މިއުނިކް (މެއި 1) - މުސާރަ ކުޑަކުރުމަށް ފަހު ބަޔާން މިއުނިކުން އެ ކްލަބަށް ކުޅެމުން އަންނަ އުމުރުން 40 އަހަރުގެ ގޯލްކީޕަރު، މެނުއަލް ނޯޔާ އަށް އިތުރު އެއްބަސްވުމެއް ދިނުމަށް މަޝްވަރާކުރަމުން އަންނަ ކަމަށް ޖަރުމަނުގެ މީިޑިއާ ރިޕޯޓްތައް ބުނެފި އެވެ.
ނޯޔާ އަންނަނީ މި ސީޒަނުގައި ވެސް ބަޔާން ގޯލުގައި މޮޅު ކުޅުމެއް ދައްކަމުންނެވެ. އެ ގޮތުން، ބަޔާނުން މީގެ ކުރިން ވެސް ވަނީ ނޯޔާގެ ކޮންޓްރެކްޓް އާ ކުރުމުގެ ޝައުގުވެރިކަން ހުރި ކަމަށް ބުނެފަ އެވެ. ޖަރުމަނު މީޑިއާ ރިޕޯޓްތައް ބުނާގޮތުން، ނޯޔާގެ އޭޖެންޓް، ތޯމަސް ކްރޮތުއާ އެކު، ބަޔާނުން މިހާރު އަންނަނީ އާ އެއްބަސްވުމެއްގެ ވާހަކަ ދައްކަމުންނެވެ.
އެ ގޮތުން، ބަޔާނުން ނޯޔާ އަށް ހުށަހަޅަނީ، މިހާރު ދެމުން އަންނަ މުސާރަ އަށް ވުރެން 20 ޕަސެންޓް ދަށްކޮށް، އެއް އަހަރުގެ ކޮންޓްރެކްޓެކެވެ. އެ އޮފާއާ މެދު ގޮތެއް ނިންމަން ނޯޔާ ވަގުތު ކޮޅެއް ނަގާ ގޮތަށް ހަމަޖެހިފައިވާއިރު، ރިޕޯޓްތައް ބުނާގޮތުން، ނޯޔާގެ ފުރަތަމަ ވިސްނުމަކީ، ބަޔާނުގައި މަޑުކުރުމެވެ. ނޯޔާ، މި ވަގުތު ހުރި ކޮންޓްރެކްޓުން އަހަރަކަށް އޭނާ އަށް ބަޔާނުން ބޯނަސް ނުލައި، 24 މިލިއަން ޑޮލަރު ދެ އެވެ.
ޝާލްކާ ދޫކޮށް ނޯޔާ، ބަޔާނަށް ސޮއިކުރީ 2011 ވަނަ އަހަރު އެވެ.
ހަމުގެ ކެންސަރަށް ތިން ފަހަރު ފަރުވާ ހޯދި ނޯޔާ އަށް މިދިޔަ އަހަރުތަކުގައި އަނިޔާގެ އެކި މައްސަލަތައް ވެސް ދިމާވި އެވެ. ގައުމީ ޓީމުން ރިޓަޔާކުރުމަށް ފަހު، ނޯޔާގެ ފޯކަސް ކްލަބް ކެރިއަރަށް ހުރިއިރު، ބަޔާނަށް ކުޅެދިން 596 މެޗުގައި އޭނާ ވަނީ ދެ ޗެމްޕިއަންސް ލީގު ހޯދުމުގެ އިތުރުން 13 ފަހަރު ޖަރުމަނު ލީގު ތަށި ހޯދައިފަ އެވެ. އަދި، ބަޔާނުން މި ސީޒަނުގެ ޗެމްޕިއަންސް ލީގާއި ޖަރުމަނު ކަޕް ހޯދަން ކުރާ މަސައްކަތުގައި ނޯޔާ އަކީ މުހިންމު ކުޅުންތެރިއެކެވެ.
