔާއިން، 631 މިލިއަން ރުފިޔާ ސާފު ފައިދާގެ ގޮތުގައި ލިބިފައިވާ ކަމަށް އެ ބޭންކުން މިއަދު އާންމުކުރި ފުރަތަމަ ކުއާޓަރުގެ ރިޕޯޓުން ދައްކައިފި އެވެ.
ބީއެމްއެލްގެ ކުއާޓަލީ ރިޕޯޓުގައިވާ ގޮތުގައި، އެ ބޭންކަށް ނިމުނު ކުއާޓަރުގައި ސާފު ފައިދާގެ ގޮތުގައި ލިބުނު އަދަދަކީ މިދިޔަ އަހަރުގެ ފުރަތަމަ ކުއާޓަރާ އަޅާބަލާއިރު، 27 ޕަސެންޓުގެ ކުރިއެރުމެެކެވެ.
މި ރިޕޯޓާ ގުޅިގެން ބީއެމްއެލްއިން ނެރުނު ބަޔާނުގައި ބުނީ، ބޭންކުގެ ރެކޯޑު އަހަރުގެ ދުވެލި އެ ބާރުމިނުގައި މި އަހަރު ވެސް ހިފެހެއްޓިފައިވާ ކަމަށެވެ.
ބީއެމްއެލްއަށް މިދިޔަ ކުއާޓަރުގައި އެންމެ ބޮޑު އާމްދަނީއެއް ލިބުނީ ފީ އާއި ކޮމިޝަންތަކުންނެވެ. އެ ގޮތުން ލޯނާއި ފައިނޭންސިންގެ ފައިދާއިން އާމްދަނީގެ ގޮތުގައި 796 މިލިއަން ރުފިޔާ ލިބުނުއިރު، ފީ އާއި ކޮމިޝަނުން 332 މިލިއަން ރުފިޔާ ލިބުނެވެ. އެ ބޭންކުން ބުނީ އާމްދަނީ އިތުރުވީ މައިގަނޑު ސަބަބަކީ ވެސް މިއީ ކަމަށެވެ.
ބީއެމްއެލްއިން ވަނީ މިދިޔަ ކުއާޓަރުގެ ތެރޭގައި 4.6 ބިލިއަން ރުފިޔާގެ ލޯނު ދޫކޮށްފަ އެވެ. އަދި މި މަހުގެ ފުރަތަމަ 15 ގައި ދޫކުރި ލޯނުތަކާއެކީ މި އަހަރު އެކަނި ފަސް ބިލިއަން ރުފިޔާގެ ލޯނު ދޫކޮށްފައިވަ ކަމަށް އެ ބޭންކުން ބުންޏެވެ.
އާމްދަނީ އިތުރުވީއިރު، ބީއެމްއެލްގެ ޖުމްލަ އެސެޓު 60 ބިލިއަން ރުފިޔާއިން މައްޗަށް، އަދި ކަސްޓަމަރުން ޑިޕޮސިޓުކުރި ފައިސާގެ އަދަދު ވަނީ 40 ބިލިއަން ރުފިޔާއިން މައްޗަށް ގޮސްފަ އެވެ. މިއީ ބީއެމްއެލްގެ ތާރީހުގައި އެސެޓުތަކާއި ޑިޕޮސިޓުތައް އެންމެ މަތިވީ ފަހަރެވެ.
ބޭންކުން ވަނީ ޑިޕޮސިޓު ކުރި ފައިސާގެ ތެރޭގައި ބޭރު ފައިސާގެ ޑިޕޮސިޓުތައް ބޮޑު އަދަދެއް އަދާކުރާ ކަމަށެވެ. ނަމަވެސް އެ ބޭންކުގެ ރިޕޯޓުތަކުގައި ދިވެހި ފައިސާ ޑިޕޮސިޓުތަކާއި ބޭރު ފައިސާ ޑިޕޮސިޓުތައް ވަކިން ބަޔާންކޮށްފައި ނޯންނާތީ ސީދާ އަދަދެއް ނޭނގެ އެވެ.
ބޭންކުން ވަނީ މިދިޔަ ކުއާޓަރުގެ ތެރޭގައި އާންމުންނާއި ވިޔަފާރިތަކަށް 226 މިލިއަން ޑޮލަރު ވިއްކާފަ އެވެ. އެއީ ޑޮލަރު ސަޕޯޓުގެ ގޮތުގައި ވިޔަފާރިތަކަށް ވިއްކި 106.2 މިލިއަން ޑޮލަރާއި، ކްރެޑިޓް ކާޑާއި ޑެބިޓު ކާޑުން ކުރެވުނު މުއާމަލާތްތަކަށް ވިއްކި 119.9 މިލިއަން ޑޮލަރެވެ.
