ލަންޑަން (އޭޕްރީލް 26) - އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މޮޅުވެ، އާސެނަލުން ލީގުގެ އެއް ވަނަ އަށް ޖެހިލިއިރު، ލިވަޕޫލުން ލީގުގެ ހަތަރު ވަނަ އަށް އަރައިފި އެވެ.
އާސެނަލުން 1-0 އިން ނިއުކާސަލް ޔުނައިޓެޑް ބަލިކުރިއިރު، ލިވަޕޫލުން ހަތަރު އަހަރަށް ފަހު ކްރިސްޓަލް ޕެލަސް އަތުން ވަނީ އަމިއްލަ ދަނޑުގައި ލީގުގައި 3-1 އިން މޮޅުވެފަ އެވެ.
ލީގުގައި އެންމެ ފަހުން ކުޅުނު ދެ މެޗުން ބަލިވި އާސެނަލުން ރޭގެ މޮޅަށް ފަހު، އެއް ވަނައިގައި އޮތީ 34 މެޗުން 73 ޕޮއިންޓް ހޯދައިގެންނެވެ. ދެ ވަނައިގައި އޮތް މެންޗެސްޓާ ސިޓީ އަށް 33 މެޗުން 70 ޕޮއިންޓް ލިބިފައިވާއިރު، ތިން ވަނައިގައި މެންޗެސްޓާ ޔުނައިޓެޑް އޮތީ 33 މެޗުން 58 ޕޮއިންޓާ އެކު އެވެ. ހަތަރެއްގައި އޮތް ލިވަޕޫލާއި ފަސް ވަނައިގައި އޮތް އެސްޓަން ވިލާ އަށް 34 މެޗުން ވަނީ 58 ޕޮއިންޓް ލިބިފަ އެވެ. އެސްޓަން ވިލާ ވަނީ ރޭ 1-0 އިން ފުލަމް އަތުން ބަލިވެފަ އެވެ.
އެމިރޭޓްސް ސްޓޭޑިއަމްގައި ރޭ އާސެނަލް މޮޅުވި މެޗުގައި ނިއުކާސަލް ކޮޅަށް ހަމައެކަނި ލަނޑު ޖެހީ އެބެރެޗީ އެޒޭ އެވެ. މެޗުގެ ނުވަ ވަނަ މިނިޓްގައި އެޒޭ މި ލަނޑު ޖެހީ ކޯނަރެއްގައި، އަވަސް ކުޅުމަކަށް ފަހު، ކައި ހަޗާޓްޒް ދިން ބޯޅައެއް ގޯލުގެ މަތީ ކަަނަށް ފޮނުވާލައިގެންނެވެ. މެޗުގެ ދެ ވަނަ ހާފުގައި ނިއުކާސަލަށް އެއްވަރުކޮށްދޭން ޔޮއާން ވިއްސާ އަށް ލިބުނު ފުރުސަތުގެ ބޭނުމެއް ނުހިފުނެވެ.
ލިވަޕޫލުން ރޭ ފުރަތަަަމަ ހާފުގައި ދެ ގޯލުގެ ލީޑެއް ނެގި އެވެ. ލަނޑުތައް ޖެހީ އަލެކްސަންޑަ އިސާކް އާއި އެންޑީ ރޮބަޓްސަން އެވެ. ލިވަޕޫލްގެ ކީޕަރު ފްރެޑީ ވުޑްމަން އަނިޔާވެގެން ވެއްޓިފައި އޮތް ވަގުތެއްގައި ގޯލަށް ބޯޅަ ފޮނުވާލައިގެން، ޕެލަސްގެ ޑެނިއަލް މުނޯޒް އެ ޓީމުގެ. ލަނޑު ޖެހިއިރު، އިތުރު ވަގުތުގެ ހަ ވަނަ މިނިޓްގައި ލިވަޕޫލްގެ ތިން ވަނަ ލަނޑު ޖެހީ ފްލޯރިއަން ވާޓްޒް އެވެ. މި ނަތީޖާއާ އެކު، ލިވަޕޫލުން ވަނީ 2021 ވަނަ އަހަރުގެ ފަހުން ލީގުގައި އަމިއްލަ ދަނޑުގައި ޕެލަސް އަތުން މޮޅެއް ހޯދައިފަ އެވެ. އަދި، މިއީ، މި ސީޒަނުގައި ޕެލަސްއާ ދެކޮޅަށް ކުޅުނު ހަތަރު މެޗުގެ ތެރެއިން ލިވަޕޫލަށް މޮޅެއް ހޯދުނު ފުރަތަމަ ފަހަރެވެ.
ލީގުގައި ރޭ ޓޮޓެންހަމް ހޮޓްސްޕާސް އިން ވަނީ ރެލިގޭޓްވެފައި އޮތް ވުލްވްސް އަތުން 1-0 އިން ކުރިހޯދައި، 2026 ވަނަ އަހަރު ލީގުަގައި ފުރަތަމަ މޮޅު ހޯދައިފަ އެވެ. ޓޮޓެންހަމް އިން 118 ދުވަސް ތެރޭ ފުރަތަމަ ލީގު މެޗުން މޮޅުވިއިރު، އެ ޓީމަށް ރެލިގޭޝަނުން ނުނިކުމެވުނެވެ. އެއީ، ވެސްޓް ހޭމް ޔުނައިޓެޑުން އަމިއްލަ ދަނޑުގައި ކުޅުނު މެޗުގެ އިތުރު ވަގުތުގައި ލަނޑު ޖަހައި، 2-1 އިން އެވަޓަން ބަލިކުރުމުންނެވެ.
ލީގުގެ 18 ވަނައިގައި އޮތް ޓޮޓެންހަމް އަށް 34 މެޗުން 34 ޕޮއިންޓް ލިބިފައިވާއިރު، ލީގުގެ 17 ވަނައިގައި ވެސްޓް ހޭމް އޮތީ 34 މެޗުން 36 ޕޮއިންޓާ އެކު އެވެ.
