ނިއު ޔޯކް، ޔުނައިޓެޑް ސްޓޭޓްސް (މެއި 1) - އިނގިރޭސި ޕްރިމިއާ ލީގުގެ ރެލިގޭޝަން ޒޯނުގައި ޓޮޓެންހަމް ހޮޓްސްޕާސް އޮތް ހާލަތާ މެދު ވިސްނޭ ކަމަށާއި އެކަމާ ދެރަވާ ކަމަށް އެ ޓީމުގެ ކުރީގެ ކޯޗު، އަދި މިހާރު އެމެރިކާގެ ގައުމީ ފުޓްބޯޅަ ޓީމާ ހަވާލުވެހުރި، އާޖެންޓީނާގެ މައުރީސިއޯ ޕޮޗެޓީނޯ ބުނެފި އެވެ.
ޕޮޗެޓިނޯ އަކީ މިދިޔަ 20 ވަރަކަށް އަހަރަށް ބަލާއިރު، ޓޮޓެންހަމް އަށް އެންމެ ދިގު މުއްދަތެއްގައި އިރުޝާދުދިން ކޯޗެވެ. އެ ގޮތުން، ޕޮޗެޓީނޯ ވަނީ 2014 އިން 2019 ވަނަ އަހަރުގެ ނިޔަލަށް ޓޮޓެންހަމަށް ކޯޗުކޮށްދީފަ އެވެ. އަދި، އެ ޓީމު 2019 ވަނަ އަހަރުގެ ޗެމްޕިއަންސް ލީގު ފައިނަލަށް ގެންގޮސްދިން ޕޮޗެޓީނޯ އަށް އެ ޓީމުގެ ކޯޗުކަން ގެއްލުނީ ޖެހިގެން އައި ސީޒަނުގަ އެވެ.
އިނގިރޭސި ޕްރިމިއާ ލީގުގެ މި ސީޒަނުގައި، ޓޮޓެންހަމަށް ބާކީ ހަތަރު މެޗު އޮތްއިރު، އެ ޓީމު ލީގުގެ 18 ވަނައިގައި އޮތީ ރެލިގޭޝަނުން ސަލާމަތްވާން ބޮޑު މަސައްކަތްތަކެއްކުރަން ޖެހިފަ އެވެ. އެ ގޮތުން، މި ވަގުތު ލީގުގެ 17 ވަނައިގައި އޮތް ވެސްޓް ހޭމް ޔުނައިޓެޑަށް ވުރެން ޓޮޓެންހަމް އަށް ދެ ޕޮއިންޓް މަދެވެ.
"އަހަރެން ވަރަށް ލޯބިވާ ޓީމެއް ޓޮޓެންހަމަކީ. އެއީ އަހަރެންގެ ދިރިއުޅުމުގެ ބޮޑު ބައެއް. ކޯޗެއްގެ ގޮތުގައި އަހަރެންގެ ވަރަށް ހާއްސަ މަސައްކަތްތަކެއް ކުރެވުނު ތަނެއް. އަދި، ޒާތީ ދިރިއުޅުމުގައި މުހިންމު ކަންތަައްތަކެއް ވެސް ހިނގި އަހަރުތަކެއް ހޭދަކުރި ކްލަބެއް،" ޕޮޗެޓީނޯ ބުންޏެވެ.
"މި ހުރިހާ ކަމަކަށް ވިސްނާއިރު، ޓޮޓެންހަމްގެ މީހުން މިހާރު އެ ތަޖުރިބާ ކުރަން ޖެހޭ ކަންކަމާ މެދު އަހަންނަށް ވެސް ވިސްނޭ، އެކަމާ ދެރަވެސް ވޭ. ސަޕޯޓަރުން ދެރަވާނެވަރު އަދި ކްލަބްގެ އެހެން މީހުންނަށް އަސަރުކުރާނެ މިންވަރު ވެސް ވިސްނޭ. ގަބޫލުކުރަން ވެސް ދަތި ކަންތައްތަކެއް މި ވަގުުތު އެ ކްލަބަށް ކުރިމަތިވެފައި އެ އޮތީ،"
ޓޮޓެންހަމް ދޫކޮށްލުމަށް ފަހު، ދެން، ޕޮޗެޓީނޯ ފެނުނީ ފްރާންސްގެ ޗެމްޕިއަން، ޕީއެސްޖީންނެވެ. ޕީއެސްޖީ އަކީ ޕޮޗެޓީނޯ ކުޅުމުގެ ކެރިއަރުަގައި ވެސް ފެނުނު ކްލަބެކެވެ. އޭގެ ފަހުން، އިނގިރޭސި ޕްރިމިއާ ލީގުގެ ޗެލްސީ އަށް ވެސް ކޯޗުކޮށްދިން ޕޮޗެޓީނޯ، މިހާރު ހަވާލުވެހުރި އެމެރިކާގެ ޓީމަށް އައީ މީގެ ދެ އަހަރު ކުރިންނެވެ. އޭނާ މިހާރު ތައްޔާރުވަމުން އަންނަނީ، އެމެރިކާގައި އަންނަ މަހު ފަށާ ވޯލްޑް ކަޕަށެވެ.
އެމެރިކާ ޓީމަށް ފަހު، ޕޮޗެޓީނޯ އަލުން ޓޮޓެންހަމް ކޯޗަކަށް ދާނެ ކަމަށް މީޑިއާގައި ގިނަ ވާހަކަތަކެއް ދެކެވެ އެވެ. ޕޮޗެޓީނޯ ވެސް ވަނީ ކޮންމެ ވެސް ދުވަހަކުން އަލުން ޓޮޓެންހަމްގައި މަސައްކަތް ކުރުމުގެ ޝައުގުވެރިކަން ހުރި ކަމަށް ބުނެފަ އެވެ.
ޓޮޓެންހަމް އިން މި ސީޒަން ފެށީ ކޯޗު ތޯމަސް ފްރޭންކްއާ އެކު އެވެ. އޭނާ ވަކިކޮށް، ދެން ގެނައި، އީގޯ ޓޫޑޯ ވެސް ވަނީ މަގާމުން ދުރުކޮށްފަ އެވެ. އެންމެ ފަހުން އެ ޓީމާ ހަވާލުވި، ރޮބާޓޯ ޑި ޒާބީގެ ކޯޗުކަމުގައި ޓޮޓެންހަމް އިން މިދިޔަ ހަފްތާގައި ވަނީ ވުލްވްސް ބަލިކޮށް، 2026 ވަނަ އަހަރު ފެށި ފަހުން ލީގުގައި ފުރަތަމަ މޮޅު ހޯދައިފަ އެވެ.
ލީގުގައި ޓޮޓެންހަމް އިން ދެން އެންމެ އަވަހަށް ކުޅޭ މެޗުގައި، އާދިއްތަ ދުވަހު ނުކުންނާނީ އެސްޓަން ވިލާއާ ދެކޮޅަށެވެ.