މާލީ ގޮތުން ބޮޑެތި ކުރިއެރުންތަކެއް ހޯދި ނަމަވެސް ޑޮލަރު ލިބޭ މިންވަރު ދަށްވެފައިވާ ކަމަށް ބީއެމްއެލްއިން ބުންޏެވެ.
ބީއެމްއެލްއިން ބުނި ގޮތުގައި މިހެން ދިމާވީ އިރާނު ހަނގުރާމައިގެ ސަބަބުން ޓޫރިސްޓުންގެ ބުކިންތައް ކެންސަލް ވުމާއި، ޓޫރިސްޓުންގެ ހޭދަކުރާ މިންވަރު ދަށްވުމުގެ ސަބަބުންނެވެ. މިއ ގުޅިގެން ކާޑުތަކުން ލިބޭ އާމްދަނީ ތިން ބައި ކުޅަ އެއް ބައި ދަށްވެފައިވާ ކަން ފާހަގަކުރެވިފައިވާ ކަމަށް އެ ބޭންކުން ބުންނެވެ.
ޑޮލަރުގެ އިންފްލޯ ދަށްވިއިރު، މުދާ އެތެރެކުރުމަށާއި ބޭރުގެ ހިދުމަތްތަކަށް ރާއްޖޭން ބޭރަށް ފޮނުވާ ފައިސާވީ ދެ ގުނަ އިތުރެވެ. ބީއެމްއެލްއިން އަންދާޒާ ކުރަނީ ކުރިއަށް އޮތް ތަނުގައި ޑޮލަރު އަންނަ ވަރަށް ވުރެ ޑޮލަރު ބޭރަށް ފޮނުވާ ވަރު އިތުރު ވެގެންދާނެ ކަމަށެވެ. އަދި، މި ހާލަތު ދެމިގެން ގޮސްފި ނަމަ ޑޮލަރާ "ވަގުތީ ފިޔަވަޅުތަކެއް" އަޅަން ޖެހިދާނެ ކަމަށް އެ ބޭންކުން ބުންޏެވެ.
"ރާއްޖެއިން ބޭރުން އަންނަ ފައިސާ މަދުވާ މިންވަރު އިތުރުވެގެން ދާނަމަ، ނިސްބަތުން އެއާ އެއްވަރަކަށް ބޭރު ފައިސާ ވިއްކާ އަދަދަށް ވަގުތީ ގޮތުން އަޅަން ޖެހިދާނެ ފިޔަވަޅެއް މެނުވީ، ބޭންކުން މަސައްކަތް ކުރާނީ މެދުނުކެނޑި ވިޔަފާރިތަކާއި އާންމު ފަރުދުންގެ މުހިންމު ބޭނުންތަކަށް ބޭރު ފައިސާގެ އެހީތެރިކަން ފޯރުކޮށްދިނުމަށް،" ބީއެމްއެލްއިން ބުންޏެވެ.
ޑޮލަރު ތާށިވާ ހާލަތުގައި ވަގުތީ ފިޔަވަޅުތަކެއް ނޫނީ ނާޅާނެ ކަމަށް ބީއެމްއެލްއިން ބުނިއިރު، ބައެއް ވިިޔަފާރިވެރިން ވަނީ މި މަސް ނިމެންދެން ޑޮލަރު ސަޕޯޓު ނުލިބޭނެ ކަމަށް ބޭންކުން އަންގާފައިވާ ކަމަށް ބުނެފަ އެވެ. ނަމަވެސް، ބޭންކުން ނެރުނު ނޫސް ބަޔާނެއްގައި ވަނީ ވިޔަފާރިވެރިންގެ ވާހަކަތައް ދޮގުކޮށް، ޓީޓީއަށް ޑޮލަރު ސަޕޯޓު ލިބޭނެ ކަމުގެ ޔަގީންކަން ދީފަ އެވެ.
ނިމުނު ކުއާޓަރުގައި ބޭންކުގެ ބެލެންސް ޝީޓަށް އެންމެ ބޮޑު ބަދަލެއް އައީ ބޯނަސް ހިއްސާ ދޫކޮށް، ހިއްސާތައް ބައިކުރަން އެ ކުންފުނީގެ އިންވެސްޓަރު ނިންމުމާ ގުޅިގެންނެވެ. އެންމެ ފަހުން ބޭއްވި އަހަރީ އާންމު ޖަލްސާގައި ގެނައި މި ބަދަލާއެކީ، އެ ޖަލްސާގެ ކުރިން 3.6 ބިލިއަން ރުފިޔާގައި ހުރި އެ ކުންފުނީގެ މާކެޓް ކެޕިޓަލައިޒޭޝަން ވަނީ 28.2 ބިލިއަން ރުފިޔާއަށް އަރާފަ އެވެ.
