މި ސަރުކާރުގެ ދައުރު ދެބައިވާން ގާތްވެ، ދެ ވަނަ ފަހަރަށް ސިޔާސީ މުވައްޒަފުންގެ އަދަދު މަދުކުރަން ފަށާފައިވާއިރު، މިއަދާ ހަމައަށް ސަރުކާރުގައި ތިބި ސިޔާސީ މުވައްޒަފުންގެ އަދަދު ހާމަކުރައްވަން ރައީސް އޮފީހުގެ ތަރުޖަމާން މުހައްމަދު ހުސައިން ޝަރީފް (މުންދު) މިއަދު ދެކޮޅު ހައްދަވައިފި އެވެ.
ނޫސްވެރިންނަށް މައުލޫމާތު ދެއްވަމުން މުންދު ވިދާޅުވީ ސިޔާސީ މުވައްޒަފުންގެ އަދަދު މި ވަގުތު ހާމަކުރެވެން ނެތް ކަމަށެވެ. ނަމަވެސް ސިޔާސީ މުވައްޒަފުން އެސެސް ކުރަން ކުރިއަށްދާ މަސައްކަތް ނިމުމާއެކު ސިޔާސީ މުވައްޒަފުންގެ އަދަދަށް އައި ބަދަލު އާރްޓީއައިއަކާ ނުލާވެސް ހާމަކުރާނެކަމުގެ ޔަގީންކަން އޭނާ ދެއްވި އެވެ.
"އިރާދަކުރެއްވިއްޔާ ޕްރޮސެސް ނިމޭއިރު އެނގިވަޑައިގަންނަވާނެ ހުރިހާ ބޭފުޅުންނަށް. އެހިސާބުން އާރްޓީއައިއަކާ ނުލާވެސް ހަމަ ޔަގީނުންވެސް ރައީސްގެ ނިންމެވުމަކީ އޮންނާނީ ވިދާޅުވެސް ވެފައި އަޑުއައްސަވަމޭ އެބަ، ކަންބޮޑުވާ ކަންތައް އެނގިވަޑައިގަންނަވަމޭ އެބަ. ކަންބޮޑުވާ ކަންތައްތަކަށް އެޑްރެސް އެބަ ކުރައްވަމޭ. ޖަވާބުދާރީވެވަޑައިގަންނަވާނަމޭ،" އޭނާ ވިދާޅުވި އެވެ.
"އެހެންވީމަ އެހިސާބުން އަޅުގަނޑުމެން އެޓްލީސްޓް ތިބޭފުޅުންނަށް އައި ބަދަލު ދަންނަވާނަން،"
މުންދު ވިދާޅުވީ މިވަގުތު ސިޔާސީ މުވައްޒަފުންގެ އަދަދު ހާމަކުރެވެން ނެތީ މުވައްޒަފުން އެސެސްކުރެވެމުންދާތީ އެ އަދަދަށް ބަދަލު އަންނަމުންދާތީ ކަމަށެވެ. އޭނާ ވިދާޅުވީ މުވައްޒަފުން ވަކިކުރުމުގެ މަސައްކަތް ކުރިއަށް ދާތީ މިހާރު ދޭ އަދަދު މާދަމާ ސައްހަ ނުވާނެ ކަމަށެވެ.
މިނިސްޓްރީތަކުން 500 ސިޔާސީ މުވައްޒަފުން ވަކިކުރަނީ
ސަރުކާރުގެ މިނިސްޓްރީތަކުގައި ތިބި 500 ސިޔާސީ މުވައްޒަފުން ވަކިކުރުމަށް ރައީސުލްޖުމްހޫރިއްޔާ ވަނީ ނިންމަވާފައެވެ. މި ނިންމެވުން ނިންމެވީ ކެބިނެޓަށް ބަދަލުތަކެއް ގެނައުމަށްފަހު ބޭއްވި ފުރަތަމަ ޖަލްސާގައި ކަމަށްވާއިރު، ކުރިއަށް އޮތް ތަނުގައި ސަރުކާރު ކުންފުނިތަކުގެ ސިޔާސީ މުވައްޒަފުންވެސް މަދުކުރުމަށް ވަނީ ހަމަޖެހިފައެވެ.
މި އަދަދު ހިއްސާނުކުރައްވާ، މުންދު ވަނީ ސިޔާސީ މުވައްޒަފުންގެ އަދަދު ހަތް ސަތޭކައަށް ވުރެ އިތުރު ނުކުރުމަކީ ރައީސްގެ ރިޔާސީ ވައުދެއް ނޫން ކަމަށް ވެސް ވިދާޅުވެފަ އެވެ. އޭނާ ވިދާޅުވީ އޭރު އިއުލާންކުރެއްވީ "އަމާޒެއް" ކަމަށެވެ.
ސިޔާސީ މުވައްޒަފުންގެ އަދަދު ހާމަކުރުމަށް ސަރުކާރުން ފަސްޖެހެމުންދާ ކަމަށް ބުނެ އިދިކޮޅު ފަރާތްތަކުންނާއި އާންމުންގެ ފާޑުކިޔުން ވަނީ އަމާޒުވެފަ އެވެ. ސަރުކާރުގެ އެކި ވުޒާރާތަކުން މީގެ ކުރިން ބުނެފައި ވަނީ ސިޔާސީ މުވައްޒަފުންގެ އަދަދު ހާމަކުރެވޭނީ ރައީސް އޮފީހުން ކަމަށެވެ. އެހެންނަމަވެސް ރައީސް އޮފީހުން ވެސް މިހާތަނަށް އެ މައުލޫމާތު ސާފުކޮށް ހާމަކޮށްފައެއް ނުވެ އެވެ.
މި ސަރުކާރު ވެރިކަމަށް އައުމުގެ ކުރިންނާއި އިންތިގާލީ މަރުހަލާގައި ވެސް ތަކުރާރުކޮށް ބުނަމުންދިޔައީ ސިޔާސީ މުވައްޒަފުންގެ އަދަދު ހަތްސަތޭކައަށް ވުރެ އިތުރު ނުކުރާނެ ކަމަށެވެ.
ނަމަވެސް މިހާރު ސަރުކާރުގެ ތަރުޖަމާނު މިވަނީ އެއީ ރިޔާސީ ވައުދެއް ނޫން ކަމަށް ވިދާޅުވެ، އެ ވާހަކަ ދިފާއުކުރައްވާފަ އެވެ. ސަރުކާރުގެ ހަރަދު ކުޑަކުރުމުގެ ފިޔަވަޅުތަކުގެ ދަށުން ދާދި ފަހުން ވަނީ ދުއިސައްތައަށް ވުރެ ގިނަ ސިޔާސީ މުވައްޒަފުން ވަކިކުރުމަށް ނިންމާފައިވާކަން އިއުލާނުކޮށްފަ އެވެ.
