ބައިނަލްއަގުވާމީ މަސައްކަތްތެރިންގެ ދުވަހު މަސައްކަތްތެރިންގެ ހައްގުގައި މި އަހަރު ވެސް "މޭޑޭ ރެލީ" އޮންނާނެކަން ރާއްޖޭގެ މަސައްކަތްތެރިންގެ ޔޫނިއަންތައް ތަމްސީލް ކުރާ މައި ޖަމިއްޔާ ކަމަށްވާ މޯލްޑިވްސް ޓްރޭޑް ޔޫނިއަން ކޮންގުރެސް (އެމްޓީޔޫސީ) އިން ހާމަކޮށްފި އެވެ.
ކޮންމެ އަހަރެެއްގެ މެއި މަހުގެ ފުރަތަމަ ދުވަހަކީ މަސައްކަތްތެރިންގެ ދުވަހެވެ. އެއީ ސަރުކާރު ބަންދު ދުވަހެކެވެ.
ފާއިތުވި ކޮންމެ އަހަރެއްގައި ވެސް އެ ދުވަހު މަސައްކަތްތެރިންގެ ހައްގުތަކަށް ވަކާލާތުކޮށް ހިނގާލުންތަކާއި ރެލީތައް ބާއްވާފައިވެ އެވެ. ބައެއް އަހަރުތަކުގެ މޭޑޭ ރެލީ ކުރިއަށްގެންދިޔުމަށް ފުލުހުން ހުރަސް އެޅި އެވެ.
އެގޮތުން، މިދިޔަ އަހަރުގެ ރެލީ ރާވާފައި އޮތީ ރަސްފަންނު ސަރަހައްދުން ފަށައި، މަޖީދީ މަގުން އިރަށް ހިނގައި އާޓިފިޝަލް ބީޗަށް ނިންމާލާ ގޮތަށެވެ.
ނަމަވެސް، ރެލީ ފެށެން ކުޑަ ވަގުތުކޮޅަކަށް ވެފައި ވަނިކޮށް ފުލުހުން އައިސް ވަނީ ބޮޑުތަކުރުފާނު މަގާއި މަޖީދީ މަގު ގުޅޭ ހިސާބުގައި ބެރިކޭޑު ޖަހައި ރެލީއަށް ހުރަސް އެޅި އެވެ.
މި އަހަރުގެ ރެލީ ކުރިއަށްދާނެ ރޫޓެއް މިހާތަނަށް ހާމަކޮށްފައެއް ނުވެ އެވެ.
މަސައްކަތްތެރިންގެ ދުވަހަކީ ދުނިޔޭގެ ގިނަ ގައުމުތަކުގައި ހިނގާލުންތަކާއެކު ފާހަގަކުރާ ދުވަހެކެވެ.
