ޕެރިސް (އޭޕްރީލް 9) - ޔުއެފާ ޗެމްޕިއަންސް ލީގުގެ ކުއާޓާ ފައިނަލުގައި ރޭ ކުޅުނު މެޗުތަކުން ޕީއެސްޖީން 2-0 އިން ލިވަޕޫލް ބަލިކުރިއިރު، ރަށުންބޭރުގައި ބާސެލޯނާ އަތުން 2-0 އިން މޮޅުވެ، އެތުލެޓިކޯ މެޑްރިޑުން ކޮންޓްރޯލް ނަގައިފި އެވެ.
މި ނަތީޖާތަކާ އެކު، އަންނަ ހަފްތާގައި ކުޅޭ ދެ ވަނަ ލެގުގެ މެޗުތަކުން އެއްވަރުކޮށްލައިގެން ނޫނީ، އެއް ގޯލުގެ ފަރަގުން ބަލިވެގެން ވެސް އެތުލެޓިކޯ އާއި ޕީއެސްޖީ އަށް ސެމީ ފައިނަލަށް ދަތުރުކުރެވޭނެ އެެވެ.
މުހައްމަދު ސަލާހަށް ރޭގެ މެޗުގައި ލިވަޕޫލްގެ ކޯޗު އާނާ ސްލޮޓް، އެއްވެސް ވަރަކަށް ކުޅުމުގެ ފުރުސަތު ނުދިންއިރު، ލިވަޕޫލުން މެޗު ނިންމާލީ ޕީއެސްޖީގެ ގޯލަށް ހަމަލާއެއް ވެސް ފޮނުވާނުލަ އެވެ. މިއީ، 2019 ވަނަ އަހަރުގެ ފަހުން، ޗެމްޕިއަންސް ލީގުގެ މެޗެއްގައި، ގޯލާ އަމާޒުކޮށް ހަމަލާއެއް ފޮނުވާނުލެވި، ލިވަޕޫލުން ނިންމާލި ފުރަތަމަ މެޗެވެ. އަނެއްކޮޅުން، ރޭގެ ނަތީޖާއާ އެކު، 2012 ވަނަ އަހަރުގެ ފަހުން ފުރަތަމަ ފަހަރަށް ލިވަޕޫލް ވަނީ ރަށުންބޭރުގައި ޖެހިޖެހިގެން ހަތަރު މެޗުން ބަލިވެފަ އެވެ.
ޕީއެސްޖީގެ ދަނޑުގައި ރޭ އެ ޓީމުން ލިވަޕޫލް ކައިރީގައި ލީޑުނެގީ، 11 ވަނަ މިނިޓްގައި ޑެޒެއާ ޑޫއޭ ޖެހި ގޯލަކުންނެވެ. އޭރިއާތެރެއިން ޑޫއޭ ޖެހި ބޯޅަ ގޯލަށް ވަނީ ލިވަޕޫލްގެ ކުޅުންތެރިއަކު ފައިގައި ޖެހިފައި، އެ ޓީމުގެ ގޯލްކީޕަރު، ޖިއޯޖީ މަމަޑާޝްވިލީ އަތް މަތިން ގޮހެވެ. އެކަމަކު، ފުރަތަމަ ހާފުގައި ޕީއެސްޖީން ފޮނުވާލި ރަނގަޅު ހަމަލާތަކެއް މަމަޑާޝްވިލީ ވަނީ މަތަކޮށްފަ އެވެ. އެ ގޮތުން، ޕީއެސްޖީގެ ކްވިޗާ ކްވަރަޝްކޭލިއާ އާއި ޑޫއޭގެ ޝޮޓްތައް ކީޕަރު، މަމަޑާޝްވިލީ ވަނީ ހުއްޓުވައިފަ އެވެ.
