ދިވެހިރާއްޖޭގައި ގާނޫނުއަސާސީން ކަށަވަރުކޮށްދީފައިވާ ނޫސްވެރިކަމުގެ މިނިވަންކަމާއި، ހިޔާލުފާޅުކުރުމުގެ މިނިވަންކަމުގެ އިތުރުން އެއްވެއުޅުމުގެ މިނިވަންކަމަށް ހުރަސްއެޅޭ ފަދަ ކަންތައްތަކެއް ހިނގަމުންދާތީ ޓްރާންސްޕޭރަންސީ މޯލްޑިވްސްއިން ކަންބޮޑުވުން ފާޅުކޮށްފި އެވެ.
ޓްރާންސްޕޭރެންސީން މިއަދު ނެރުނު ބަޔާނެއްގައި ބުނީ ރާއްޖޭގެ ޑިމޮކްރެޓިކް ނިޒާމާއި މަދަނީ މުޖުތަމައުގެ މިނިވަންކަން ހަނިވަމުންދާ މަންޒަރު ފެންނަމުންދާ ކަމަށެވެ.
"މީޑިއާގެ މަދަނީ ގަވާއިދުތަކުގެ ދަށުން ހައްލުކުރަންޖެހޭ ކަންކަމުގައި ޖިނާއީ ގާނޫނުގެ މާއްދާތައް ބޭނުންކުރުމަކީ މިނިވަން ނޫސްވެރިކަމަށް އޮތް ހުރަހެކެވެ. އަދި މިއީ ރާއްޖޭގެ ނޫސްވެރިކަމުގެ މިނިވަންކަމަށް އޮތް ބިރުވެރި ނަތީޖާއެއް ނުކުމެދާނެ ކަމެކެވެ،" ޓްރާންސްޕޭރެންސީގެ ބަޔާނުގައި ބުންޏެވެ.
"ނޫސްވެރިކަމުގެ މިނިވަންކަން ރައްކާތެރިކުރުމަށާއި ކަނޑައެޅިފައިވާ އުސޫލުތަކުގެ ތެރެއިން ޖަވާބުދާރީކުރުވުމަށް ހެދިފައިވާ މަދަނީ އިޖުރާއަތްތައް ދޫކޮށްލައި ކަމާބެހޭ ފަރާތްތަކުން އަމަލުކުރަމުންދާ ގޮތަކީ ކަންބޮޑުވާ ކަމެކެވެ."
އެ ޖަމިއްޔާއިން ވަނީ އަދަދު ނޫހަށް ފުލުހުން ވަނުމާއި އޭގެ ފަހުން އެ މުއައްސަސާއިން ކޯޓު އަމުރެއްގެ ދަށުން އަދަދު ނޫހުގެ ސީއީއޯ، ހުސެއިން ފިޔާޒު މޫސާ އާއި މެނޭޖިން އެޑިޓަރު، ހަސަން މުހައްމަދުގެ ޕާސްޕޯޓު ހިފެހެއްޓުމާ ގުޅިގެން ގިނަ ކަންބޮޑުވުންތަކެއް ފާޅުކޮށްފަ އެވެ.
އެގޮތުން، ހޯމަ ދުވަހުގެރޭ އަދަދު ނޫހުގެ އޮފީހަށް ފުލުހުން ވަނުމަށް ނަގާފައިވާ ކޯޓު އަމުރުގައި އެއްވެސް އެއްޗެއް ހިފެހެއްޓުމުގެ ބާރު އެ މުއައްސަސާއަށް ދީފައި ނުވި ނަމަވެސް، މި ނޫހުގެ ނޫސްވެރިންގެ އިލެކްޓްރޯނިކް ސާމާނު ހިފަހައްޓާފައިވާކަން އެ ބަޔާނުގައި ފާހަގަކޮށްފައިވެ އެވެ.
އަދި، އަދަދު ނޫހުގެ އޮފީސް ފުލުހުން ބަލައި ފާސްކޮށްފައި ވަނީ ޖިނާއީ އިޖުރާއަތުގެ ގާނޫނުގައި ބަޔާންކޮށްފައިވާ ނޫސްވެރިކަމާ ގުޅޭ ތަންތަން ބަލައި ފާސްކުރުމުގައި އަމަލުކުރަންޖެހޭ ގޮތާ ހިލާފަށްކަމަށް މި ނޫހުގެ ގާނޫނީ ވަކީލުންނާ ހަވާލާދީ އެ ބަޔާނުގައި ބުނެފައިވެ އެވެ.
