ބައިނަލްއަގުވާމީ މަސައްކަތްތެރިންގެ ދުވަހު މަސައްކަތްތެރިންގެ ހައްގުގައި ކޮންމެ އަހަރަކު މާލޭގައި ބާއްވާ "މޭޑޭ ރެލީ" އަށް ހުރަސްއަޅަން ސަރުކާރުން ރެލީތަކެއް ބާއްވަން ނިންމައިފި އެވެ.
އަދަދު އަށް އެނގިފައިވާ ގޮތުގައި މިއަދު އެކި ޖަމިއްޔާތަކުން އިންތިޒާމުކޮށްގެން މާލޭގައި ބާއްވާ ރެލީއަށް ހުރަސްއަޅަން ސަރުކާރުގެ އެކި މިނިސްޓްރީތަކާއި ސަރުކާރުގެ ކުންފުނިތަކުން އިންތިޒާމުކޮށްގެން ރެލީތަކެއް ބޭއްވުމަށް ވަނީ ރާވައިފަ އެވެ.
މަސައްކަތްތެރިންގެ ހައްގުގަައި ކަމަށް ބުނެ ސަރުކާރުން ރެލީތަކެއް ބާއްވާތީ އެކަމާ ކަންބޮޑުވުން ފާޅުކޮށް މޯލްޑިވްސް ހެލްތު ޕްރޮފެޝަނަލްސް ޔޫނިއަން (އެމްއެޗްޕީޔޫ) ގެ ޖެނެރަލް ސެކެޓްރީ ފާތިމަތު ޒިމްނާ ވިދާޅުވީ މޭޑޭ އަކީ މަސައްކަތްތެރިންގެ ހައްގުގައި އެތައް ދުވަހެއް ކުރިން ފެށިގެން ޖަމިއްޔާތަކުން އިންތިޒާމުކޮށްގެން ބާއްވާ ރެލީއެއް ކަމަށެވެ.
"އަސްލުގައި ވަރަށް ކަންބޮޑުވޭ [ސަރުކާރުން ރެލީތައް ބާއްވާތީ]. ރާއްޖޭގައި މޭޑޭ މަސައްކަތްތެރި އާއިލާތަކަށް ތަސައްވަރު ކުރެވިފައި ވަނީ ޕޮލިޓިކަލީ އެލައިން އެއްޗެއް ކަމަށް. މޭޑޭ ފާހަގަކުރަނީ އެތައް ދުވަހެއް ކުރިން. އެއީ 1888 ވަނަ އަހަރު ލޭބާ މޫވްމަންޓްގައި ލިބުނު ކާމިޔާބީ ފާހަގަކުރަން،" އޭނާ ވިދާޅުވި އެވެ.
ޒިމްނާ ވިދާޅުވީ މޭޑޭގައި މަސައްކަތްތެރިންގެ އެކި ހައްގުތަކަށް ވަކާލާތުކޮށްގެން މެޓާނިޓީ ލީވް އާއި ޕެޓާނިޓީ ލީވް އަދި މިނިމަމްވޭޖް ފަދަ އެކި ކާމިޔާބީތައް ލިބިފައިވާއިރު، އެ ކާމިޔާބީތަކުގެ އިތުރުން އައު ކަންކަމަށް ވަކާލާތުކުރަން މިފަދަ ރެލީތައް ބާއްވަން ޖެހޭނީ ޖަމިއްޔާތަކުން އިސްނަގައިގެން ކަމަށެވެ.
ނަމަވެސް ސަރުކާރުގެ އެކި ތަންތަނުން މަސައްކަތުގެ މާހައުލު ރަނގަޅު ކަމަށް ދޭހަވާ ގޮތަށް ޕޯސްޓުތައް ޖަހުވައި އޮޅުވާލަމުންދާ ކަމަށާއި މަސައްކަތްތެރިންގެ އޮތް ބާރު ދަމައިގަންނަން އުޅޭހެން ސިފަވަމުންދާ ކަމަށް އޭނާ ވިދާޅުވި އެވެ.
ރާއްޖޭގެ މަސައްކަތްތެރިންގެ ޔޫނިއަންތައް ތަމްސީލް ކުރާ މައި ޖަމިއްޔާ ކަމަށްވާ މޯލްޑިވްސް ޓްރޭޑް ޔޫނިއަން ކޮންގުރެސް (އެމްޓީޔޫސީ) އިން އިންތިޒާމުކޮށްގެން މިއަދު ބާއްވާ ރެލީ ފެށުމަށް ހަމަޖެހިފައިވަނީ އާޓިފިޝަލް ބީޗުން ހަވީރު 16:00 ޖަހާއިރެވެ.
އެ ރެލީގައި ޓޫރިޒަމް އެމްޕްލޯއިސް އެސޯސިއޭޝަން އޮފް މޯލްޑިވްސް (ޓީމް)، މޯލްޑިވްސް ޕޯޓް ވޯކާސް ޔޫނިއަން، ޓީޗާސް ޔޫނިއަން، ބޮޑު ކަންނެލި މަސްވެރިންގެ ޔޫނިއަނުން ބައިވެރިވެ އެވެ.
މަސައްކަތްތެރިންގެ ހައްގުގައި މިދިޔަ އަހަރުވެސް ޖަމިއްޔާތަކުން އިންތިޒާމުކޮށްގެން ރެލީއެއް ބޭއްވި އެވެ. ނަމަވެސް އެ ރެލީއަށް ފުލުހުން ވަނީ ހުރަސްއަޅާފަ އެވެ.
