ސަރުކާރުގެ މިނިސްޓްރީތަކަށް ޑެޕިއުޓީ މިނިސްޓަރުންނާއި ސްޓޭޓް މިނިސްޓަރުންނަށް މީގެފަހުން އައްޔަނުކުރާނީ ތައުލީމީ ބޭފުޅުން ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ ސަރުކާރުގެ މަގާމުތަކަށް މީގެ ފަހުން އައްޔަނުކުރާ ސްޓޭޓް މިނިސްޓަރުންނަކީ މާސްޓާސް ޑިގްރީ އޮތް ބޭފުޅެއްތޯ އަދި ޑެޕިއުޓީ މިނިސްޓަރުންނަކީ ޑިގްރީއެއް އޮތް ބޭފުޅެއްތޯ ބަލާނެ ކަމަށެވެ.
"މިސާލަކަށް އަޅުގަނޑުގެ ވިސްނުމަކު ކުރިއަށް އޮތް ތަނުގައި ނެތް އެއްގޮތަކަށް ވެސް މިސާލަކަށް ސްޓޭޓް މިނިސްޓަރަކަށް މީހަކު ކޮންމެހެން ލާންޖެހިއްޖެއްޔާ ލާންޖެހޭ ފަހަރެއްގައި ވެސް އެމީހާ އަތުގައި މިސާލަކަށް މާސްޓާސް ޑިގްރީއެއް އޮތްތޯ ބެލުން،" މުއިއްޒު ވިދާޅުވި އެވެ.
"ޑެޕިއުޓީ މިނިސްޓަރަކަށް ކޮންމެހެން އެތަނަކަށް ބޭނުންވާ މީހަކު ލާންޖެހޭ ހާލަތުގައި ވެސް އެމީހާ އަތުގައި އެކަމާ ބެހޭ ދާއިރާއިން ޑިގްރީއެއް އޮތްތޯ ބެލުން. މިކަހަލަ ރަފް މިންގަނޑެއް ގެންގުޅެން އަޅުގަނޑު ވިސްނާފައި މިއޮތީ."
ގާނޫނުއަސާސީން އެމަނިކުފާނަށް ލިބިފައިވާ ބާރުގެ ދަށުން ސިޔާސީ މަގާމުތަކަށް އައްޔަންކުރާއިރު އެ ދާއިރާއަކުން ތައުލީމުގެ އިތުރުން ތަޖުރިބާއަށް ވެސް މީގެ ފަހުން ބަލާނެ ކަމަށް މުއިއްޒު ވިދާޅުވި އެވެ.
"މިނިސްޓްރީތަކަށް 115 ވަނަ މާއްދާ [ގާނޫނުއަސާސީ] ގެ ދަށުން އޮންނަ ފުރުސަތު އަޅުގަނޑަށް އަބަދުވެސް އޮންނާނެ. ނަމަވެސް އަޅުގަނޑުވެސް ކުރިއަށް އޮތްތާގައި އަދި އިތުރަށް ބަލާނަން އެމީހާގެ މެރިޓް ބޭސް، ތައުލީމީ ފެންވަރު ތަޖުރިބާއަށް،" މުއިއްޒު ވިދާޅުވި އެވެ.
މުއިއްޒު ވިދާޅުވީ ސަރުކާރު ކުޑަ ކުރުމުގެ މަސައްކަތްތައް މިހާރު ކުރިއަށްދާ ކަމަށާއި އެގޮތުން ޕާފޯމަންސް ބޭސްކޮށް ވީހާވެސް ގިނަ މީހުން މަދުކުރުމުގެ މަސައްކަތް ކުރިއަށް ގެންދާނެ ކަމަށެވެ. އޭގެ އިތުރުން ސަރުކާރުގެ ކުންފުނިތަކުގެ މުވައްޒަފުންގެ އަދަދު 33 ޕަސަންޓަށް ކުޑަ ކުރުމުގެ މަސައްކަތް ވެސް ކުރިއަށްދާނެ ކަމަށް މުއިއްޒު ވިދާޅުވި އެވެ.
އިންތިހާބުތަކާ ދިމާކޮށް ވޯޓު ހޯއްދެވުމަށް ސަރުކާރުން މީހުންނަށް ވަޒީފާ ދެއްވާފައިވާނެ ކަމަށް މުއިއްޒު މިއަދު އެއްބަސްވެވަޑައިގެންނެވި އެވެ. ނަމަވެސް މުއިއްޒު ވިދާޅުވީ ކެމްޕެއިނަކާ ދިމާކޮށް ނުވަތަ ސިޔާސީ ގޮތުން ދެން އެމަނިކުފާނު ވަޒީފާއެއް ނުދެއްވާނެ ކަމަށެވެ.
މުއިއްޒު އެހެން ވިދާޅުވިއިރު، ސިޔާސީ މަންފާއެއް ހޯދަން ނުވަތަ އިންތިހާބަކުން ވޯޓު ހޯދަން ދައުލަތުން ނުވަތަ ސަރުކާރުން ވަޒީފާއެއް ދިނުމަކީ ގާނޫނާ ހިލާފު ކަމެކެވެ. އަދި ގާނޫނުއަސާސީގެ 115 ވަނަ މާއްދާގެ ޅ. އިން ރައީސްއަށް ބާރު ލިބެނީ، ރައީސްގެ ވާޖިބާއި މަސްއޫލިއްޔަތު އަދާކުރުމުގެ ބޭނުމުގައި މަގާމުތައް އުފެއްދުމުގެ ބާރު އެކަންޏެވެ.
