މިއުނިކް (އޭޕްރީލް 16) - ޔުއެފާ ޗެމްޕިއަންސް ލީގުގެ ކުއާޓާ ފައިނަލް ދެ ވަނަ ލެގުގައި ރޭ ކުޅުނު މެޗުތަކަށް ފަހު، ބަޔާން މިއުނިކް އަތުން ރެއާލް މެޑްރިޑް ކެޓިއިރު، އާސެނަލުން ޖެހިޖެހިގެން ދެ ވަނަ ސީޒަނުގައި މުބާރާތުގެ ސެމީ ފައިނަލަށް ދަތުރުކޮށްފި އެވެ.
މިދިޔަ ހަފްތާގައި ރެއާލް ދަނޑުގައި ކުޅުނު ފުރަތަމަ ލެގުން ބަޔާން 2-1 އިން މޮޅުވިއިރު، ރޭ ބަޔާން ދަނޑުގައި ކުޅުނު ދެ ވަނަ ލެގުގެ މެޗުން މޮޅުވީ 4-3 އިންނެވެ. އާސެނަލުން ސްޕޯޓިން ދަނޑުގައި މިދިޔަ ހަފްތާގައި 1-0 އިން މޮޅުވިއިރު، އަމިއްލަ ދަނޑުގައި ރޭ ވަނީ 0-0 އިން އެއްވަރުވެފަ އެވެ.
ބަޔާން ދަނޑުގައި ރޭ ފޯރިގަދަ ކުރިމަތިލުމެއް ފެނިގެންދިޔައިރު، މެޗު ފަށައިގެން 35 ސިކުންތުގެ ތެރޭގައި ބަޔާން ކީޕަރު މެނުއަލް ނޯޔާ ހެދި ގޯހެއްގެ ފައިދާނަގައި އާޑާ ގުލާ ވަނީ ވަނީ ޗެމްޕިއަންސް ލީގު ތާރީހުގައި ރެއާލްގެ އެންމެ އަވަސް ގޯލު ޖަހައިފަ އެވެ. އެކަމަކު، މެޗުގެ ހަ ވަނަ މިނިޓްގައި ކޯނަރަކުން ތަނަވަސްވި ފުރުސަތެއްގައި، އަލެކްސަންޑަ ޕަވްލޮވިޗް ވަނީ ލަނޑު ޖަހައި އެއްވަރުކޮށްދީފަ އެވެ. މެޗުގެ 29 ވަނަ މިނިޓްގައި ގުލާ ވަނީ ހިލޭ ޖެހުމަކުން ލަނޑެއް ޖަހައި، ރެއާލަށް އަނެއްކާ ވެސް ލީޑުނަގައިދީފަ އެވެ. އެކަމަކު، މެޗުގެ 38 ވަނަ މިނިޓްގައި ރެއާލްގެ އޭރިއާތެރެއިން ހެރީ ކޭން އަށް ލިބުނު ފުރުސަތުގެ ބޭނުންހިފައި ނަތީޖާ ހަމަހަމަކުރި އެވެ.
ކައުންޓަ އެޓޭކެއްގައި، ވިނީޝިއުސް ޖޫނިއާ ދިން ބޯޅައަކުން، 42 ވަނަ މިނިޓްގައި އެމްބާޕޭ ވަނީ ލަނޑެއް ޖަހައި، އަނެއްކާ ވެސް ރެއާލަށް ލީޑުނަގައިދީފަ އެވެ. މި ލަނޑާ އެކު، 4-4 އިން އެގްރިގޭޓް އެއްވަރުވެގެން ފުރަތަމަ ހާފު ނިމުނުއިރު، ރެއާލަށް މައްސަލަ ދިމާވީ ބަދަލު ކުޅުންތެރިއަކަށް ދެ ވަނަ ހާފުގައި ކުޅެން އެރި އެޑުއާޑޯ ކަމަވިންގާ ރަތެއް ހޯދުމުންނެވެ. ކަމަވިންގާ އަށް ރަތެއް ދެއްކީ އަށް މިނިޓް ތެރޭ ދެ ރީނދޫ ކާޑު ހޯދުމުންނެވެ.
ރެއާލްގެ. ކުޅުންތެރިއަކު މަދުވިތާ މާގިނައިރުތަކެއް ނުވެ، ލުއިސް ޑިއާޒް ވަނީ ލަނޑު ޖަހައި، ބަޔާނަށް އެއްވަރުކޮށްދީ އެގްރިގޭޓުން ކުރިހޯދައިދީފަ އެވެ. އަދި، ބަޔާން މި މެޗުން މޮޅުވި ގޯލު ޖަހައިދިނީ، މި ސީޒަނުގައި ތަފާތު މޮޅު ކުޅުމެއް ދެއްކި މައިކަލް އޮލީސޭ އެވެ.
ޗެމްޕިއަންސް ލީގުގެ ސެމީ ފައިނަލުގަައި ބަޔާނުން ކުޅޭނީ ޕީއެސްޖީއާ އެވެ، އަދި، އާސެނަލުން ނުކުންނާނީ އެތުލެޓިކޯ މެޑްރިޑާ ދެކޮޅަށެވެ.
އާސެނަލް ދަނޑުގައި ރޭ ސްޕޯޓިން ލިޒްބަން އިން ލަނޑެއް ޖެހޭތޯ ގިނަ މަސައްކަތްތަކެއް ކުރި ނަމަވެސް އާސެނަލުން ވަނީ އެކަން ކާމިޔާބުވާ ގޮތް ވިޔަ ނުދީފަ އެވެ. މި މެޗުން މޮޅުވުމަށްޓަކައި، އާސެނަލުން ވެސް ފުރުސަތުތަަކެއް ތަނަވަސްކޮށް ގޯލެއް ޖެހުމާ ގާތަށް ޖެހިލި އެވެ. އެ ގޮތުން، ވިކްޓަ ޔޯކެރޭޝް ޖެހި ބޯޅައެއް ގޯލާ ސީދާނުވެ ދިޔައިރު، ލެއަންޑްރޯ ޓްރޮސާޑް ބޮލުން ފޮނުވާލި ބޯޅައެއް ވަނީ ދަނޑިއަށް އަމާޒުވެފަ އެެވެ.
