ބެންގަލޫރު, އިންޑިއާ (އޭޕްރީލް 16) - އެއްކޮށް ފިޓް ނޫން ކަމުގައި ވިޔަސް ޓީމަށް ފައިދާ ހުރި ކުޅުމެއް ދެއްކޭތީ ހިތްހަމަޖެހޭ ކަމަށް ރޯޔަލް ޗެލެންޖާސް ބެންގަލޫރު (އާރްސީބީ)ގެ ތަރި، ވިރާތު ކޯލީ ބުނެފި އެވެ.
އުމުރުން 37 އަހަރުގެ ވިރާތުގެ މޮޅު ކުޅުމާ އެކު، ރޭ އާރްސީބީން ފަސް ވިކެޓުން ލަކްނައު ސުޕަ ޖަޔަންޓްސް ބަލިކޮށް އިންޑިއަން ޕްރިިމިއާ ލީގުގެ އެއް ވަނަ އަށް ވަނީ ޖެހިލައިފި އެވެ. އާރްސީބީ އެއް ވަނައިގައި އޮތީ ދެ ވަނައިގައި އޮތް ރާޖަސްތާން ރޯޔަލްސްއާ އެއްވަރަށް ފަސް މެޗުން އަށް ޕޮއިންޓް ހޯދައިގެންނެވެ.
ބެންގަލޫރުގެ ޗިންނަސްވާމީ ސްޓޭޑިއަމްގައި ރޭ ކުޅުނު މެޗުގައި ގުރުއަތުލުން ދިމާވުމުން ބެންގަލޫރުން ސްޓްރެޓަޖީ ބަދަލުކޮށް، އެރީ ހޮވާށެވެ. ލަކްނައު އިން ކުޅެން އަރައި، 20 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 146 ލަނޑެވެ. ޖަވާބުގައި ކުޅެން އަރައި، ބެންގަލޫރުން 15.1 އޯވަރުގެ ތެރޭގައި ފަސް ކުޅުންތެރިން ނުބައިވެގެން 149 ލަނޑު ހަދައި މެޗުން މޮޅުވި އެވެ. އެންމެ ރަނގަޅު ކުޅުމެއް ދެއްކީ، 34 ބޯޅައިން 49 ލަނޑަށް ނުބައިވި ވިރާތު އެވެ.
މެޗަށް ފަހު ވިރާތު ބުނީ، އަދިވެސް އޭނާ ހުރީ 100 ޕަސެންޓް ފިޓްކޮށް ނޫން ކަމަށެވެ. އެކަމަކު، މަޑުމަޑުން މެޗަކަށް ފަހު މެޗެއް ރަނގަޅުކުރަމުން އައިސް ބޭނުންވާ ލެވަލްގައި ކޮންމެ ވެސް ވަރަކަށް ކުޅެވޭތީ އެ ހިތްހަމަޖެހުން އެބައޮތް ކަމަށް ވިރާތު ވަނީ ބުނެފަ އެވެ.
"ބަލި ހާލަތު ރަނގަޅު ނޫން ކޮށް ހަތަރެއް ނޫނީ ފަސް ވަރަކަށް ދުވަސް ގޮސްފި، ކަކުލުގައި ވެސް ތަދެއް އެބަހުރި، އެކަމަކު، މި ހުރިހާ ކަމަކަށް ވުރެން އަހަރެން ބޭނުންވާ ކަމަކީ ޓީމު ކުރިއަށްދާން އެހީވުން، އެކަން އެބަކުރެވޭ. އުންމީދަކީ މި ފޯމުގައި ކުރިއަށްދިއުން،" ވިރާތު ބުންޏެވެ.
ފުރަތަަމަ އިނިންގްސްގައި ބެންގަލޫރުގެ ރާސިކް ދަރު ވަނީ ހަތަރު އޯވަރަށް ހަތަރު ވިކެޓް ނަގައިފަ އެވެ. އަދި، ބުވްނޭޝްވަރު ކުމާރު ވަނީ ހަތަރު އޯވަރަށް ތިން ވިކެޓް ނަގައިފަ އެވެ.
އައިޕީއެލްގައި މިރޭ ކުޅޭ މެޗުގައި މުމްބައި އިންޑިއަންސް (އެމްއައި) އިން ކުޅޭނީ ޕަންޖާބް ކިންގްސްއާ އެވެ.
