ބާލިން (މެއި 2) - ޖަރުމަނު ބުންޑަސްލީގާގައި މިރޭ ކުޅުނު މެޗުގައި ލީގު ތާވަލުގެ އެންމެ ފުލުގައި އޮތް ހެއިޑެންހައިމް އަތުން މެޗުގެ 100 ވަނަ މިނިޓްގައި ބައިކޮޅަށް ވަން ގޯލާ އެކު، އެ ޓީމާ 3-3 އިން އެއްވަރުކޮށް، ޗެމްޕިއަން ބަޔާން މިއުނިކް ބަލިނުވެ ސަލާމަތްވެއްޖެ އެވެ.
ބާކީ ހަތަރު މެޗު އޮއްވައި ލީގު ޗެމްޕިއަންކަން ޔަގީންވި ފަހުން ބަޔާނުން ލީގުގައި ކުޅުނު ދެ މެޗުގައި ވެސް ކުޅުނީ ގިނަ ބަދަލުތަކެއް ގެނެސްގެންނެވެ. އެ ގޮތުން، 35 ވަނަ ފަހަރަށް ލީގު ޗެމްޕިއަންކަން ޔަގީންވި ފަހުން، މިދިޔަ ހަފްތާގައި ކުޅުނު މެޗުގައި ބަޔާން މޮޅުވީ ފަހަތުން އަރައި ހަތަރު ގޯލު ޖަހައިގެން މައިންޒް އަތުން 4-3 އިންނެވެ. މި ހަފްތާގައި ފަހު ސިކުންތު ކޮޅާ ހަމައަށް ހެއިޑެންހައިމް ލީޑުގައި އޮތް ނަމަވެސް ބަޔާން ވަނީ ފަހު ވަގުތު އެއްވަރުކޮށްފަ އެވެ.
ބަޔާން ދަނޑުގައި ކުުޅުނު މި މެޗުގެ ފުރަތަމަ 30 މިނިޓް ތެރޭ ހެއިޑެންހައިމް އިން ދެ ލަނޑު ޖެހި އެވެ. މެޗުގެ 21 ވަނަ މިނިޓްގައި އޭރިއާތެރެއިން ބޫޑޫ ޒިވްޒިވާޑްޒާ ވަނީ ގޯލަށް ބޯޅަ ފޮނުވާލައިފަ އެވެ. އަދި، އޭގެ ނުވަ މިނިޓް ފަހުން، ޑިފެންސް ފަހަތަށް އައި ބޯޅައެއް ބަޔާން ކީޕަރު، ޖޮނަސް އުރްބިގް ކައިރިން ނައްޓާފައި، އެރެން ޑިންޗްކީ ވަނީ ގޯލަށް ބޯޅަ ފޮނުވާލައިފަ އެެވެ.
މެޗުގެ ތެރެއަށް އެނބުރި އައުމަށް ކުރި މަސައްކަތުގައި 43 ވަނަ މިނިޓްގައި ލެއޯން ގޮރެޓްޒްކާ ވަނީ ހިލޭ ޖެހުމަކުން ގޯލު ޖަހައި، ބަޔާނަށް ފަރަގުކުޑަކޮށްދީފަ އެވެ. އަދި، މެޗުގެ 60 ވަނަ މިނިޓްގައި މައިކަލް އޮލީސޭ ނެގި ކޯނަރަކަށް އަރައި، ގޮރެޓްޒްކާ ވަނީ ގޯލު ޖަހައި، ބަޔާނަށް އެއްވަރުކޮށްދީފަ އެވެ. އޭގެ ހަތަރު މިނިޓް ފަހުން، އޮލީސޭ އޭރިއާބޭރުން ފޮނުވާލި ބޯޅަ ދިޔައީ އަރިމަތީ ދަނޑިކައިރިންނެވެ.
ބަޔާނުން ޑިފެންސްތެރެއިން ފަރުވާކުޑަކޮށްލުމުގެ ފައިދާނަގައި، މެޗުގެ 75 ވަނަ މިނިޓްގައި ޒިވްޒަވާޑްޒާ ވަނީ މޮޅު ގޯލެއް ޖަހައި، އަލުން ހެއިޑެންހައިމް އަށް ލީޑުނަގައިދީފަ އެވެ. އޭރިއާތެރެއިން އޭނާ ފޮނުވާލި ބޯޅަ އަމާޒުވީ ގޯލުގެ މަތީ ކަނަށެވެ.
އިތުރު ވަގުުތުގެ 10 ވަނަ މިނިޓްގައި، އޭރިއާބޭރުން އޮލީސޭ ފޮނުވާލި ބޯޅަ ގޯލަށް ވަނީ ދަނޑީގައި ޖެހިފައި، ހެއިޑެންހައިމްގެ ކީޕަރު، ޑިއަންޓް ރަމަޖް ގައިގައި ޖެހިފަ އެވެ.
އެއް ވަނައިގައި ޗެމްޕިއަންކަން ވެސް ޔަގީންކޮށްގެން އޮތް ބަޔާނަށް 32 މެޗުން 83 ޕޮއިންޓް ލިބިފައިވާއިރު، ދެ ވަނައިގައި ބޮރޫޝިއާ ޑޯޓްމަންޑް އޮތީ 31 މެޗުން 67 ޕޮއިންޓާ އެކު އެވެ. ތިން ވަނައިގައި އޮތް އާރްބީ ލައިޕްޒިގަށް ވަނީ 32 މެޗުން 62 ޕޮއިންޓް ލިބިފަ އެވެ. ލެވަކޫސަނުން ވަނީ މިރޭ 4-1 އިން ލައިޕްޒިގު ބަލިކޮށްފަ އެވެ.
ހަތަރެއްގައި ބަޔާ ލެވަކޫސަން އޮތީ ފަސް ވަނައިގައި އޮތް ސްޓުޓްގާޓާ އެއްވަރަށް 32 މެޗުން 58 ޕޮއިންޓް ހޯދައިގެންނެވެ. އަދި، ހަ ވަނައިގައި އޮތް ހޮފެންހައިމް އަށް ވެސް ވަނީ 32 މެޗުން 58 ޕޮއިންޓް ލިބިފަ އެވެ. ހޮފެންހައިމް އާއި ސްޓުޓްގާޓުން މިރޭ ކުޅުނު މެޗު ނިމުނީ 3-3 އިން އެއްވަރުވެގެންނެވެ.