މެޗުގައި ޕީއެސްޖީން ޖެހި ދެ ވަނަ ލަނޑު ކާމިޔާބުކުރީ، 65 ވަނަ މިނިޓްގައި ކަވަރަޝްކޭލިއާ އެވެ. މިއީ، ޖޯއާއޯ ނެވޭސް ދިން ބޯޅައެއް، އޭރިއާތެރެއިން ކޮންޓްރޯލް ކުރުމަށް ފަހު، ކީޕަރު މަމަޑާޝްވިލީ ކައިރިން ނައްޓައިފައި ޖެހި ގޯލެކެވެ. އިތުރު ގޯލެެއް ޖަހަން ޕީއެސްޖީން ކުރި މަސަައްކަތުގައި އަޝްރަފް ހަކީމީ އާއި އޮސްމާން ޑެމްބެލޭ އަށް ވެސް ހުސް ފުރުސަތުތަކެއް ލިބިގެންދިޔަ އެވެ. އެކަމަކު، އޭގެއިން އެއް ބޯޅަ ވެސް ގޯލަށް ވައްދައިނުލެވުނެވެ.
އަމިއްލަ ދަނޑުގައި އެތުލެޓިކޯ މެޑްރިޑް އަތުން ބާސެލޯނާ ބަލިވި މެޗުގެ ބޮޑުބައި ކުޅެން ޖެހުނީ އެއް ކުޅުންތެރިއަކު މަދުކޮށެވެ. އެއީ، 44 ވަނަ މިނިޓްގައި، އެތުލެޓިކޯގެ ޖޫލިއަން އަލްވަރޭޒް އަށް ފަހަތުގައި ހުރެފައި ކުރި ފައުލަަކަށް ބާސެލޯނާގެ ޒުވާން ޑިފެންޑަރު، ޕައު ކުބަރްސީ އަށް ރަތެއް ދެއްކުމުންނެވެ. އެކަމަކު، އެ ފައުލަށް ދިން ހިލޭ ޖެހުމުން، އަލްވަރޭޒް ކާމިޔާބުކުރި ގޯލުން އެތުލެޓިކޯ އިން ފުރަތަަމަ ހާފުގައި ލީޑުނެގި އެވެ.
ދެ ވަނަ ހާފުގައި ބާސެލޯނާ އިން ކުޅުންތެރިއަކު މަދުކޮށް ވެސް ރަނގަޅު ކުޅުމެއް ދެއްކި އެވެ. އަދި، ނަތީޖާ ހަމަހަމަކުރުމާ ގާތަށް ވެސް ޖެހިލި އެވެ. އެ ގޮތުން، ހިލޭޖެހުމަކުން، ބާސެލޯނާގެ މާކަސް ރެޝްފޯޑް ޖެހި ބޯޅަ އެތުލެޓިކޯގެ ކީޕަރު، މޫސޯ ވަނީ މަތަކޮށްފަ އެވެ. ބާސެލޯނާގެ ލަމީން ޔަމާލް މި މެޗުގައި ރަނގަޅު ކުޅުމެއް ދައްކައި، ގޯލެއް ޖަހަން ފުރުސަތުތަކެއް ހޯދައިިދިން ނަމަވެސް ގޯލެއް ޖެހޭގޮތެއްނުވި އެވެ.
އެތުލެޓިކޯ އަށް 2006 ވަަނަ އަހަރުގެ ފަހުން ބާސެލޯނާ ދަނޑުގައި ފުރަތަމަ މޮޅު ކަށަވަރުކޮށްދިން ލަނޑު ޖެހީ، ނޯވޭގެ ފޯވާޑް، އަލެކްސަންޑަ ސޯލޯތު އެވެ. މިއީ، އޭރިއާތެރެއަށް އެތުލެޓިކޯގެ މަޓެއޯ ރުގޭރީ ނެގި ބޯޅައަކުން ސޯލޯތު ޖެހި ގޯލެކެވެ.
މިއީ، 10 ވަރަކަށް ދުވަސް ތެރޭ އެތުލެޓިކޯ އާއި ބާސެލޯނާ އިން ކުޅޭ ތިން މެޗުގެ ތެރެއިން ދެ ވަނަ މެޗެެވެ. ލަލީގާގައި މި ދެ ޓީމު ކުޅުނު މެޗުން އެތުލެޓިކޯ ވަނީ އަމިއްލަ ދަނޑުގައި ބަލިވެފަ އެވެ. އެކަމަކު، ޗެމްޕިއަންސް ލީގުގައި ބާސެލޯނާ އަތުން އެތުލެޓިކޯ މި ވަނީ މޮޅުވެފަ އެވެ.
