ލިވަޕޫލް (އޭޕްރީލް 15) - ޔުއެފާ ޗެމްޕިއަންސް ލީގުގެ އެންމެ ފަހުގެ ޗެމްޕިއަން، ޕީއެސްޖީން ޖެހިޖެހިގެން ދެ ވަަަނަ ސީޒަނުގެ މުބާރާތުން ލިވަޕޫލް ކަޓުވާލައިފި އެވެ.
މި ފަހަރުގެ މުބާރާތުގެ ކުއާޓާ ފައިނަލުގެ ދެ ލެގުން ވެސް ޕީއެސްޖީ ވަނީ ލިވަޕޫލް ބަލިކޮށްފި އެވެ. މިދިޔަ ހަފްތާގައި ޕީއެސްޖީ ދަނޑުގައި ކުޅުނު މެޗުގައި، 2-0 އިން އެ ޓީމުން ލިވަޕޫލް ބަލިކުރިއިރު، އެ ނަތީޖާ ރޭ ލިވަޕޫލް ދަނޑުގައި ވެސް ތަކުރާރުކޮށް 4-0 ގެ އެގްރިގޭޓުން ވަނީ މޮޅުވެފަ އެވެ.
މިދިޔަ އަހަރުގެ ޗެމްޕިއަންސް ލީގުގެ ގަދަ 16 ބުރުގައި ޕީއެސްޖީ ދަނޑުގައި ލިވަޕޫލުން 1-0 އިން މޮޅުވިއިރު، ލިވަޕޫލް ދަނޑުގައި 1-0 އިން ޕީއެސްޖީ މޮޅުވެ، ކުއާޓާ ފައިނަލަށް ދިޔަ ޓީމެއް ކަނޑައެޅީ ޕެނަލްޓީ ޖަހައިގެންނެވެ. އެކަމަކު، މި ފަހަރު ޕީއެސްޖީން ދެ ލެގުގައި ވެސް ކޮންޓްރޯލް ނަގައިގެން ކުޅެ ލިވަޕޫލް ބަލިކުރީ އެވެ.
ލިވަޕޫލްގެ އެންފީލްޑް ސްޓޭޑިއަމްގައި ރޭ ކުޅުނު މެޗަށް އެ ޓީމުން ނުކުތީ ޕީއެސްޖީ ދަނޑުގައި ކުޅުނު ލެގޭ ވެސް އެއްގޮތަށް މުހައްމަދު ސަލާހު ބެންޗުގައި ބައިންދައިގެންނެވެ. ޕީއެސްޖީ ދަނޑުގައި ކުޅުނު މެޗުގައި ސަލާހަށް އެންމެ މިނިޓެއް ވެސް ކުޅުމުގެ ފުރުސަތު ނުދިންއިރު، ރޭގެ މެޗުގެ 31 ވަނަ މިނިޓްގައި ހޫގޯ އެކިޓީކޭ އަށް ލިބުނު އަނިޔާއަކާ ހެދި ބަދަލުގައި ސަލާހު އެރުވި އެވެ. ނޮވެމްބަރު މަހުން ފެށިގެން ފުރަތަމަ ފަހަރަށް ލިވަޕޫލްގެ ފުރަތަމަ އެގާރައިން ފުރުސަތު ދިން އަލެކްސަންޑަ އިސާކަށް ރޭގެ މެޗުގެ ފުރަތަމަ ހާފުގައި ކުޅުނުއިރު، ބޯޅައިގައި ފައިޖައްސާލެވުނީ ފަސް ފަަހަރު އެވެ.
ރޭގެ މެޗުގެ ފުރަތަމަ ހާފުގައި ލިވަޕޫލުން ސަލާހު އެރި ފަހުން ފުރަތަމަ އެޓޭކްކުރިއިރު، މިލޯސް ކާކޭޒްގެ ޝޮޓް، ޕީއެސްޖީގެ ކީޕަރު މަޓްވޭއި ސަފޯނޯވް ވަނީ މަތަކޮށްފަ އެވެ. އަދި، ރީބައުންސަކުން ވާޖިލް ވެން ޑައިކް ޖެހި ބޯޅަ ޕީއެސްޖީގެ ކެޕްޓަން، މާކީނިއޯސް ވަނީ ބްލޮކްކޮށްފަ އެވެ.
ޕީއެސްޖީން ފުރަތަމަ ހާފުގައި އޮސްމާން ޑެމްބެލޭ ފޮނުވާލި ބޯޅައެއް ހުރަސް ދަނޑިމަތިން ދިޔައިރު، އޭރިއާބޭރުން ޖެހި ޝޮޓެއް ލިވަޕޫލްގެ ޖޯޖިއާ ކީޕަރު، ޖިއޯޖީ މަމަޑާޝްވިލީ ވަނީ މަތަކޮށްފަ އެވެ.
މިދިޔަ ސީޒަނެކޭ އެއްގޮތަށް ޕީއެސްޖީ އަށް ރޭގެ މެޗުގައި ވެސް ލިވަޕޫލް ކޮޅަށް ލަނޑު ޖަހައިދިނީ ޑެމްބެލޭ އެވެ. މެޗުގެ 72 ވަނަ މިނިޓްގައި ކްވިޗާ ކްވަރަޝްކޭލިއާ ދިން ބޯޅައެއް ކޮންޓްރޯލް ކުރުމަށް ފަހު، އޭރިއާބޭރުން ޑެމްބެލޭ ފޮނުވާލި ބޯޅަ އަމާޒުވީ ގޯލުގެ ތިރީ ކަނަށެވެ. އޭގެ ކުރިން، ލިވަޕޫލްގެ 17 އަހަރުގެ ފޯވާޑް، ރިއޯ އެންގުމޯހާ ތިރިތިރިން ފޮނުވާލި ބޯޅައެއް ކީޕަރު، ސަފޯނޯވް މަތަކުރި އެވެ.
އިތުރު ވަގުތުގެ ފުރަތަމަ މިނިޓްގައި، ޕީއެސްޖީގެ ދެ ވަނަ ލަނޑު ޖެހީ ބްރެޑްލީ ބާކޮލާ ދިން ބޯޅައަކުން ޑެމްބެލޭ އެވެ. ހުސްކޮށް އަރައި، ޑެމްބެލޭ ވަނީ ހަަމަޖެހިލައިފައި ގޯލަށް ބޯޅަ ފޮނުވާލައިފަ އެވެ.
ރޭގެ ނަތީޖާއާ އެކު، ހަ ފަހަރު ޗެމްޕިއަންސް ލީގުގެ ޗެމްޕިއަންކަން ހޯދި ލިވަޕޫލުން ވަނީ ދަށް ރެކޯޑަކާ ހަމަކޮށްފަ އެވެ. މިއީ، ޗެމްޕިއަންސް ލީގުގެ އެއް ސީޒަނެއްގައި ލިވަޕޫލުން ފަސް މެޗުން ބަލިވި ފުރަތަމަ ފަހަރެވެ.
ޗެމްޕިއަންސް ލީގުގެ ސެމީ ފަައިނަލުގައި ޕީއެސްޖީ ކުޅެން ޖެހޭ ޓީމެއް އެނގޭނީ ރެއާލް މެޑްރިޑާއި ބަޔާން މިއުނިކް ކުޅޭ މެޗުންނެވެ. ފުރަތަަމަ ލެގުގައި ރެއާލް ދަނޑުގައި ބަޔާން މޮޅުވީ 2-1 އިންނެވެ.