ޖިނާއީ އިޖުރާއަތުގެ ގާނޫނުގެ 74.4 ވަނަ މާއްދާގެ (ބ) ގައި ބަޔާންކޮށްފައި ވަނީ ނޫސްވެރިކަމުގެ އިތުރުން ވެސް ގާނޫނީ އަދި ސިއްހީ ދާއިރާ ފަދަ ވަކި އިދާރާއަކުން ރެގިއުލޭޓުކުރާ ޕްރޮފެޝަންއަކަށް ނިސްބަތްވާ ބައެއްގެ ކޮމްޕިޓަރު ޑޭޓާ ބަލައި ފާސްކުރެވޭނީ، ރެގިއުލޭޓު ކުރާ ޕްރޮފެޝަނަލް އިދާރާއަކުން، އެ ޕްރޮފެޝަނެއް ތަމްސީލުކުރަން ކަނޑައަޅާ މީހެއްގެ ހާޒިރުގައި ކަމަށެވެ.
އެކަން އެގޮތަށް ކުރަންޖެހޭނެ ކަމަށް ޖިނާއީ މައްސަލަތައް ތަހުގީގު ކުރުމުގައި އަމަލުކުރާނެ އިޖުރާއަތުގެ ގަވާއިދުގެ 155-2 ވަނަ މާއްދާގެ (ށ) ގައި ވެސް ބަޔާން ކޮށްފައިވެ އެވެ. އެ މާއްދާގެ (އ) ގައި ބަޔާން ކޮށްފައި ވަނީ އެ ގަވާއިދަށް އަމަލުކުރަން ފަށާތާ ތިން މަސްދުވަހުގެ ތެރޭގައި ޕްރޮފެޝަނަލް އިދާރާތައް ތަމްސީލުކުރާނެ ފަރާތްތައް އެ އިދާރާއަކުން ކަނޑައަޅައި، އެ މީހެއްގެ ފޯނު ނަންބަރާއި އީމެއިލް އެޑްރެސް ފުލުހުންނަށް އަންގަންވާނެ ކަމަށެވެ.
ގާނޫނުގައި އާއި ގަވާއިދުގައި އެހެން ބަޔާން ކޮށްފައި އޮތް ނަމަވެސް، އަދަދު ނޫސް ބަލައި ފާސްކުރިއިރު، މީޑިއާތައް ރެގިއުލޭޓު ކުރުމަށް މިދިޔަ އަހަރު އުފެއްދި، މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ މަންދޫބެއް ހާޒިރުވެ ނެތް ކަމަށް އަދަދުގެ ގާނޫނީ ވަކީލުން ވަނީ ބުނެފަ އެވެ.
ޓްރާންސްޕޭރެންސީން ބުނީ އެއްވެސް މީހަކު ހާމަކުރާ މައުލޫމާތެއްގެ މަސްދަރު ހާމަކުރަން މަޖުބޫރުކޮށްގެން ނުވާނެ ކަމަށް ގާނޫނުއަސާސީގެ 28 ވަނަ މާއްދާގައި ބަޔާންކޮށްފައިވާ ކަމަށެވެ. ނަމަވެސް، އަދަދުގެ ނޫސްވެރިން ބޭނުންކުރަމުންދިޔަ އިލެކްޓްރޯނިކް ވަސީލަތްތައް ފުލުހުންގެ ބެލުމުގެ ދަށަށް ގެންދިޔުމުގެ ސަބަބުން އެ ނޫސްވެރިންގެ މަސްދަރުތައް ހާމަވުމުގެ ފުރުސަތު ބޮޑު ކަމަށް ޓްރާންސްޕޭރެންސީގެ ބަޔާނުގައި ބުންޏެވެ،
އޭގެ އިތުރުން ޓްރާންސްޕޭރެންސީން ވަނީ އިދިކޮޅު ފަރާތްތަކުން ކުރަމުން ގެންދާ ސިލްސިލާ މުޒާހަރާތައް ލައިވް ކުރުން ޗެނެލް 13 އަށް މަނާކޮށްފައި ވާތީ އެކަމާމެދު ވެސް ކަންބޮޑުވުން ފާޅުކޮށްފަ އެވެ.
