ސަރުކާރު ހިއްސާ އޮންނަ ކުންފުނިތަކުން (އެސްއޯއީ) ބޮޑެތި އަދަދުތަކުން މީޑިއާތަކާށް ފައިސާ ދެމުން އަންނަ ސިޔާސަތު މި ސަރުކާރުން ދަމަހައްޓައި އިތުރަށް ފުޅާކޮށްފައިވަނިކޮށް، އެ ކުންފުނިތަކުން މީޑިއާތަކަށް ސްޕޮންސާ ދެއްވަން ނުޖެހޭ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
މީގެ ކުރީ ސަރުކާރުތަކުން ވެސް އެސްއޯއީތައް މެދުވެރިކޮށް މީޑިއާތަކަށް ފައިސާ ދޫކޮށްފައިވެ އެވެ. މި ސަރުކާރުން އެ ސިޔާސަތު އިތުރަށް ވަރުގަދަކޮށްފައިވާއިރު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މުއިއްޒު ވިދާޅުވީ ދައުލަތުގެ ބަޖެޓުން މި އަހަރުން ފެށިގެން މީޑިއާތަކަށް ފައިސާ ވެސް ދޫކުރަން ފަށާފައިވާ ކަމަށެވެ.
"މީޑިއާތަކަކަކަށް ސަރުކާރު ކުންފުނިތަކަކުން އަސްލު ސްޕޮންސާ ދޭކަށް ނުޖެހޭނެ އެނގޭތޯ. އެއީ އެކަން ކުރަންޖެހޭ ގޮތެއް ނޫން. އެހެންނަމަވެސް ސަރުކާރުން މިވަނީ އަޅުގަނޑު ވައުދުވީ ވައުދެއް ފުއްދަން ފަށާފައި. މިހާރު ދައުލަތުގެ ބަޖެޓުން ވަކި އިންސައްތައެއް މީޑިއާތަކަށް ދޭން ފަށާފައި. ދެން އެކަން ކޮންޓިނިއު ވާނެ ކޮންމެ އަހަރެއްގެ ބަޖެޓުގައިވެސް،" މުއިއްޒު ވިދާޅުވި އެވެ.
ނަމަވެސް މުއިއްޒު ވިދާޅުވީ އެސްއޯއީތަކުން އެކި ކަންކަމާއި މަސައްކަތްތައް އިޝްތިހާރުކުރަން މީޑިއާތަކުގެ އެކި ޕެކޭޖުތައް ނަގައިގެން މަސައްކަތްތައް ކުރުމަކީ އެ ކުންފުންޏަށް ލިބިފައިވާ ހައެއްގެއް ކަމަށެވެ.
އެސްއޯއީތަކަށް ލިބިފައިވާ ހައްގުގެ ދަށުން އިޝްތިހާރުތައް ކުރަން މީޑިއާތަކާ ހަވާލުކުރަންވާނީ ދެފުށް ފެންނަ ގޮތަށް އެއްބަސްވުމެއް ހަދައިގެން ކަމަށާއި އޭރަށް އެއްވެސް މައްސަލައެއް ނެތް ކަމަށް މުއިއްޒު ވިދާޅުވި އެވެ.
"ދެން ކުންފުނިތަކުން އަމިއްލައަށް އެމީހުން އިސްނަގައިގެން އެމީހުންގެ ޕްރޮޑަކްޓްސްތައް އިޝްތިހާރު ކުރަންވެގެން ނޫނީ އެމީހުން ކުރާ މަސައްކަތް އިސްތިހާރު ކުރުމަށްޓަކައި މީޑިއާތަކާ އެކީގައި އެކި ކަހަލަ އެގްރީމަންޓްސްތައް ހަދައިގެން މީޑިއާ ޕެކޭޖުތައް ނަގައިގެން ކުރިއަށްގެންދިޔުމަކީ އެ ކުންފުނީގެ އަމިއްލަ ރައިޓެއް،" މުއިއްޒު ވިދާޅުވި އެވެ.
"އެކަން ހަމަ ޓްރާޏްސްޕޭރެންޓް ގޮތަކަށް، ޕްރޮފެޝަނަލް މިންގަނޑުތަކުން ކުރިއަށް ގެންދިޔާމަ އަޅުގަނޑު ހިތުން ހަމަ ރަނގަޅުވާނެ."
މީގެއިތުރުން މުއިއްޒު ވިދާޅުވީ މީޑިއާތަކަށް އެސްއޯއީތަކުން ސްޕޮންސާ ދިނުމުގެ ތެރެއަށް ރައީސް އޮފީހުން ވަންނަނަމަ، އެކަން އެމަނިކުފާނަށް އަންގައި ދެއްވުން އެދޭ ކަމަށެވެ.
ދައުލަތުގެ ބަޖެޓުން އަމިއްލަ މީޑިއާތަކަށް ދޭ މާލީ އެހީތެރިިކަން (މީޑިއާ ގްރާންޓް) ދޫކުރާ ޕްރޮގްރާމުގެ ދަށުން 40 މީޑިއާއަކަށް 27.29 މިލިއަން ރުފިޔާ ވަނީ ޖަމާކޮށްފަ އެވެ. މީޑިއާތަކަށް ދޭން ޖެހޭ ފައިސާ ކަނޑައެޅުމުގެ ކަންކަން ކުރިއަށް ގެންދިޔައީ މޯލްޑިވް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިންނެވެ.
ދައުލަތުގެ ބަޖެޓުން މީޑިއާތަކަށް ފައިސާ ދޭން ފެށި ފަހުންވެސް، އެސްއޯއީތަކުން މީޑިއާތަކަށް ފައިސާ ދޭތީ އެކަމާ ގުޅިގެން ބައެއް މީހުން ދަނީ ފާޑުކިޔަމުންނެވެ. އޭގެއިތުރުން މީޑިއާތަކަށް ދައުލަތުގެ ބަޖެޓުން ފައިސާ ދޭތީވެސް އެކަމާ ގިނަ ބަޔަކު ހިތްހަމަނުޖެހުން ފާޅުކުރި އެވެ.
