ލަންޑަން (އޭޕްރީލް 25) - އިނގިރޭސި ޕްރިމިއާ ލީގުގައި ރޭ ރަށުންބޭރުގައި ސަންޑަލެންޑް އަތުން 5-0 އިން މޮޅުވެ، ނޮޓިންހަމް ފޮރެސްޓުން، ލީގުގެ ރެލިގޭޝަނުން ސަލާމަތްވުމަށް ބޮޑު ފިޔަވަޅެއް ކުރިއަށް އެޅިއިރު، ޓޮޓެންހަމް ހޮޓްސްޕާސް އަށް ޕްރެޝަރު ބޮޑުވެއްޖެ އެވެ.
ރޭގެ މޮޅާ އެކު، ލީގުގެ 16 ވަނައިގައި އޮތް ފޮރެސްޓުން ވަނީ 34 މެޗުން 39 ޕޮއިންޓް ހޯދައިފަ އެވެ. އިނގިރޭސި ޕްރިމިއާ ލީގުގައި 2011 ވަނަ އަހަރުގެ ފަހުން، 39 ޕޮއިންޓް ނޫނީ އެއް އަށް ވުރެން ގިނަ ޕޮއިންޓް ހޯދި ޓިމެއް ރެލިގޭޓްވެފައި ނެތެވެ. ލީގުގެ 17 ވަނައިގައި އޮތް ވެސްޓް ހޭމް ޔުނައިޓެޑަށް 33 މެޗުން 33 ޕޮއިންޓް ލިބިފައިވާއިރު، ރެލިގޭޝަން ޒޯނުގައި، 18 ވަނައިގައި އޮތް ޓޮޓެންހަމް އަށް 33 މެޗުން ލިބުނީ 31 ޕޮއިންޓެވެ.
ލީގުގައި މިރޭ ޓޮޓެންހަމް އިން ރަށުންބޭރުގައި ކުޅޭނީ ރެލިގޭޓްވެފައި އޮތް ވުލްވްސްއާ ދެކޮޅަށެވެ. އަދި، ވެސްޓް ހޭމް އިން އަމިއްލަ ދަނޑުގައި އެވަޓަންއާ ބައްދަލުކުރާނެ އެވެ.
ސަންޑަލެންޑްގެ ސްޓޭޑިއަމް އޮފް ލައިޓްގައި ރޭ ކުޅުނު މެޗުގައި ފޮރެސްޓްގެ ފަރާތުން ވަނީ މޮޅު ކުޅުމެއް ފެނިގެންގޮސްފަ އެވެ. އަދި، އެ ޓީމުން ވަނީ ފުރަތަމަ ހާފުގައި ހަތަރު ގޯލުގެ ލީޑެއް ނަގައިފަ އެވެ. މެޗުގެ 17 ވަނަ މިނިޓްގައި ފޮރެސްޓުން ލީޑުނެގި ލަނޑަކީ، ސަންޑަލެންޑްގެ ޓްރައި ހިއުމް އަތުން ބައިކޮޅަށް ވަން ގޯލެކެވެ، މިއީ، ފޮރެސްޓްގެ ފޯވާޑް، އީގޯ ޖީސޫސް ބޮލުން ޖެހި ބޯޅައެއް ދިފާއުކުރަން އުޅުމުގެ ތެރޭގައި ހިއުމް އަތުން ބައިކޮޅަށް ވަން ގޯލެކެެވެ.
ފުރަތަމަ ހާފުގެ ފަހުކޮޅުގައި ހަތް މިނިޓް ތެރޭ ފޮރެސްޓުން ތިން ލަނޑު ޖެހި އެވެ. ކްރިސް ވުޑް، މެޗުގެ 31 ވަނަ މިނިޓްގައި ފޮރެސްޓްގެ ދެ ވަނަ ލަނޑު ޖެހިއިރު، މޯގަން ގިބްސް ވައިޓް އާއި ޖީސޫސް ވަނީ އަނެއް ދެ ލަނޑު ޖަހައިފަ އެވެ. އަދި، މެޗުގެ އިތުރު ވަގުތުގެ ތެރޭގައި، އެލިއަޓް އެންޑަސަން ވަނީ ފޮރެސްޓްގެ ފަަސް ވަނަ ލަނޑު ޖަހައިފަ އެވެ.
މި ނަތީޖާއާ އެކު، ސަންޑަލެންޑް ލީގުގެ 11 ވަނައިގައި އޮތީ 34 މެޗުން 46 ޕޮއިންޓާ އެކު އެވެ. އަންނަ ސީޒަނުގައި ޔޫރަޕްގެ މުބާރާތެއްގައި ކުޅުމަށްޓަކައި، މަސައްކަތްކުރަމުން އައި ސަންޑަލެންޑަށް ރޭގެ ނަތީޖާ އަކީ ފަހަތަށް އެޅުނު ފިޔަވަޅެކެވެ.
