ދިވެހި ފުލުހުން އަދަދު ނޫހުގެ އިދާރާއަށް ވަދެ، ނޫސްވެރިކަމުގެ މަސައްކަތްތަކަށް ބޭނުންކުރާ ސާމާނުތައް ގެންދިޔަ މައްސަލަ، ދުނިޔޭގެ ނޫސްވެރިކަމުގެ މިނިވަންކަމަށް މަސައްކަތްކުރާ ބައިނަލްއަގުވާމީ ޖަމިއްޔާއެއް ކަމަށްވާ އިންޓަނޭޝަނަލް ޕްރެސް އިންސްޓިޓިއުޓް (އައިޕީއައި) އިން ހަރުކަށި އިބާރާތުން ކުށްވެރިކޮށްފައެވެ.
އައިޕީއައިގެ އެކްސް އެކައުންޓުގައި ބުނެފައި ވަނީ އަދަދު ނޫހުގެ އޮފީހަށް ވަދެ، ނޫސްވެރިކަމުގެ މަސައްކަތްތަކާ ގުޅޭ މުހިއްމު ސާމާނުތައް ގެންދިޔުމާއި ބައެއް ނޫސްވެރިން ރާއްޖޭން ބޭރަށް ފުރުން މަނާކޮށް، ދަތުރުފަތުރު ކުރުމުގެ މިނިވަންކަން ހަނިކޮށްފައިވާތީ ކަންބޮޑުވާ ކަމެއް ކަމަށެވެ.
ފުރުން މަނާކޮށްފައި ވަނީ އަދަދު ނޫހުގެ ސީއީއޯ ހުސައިން ފިޔާޒު މޫސާ އާއި އެޑިޓަރު ހަސަން މުހައްމަދު އެވެ. މީގެ އިތުރުން އެ ނޫސްވެރިންގެ މައްޗަށް ވަނީ ޖިނާއީ ތަހުގީގެއް ފަށައި ފުލުހަށް އިއްޔެ ހާޒިރުކޮށްފަ އެވެ.
އަދަދު ނޫހާމެދު މި ފިޔަވަޅުތައް އަޅަން ފެށީ "އައިޝާ"ގެ ނަމުގައި އަދަދު ނޫހުން ގެނެސްދީފައިވާ ޑޮކިއުމެންޓްރީއާ ގުޅިގެންނެވެ.
އައިޕީއައި އިން ބުނެފައިވަނީ، މިއީ ސަރުކާރާއި ދައުލަތުގެ މުއައްސަސާތަކަށް ފާޑުކިޔައި އަދަދު ނޫހުން ގެނެސްދީފައިވާ ރިޕޯޓުތަކާ ގުޅިގެން، އެ ނޫހުގެ އަޑު ކަނޑުވާލުމަށް ހިންގާފައިވާ ބަދަލުހިފުމުގެ އަމަލެއްގެ ގޮތުގައި ބެލެވޭ ކަމަށެވެ.
މިދިޔަ ހޯމަ ދުވަހުގެ ރޭ އަދަދު ނޫހަށް ވަދެ ނޫހުގެ މުދާތައް ގެންދިޔަ މައްސަލައިގައި މޯލްޑިވްސް ޖާނަލިސްޓް އެސޯޝިއޭޝަންގެ އިތުރު ނޫސްވެރިކަމުގެ ހައްގަށް މަސައްކަތްކުރާ ބޭރުގެ ގިނަ ޖަމިއްޔާތަކުން ކަންބޮޑުވުން ފާޅުކުރަން ފެށުމުން، ސަރުކާރުން ބުނެފައި ވަނީ އަދަދުގެ މައްސަލަ ފުލުހުން ބަލަމުން ދަނީ ރައީސް އޮފީހުން ހުށަހަޅައިގެން ނޫން ކަމަށެވެ.
މިހެން ސަރުކާރުން ބުނި ނަމަވެސް، ޑޮކިއުމެންޓްރީ އެޅުވިތާ އެއް މަސް ދުވަސް ފަހުން އެ މައްސަލަ ފުލުހުން އަދަދު ނޫހަށް ވަދެ މައްސަލައިގެ ތަހުގީގު ފެށީ، ހޯމަ ދުވަހު ހެނދުނު ބޭއްވި ނޫސްވެރިންގެ ބައްދަލުވުމުގައި އަދަދު ނޫހުގެ މައްސަލަ ބެލުމަށް ރައީސް މުހައްމަދު މުއިއްޒު ގޮވާލައްވާފައިވަނިކޮށެވެ.
