އަދަދު ނޫހުން ތައްޔާރުކޮށް މިދިޔަ މަހު ގެނެސްދިން "އައިޝާ" ޑޮކިއުމެންޓްރީއާ ގުޅޭގޮތުން ފުލުހުން ކުރާ ތަހުގީގަށް ބޭނުންވާ މައުލޫމާތު ސާފު ކުރުމަށް ކަމަށް ބުނެ މިއަދު ފުލުހުންގެ އިދާރާއަށް ހާޒިރު ކުރުމުން ހަނު ހުރީ ރައްޔިތުންގެ ހައްގުގައި ކަމަށާއި އުމުރު ދުވަހު ޖަލުގައި ބޭއްވިޔަސް މަސްދަރު ހާމަނުކުރާނެ ކަމަށް އަދަދު ނޫހުގެ ސީއީއޯ، ހުސެއިން ފިޔާޒު މޫސާ ވިދާޅުވެއްޖެ އެވެ.
ހެންވޭރުގައި ހުންނަ އާދަމް ހަލީމް ބިލްޑިންއަށް މިއަދު ހާޒިރުވުމަށްފަހު، އެ ތަނުގެ ބޭރުގައި ހުންނަވައި ނޫސްވެރިންނާ ވާހަކަދައްކަވަމުން ފިޔާޒު ވިދާޅުވީ އޭނާ ޖަލަށްލިޔަސް އަދި، އަދަދު ނޫހުގެ ހުރިހާ ނޫސްވެރިން ޖަލަށްލިޔަސް މަސްދަރު ހާމަނުކުރައްވާނެ ކަމަށެވެ.
"އަޅުގަނޑު ހަނު ހުރުމުގެ ހައްގު މި ބޭނުންކުރީ ދިވެހި ރައްޔިތުންގެ ހައްގުގައި އަޅުގަނޑުމެންނަށް ދޭ މައުލޫމާތަކީ ރައްކާތެރިކަމާއެކު އަޅުގަނޑުމެން ބަލަހައްޓާނެ މައުލޫމާތެއްކަން [ހާމަކޮށްދިނުމަށް]،" ފިޔާޒު ވިދާޅުވި އެވެ.
"އަޅުގަނޑުމެންނަށް މަސްދަރަކީ، އަޅުގަނޑުމެން އުމުރުދުވަހު ޖަލުގައި އޮންނާން ޖެހުނަސް އަޅުގަނޑުމެން ހިމާޔަތްކުރާނެ ކަމުގެ ޔަގީންކަން އަޅުގަނޑުމެން ދެން."
ފިޔާޒު ވިދާޅުވީ އަދަދު ނޫހަށް މައުލޫމާތު ދޭ މީހުން އެއްވެސް ޖެހިލުމެއް ނެތި އެކަން ކުރުމަށް އެދޭ ކަމަށެވެ. އަދި، ކުރިއަށް އޮތް ތަނުގައި ވެސް އަދަދު ނޫހަށް މައުލޫމާތު ދޭ އެއްވެސް މަސްދަރެއް ހާމަނުކުރައްވާނެ ކަމުގެ ޔަގީންކަން އެ ފަރާތްތަކަށް އަރުވާ ކަމަށް އޭނާ ވިދާޅުވި އެވެ.
ފުލުސް އޮފީހަށް ފިޔާޒު މިއަދު ހާޒިރުކުރީ އަދަދު ނޫހުން ގެނެސްދިން "އައިޝާ" ޑޮކިއުމެންޓްރީގައި ރައީސުލްޖުމްހޫރިއްޔާ މުހައްމަދު މުއިއްޒުއަށް ގަޒުފުކޮށްފައިވާ ކަމަށް ތުހުމަތު ކުރެވޭ ކަމަށް ބުނެ ސަރުކާރުން އަންގައިގެން ފުލުހުން ތަހުގީގު ކުރަމުން ގެންދާ މައްސަލައިގެ ތަހުގީގަށް ބޭނުންވާ މައުލޫމާތު ސާފު ކުރުމަށެވެ.
ފިޔާޒުގެ މައްޗަށް ފުލުހުން ވަނީ ޖިނާއީ ފަސް ކުށެއްގެ ދައުވާ އުފުލައިފަ އެވެ.
