މައިންޒް (އޭޕްރީލް 25) - ފުރަތަމަ ހާފުގައި މައިންޒުން ބޮޑު ލީޑެއް ނަގާފައިވަނިކޮށް، 35 ވަނަ ފަހަރަށް ޖަރުމަނު ލީގު ޗެމްޕިއަންކަން މިދިޔަ ހަފްތާގައި ޔަގީންކޮށްފައިވާ ބަޔާން މިއުނިކުން ފަހަތުން އަރައި ހަތަރު ގޯލު ޖަހައި، 4-3 އިން މޮޅުވެއްޖެ އެވެ.
މިިދިޔަ ހަފްތާގައި ސްޓުޓްގާޓް ބަލިކޮށް ބާކީ ހަތަރު މެޗު އޮއްވައި، ބަޔާނުން ލީގު ޗެމްޕިއަންކަން ޔަގީންކުރި ފަހުން ކުޅުނު ފުރަތަމަ މެޗުގައި މިރޭ ފުރަތަމަ އެގާރަ ކުޅުންތެރިން ނެގީ، ޗެމްޕިއަންސް ލީގުގެ ސެމީ ފައިނަލުގައި ޕީއެސްޖީއާ ދެކޮޅަށް ކުޅެން އޮތް މެޗާ މެދު ވިސްނައިފަ އެވެ. އެކަމަކު، އޭގެ ނަތީޖާ ދިޔައީ ގޯސްކޮށެވެ. އަމިއްލަ ދަނޑުގައި ކުޅުނު މައިންޒުން ވަނީ ތިން ގޯލުގެ ލީޑެއް ނަގައިފަ އެވެ.
މެޗުގެ 15 ވަނަ މިނިޓްގައި، ޑޮމިނިކް ކޯރް ވަނީ ލަނޑު ޖަހައި މައިންޒަށް ލީޑުނަގައިދީފަ އެވެ. އަދި، މެޗުގެ 29 ވަނަ މިނިޓްގައި ޕޯޯލް ނެބެލް ވަނީ ރީބައުންސަކުން ލިބުނު ފުރުސަތުގައި ގޯލަށް ބޯޅަ ފޮނުވާލައި، މައިންޒުގެ ލީޑުފުޅާކޮށްދީފަ އެވެ. މައިންޒުން ތިން ވަނަ ލަނޑު ޖެހީ ފުރަތަމަ ހާފުގެ އިތުރު ވަގުތުގަ އެވެ. މިއީ، ވެސް އޭރިއާތެރެއިން ލިބުނު ފުރުސަތަކުން ޖެހި ގޯލެކެެވެ. މި ލަނޑު ޖެހީ، ޝެރާލްޑޯ ބެކާ އެވެ. މައިންޒުގެ ފަހު ދެ ގޯލުގައި ވެސް ނަޑިއެމް އަމީރީ މުހިންމު ރޯލެއް ކުޅުނެވެ.
ބަޔާނުން ދެ ވަނަ ހާފު ފެށީ ހެރީ ކޭން އާއި މައިކަލް އޮލީސޭ، ބަދަލަކަށް ކުޅެން އަރުވައިގެންނެވެ. ކޮންރަޑް ލައިމާ ދިން ބޯޅައަކުން 53 ވަނަ މިނިޓްގައި ބަޔާންގެ ފުރަތަމަ ލަނޑު ޖެހީ ނިކޮލަސް ޖެކްސަން އެވެ. އަދި، އޭގެ 20 މިނިޓް ފަހުން، ލައިމާ ދިން ބޯޅައަކުން އޮލީސޭ ވަނީ ބަޔާންގެ ދެ ވަނަ ލަނޑު ޖަހައިފަ އެވެ.
މެޗުގެ ނަތީޖާ ބަޔާނަށް ހަމަހަމަކޮށްދިނީ 80 ވަނަ މިނިޓްގައި ޖަމާލް މުސިއާލާ އެވެ. އަދި، އެއްވަރުކުރިތާ ތިން މިނިޓް ފަހުން ބަޔާން މޮޅުކޮށްދިން ލަނޑު ޖެހީ ކޭން އެވެ.