ފިޔާޒުގެ މައްޗަށް ކުރާ ޖިނާއީ ތުހުމަތުތައް
- މީހަކު ކުރާ އަމަލަކަށް އެހެން މީހާކު ޒިންމާދާރުކުރުވުން، ބައިވެރިވުމުގެ ޒިންމާގެ ކުށް - ގާނޫނުލްއުގޫބާތުގެ 30 ވަނަ މާއްދާ
- މީހަކު ކުރާ އަމަލަކަށް އެހެން މީހާކު ޒިންމާދާރުކުރުވުން، ބައިވެރިވުމުގެ ޒިންމާގެ ކުށް - ގާނޫނުލްއުގޫބާތުގެ 30 ވަނަ މާއްދާގެ ހ. ގެ ދެވަނަ ނަންބަރުގެ ދަށުން
- ގަޛްފުގެ ކުށް - ގާނޫނުލްއުގޫބާތުގެ 612 ވަނަ މާއްދާ
- ކުށެއް ކުރުމަށް އެދުން - ގާނޫނުލްއުގޫބާތުގެ 81 ވަނަ މާއްދާ
- ކުށެއް ކުރުމަށް ރޭވުން - ގާނޫނުލްއުގޫބާތުގެ 82 ވަނަ މާއްދާ
ފިޔާޒުގެ އިތުރުން އެ މައްސަލައިގައި އަދަދު ނޫހުގެ މެނޭޖިން އެޑިޓަރު، ހަސަން މުހައްމަދު ވެސް މިއަދު ވަނީ ފުލުސް އޮފީހަށް ހާޒިރުކޮށްފަ އެވެ. އޭނާގެ މައްޗަށް ވެސް ފުލުހުން ކުރަނީ ޖިނާއީ މި ތުހުމަތުތަކެވެ. ހަސަން ވެސް ވަނީ ފުލުހަށް ހާޒިރުވެ، ހަނުހުރުމުގެ ހައްގުގެ ބޭނުންކޮށްފަ އެވެ.
"އައިޝާ" ޑޮކިއުމެންޓްރީ ގެނެސްދިންތާ މަސް ދުވަސް ފަހުން ފުލުހުން ޖިނާއީ ތަހުގީގެއް ހިންގަން ފެށީ ހޯމަ ދުވަހުގެ ހެނދުނު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އެކަމާ ބެހޭގޮތުން މުއިއްޒުއާ ސުވާލުކުރުމުންނެވެ. އެމަނިކުފާނު ދެއްވި ޖަވާބުގައި އެ ތުހުމަތުތައް ދޮގުކުރައްވަމުން، އެ މައްސަލައިގައި ދައުވާކުރާނެ ކަމަށް ވިދާޅުވި އެވެ.
އެއަށް ފަހު، ފުލުހުން ވަނީ އެ ރޭ އަދަދު ނޫހުގެ އޮފީހަށް ކޯޓު އަމުރެއްގެ ދަށުން ވަދެ، ގިނަ އަދަދެއްގެ އިލެކްޓްރޯނިކްސް އެ މުއައްސަސާގެ ބެލުމުގެ ދަށަށް ގެންގޮސްފަ އެވެ.
އެ މައްސަލައިގައި ކޯޓު އަމުރެއްގެ ދަށުން ފިޔާޒު އާއި ހަސަންގެ ޕާސްޕޯޓު ހިފަހައްޓައި، ރާއްޖެއިން ބޭރަށް ފުރުން ވަނީ މަނާކޮށްފަ އެވެ.
އޭގެ އިތުރުން، "އައިޝާ" ޑޮކިއުމެންޓްރީއާ ގުޅިގެން ކަމަށް ބުނެ އިތުރު މީހެއްގެ ޕާސްޕޯޓު ވެސް ފުލުހުން ވަނީ ކޯޓު އަމުރެއްގެ ދަށުން އިއްޔެ ހިފަހައްޓައިފަ އެވެ. އެއީ ކުރިން ރައީސް އޮފީހުގައި މަސައްކަތްކުރި މުވައްޒަފެއްކަން އެނގިފައިވެ އެވެ. ނަމަވެސް، އޭނާއާ "އައިޝާ" ޑޮކިއުމެންޓްރީއާ ހުރީ ކޮން ގުޅުމެއްކަމެއް ފުލުހުން މިހައިތަނަށް ހާމައެއް ނުކުރެ އެވެ.
