ގާނޫނަކުން ރެގިއުލޭޓުކުރާ ޕްރޮފެޝަނެއްގެ ހަރަކާތްތައް އެކުލެވިގެންވާ މައުލޫމާތު ހިމެނޭ ކޮމްޕިއުޓަރު ޑޭޓާ ފުލުހުން ބަލައި ފާސްކުރާއިރު، ހާޒިރުވެ ހުންނަ މީހާގެ ގޮތުގައި މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން ކަނޑައަޅަން ގާނޫނުން ލާޒިމުކޮށްފައިވާ މީހާގެ މައުލޫމާތު ހިއްސާކޮށްދިނުމަށް މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން އެދިއްޖެ އެވެ.
އެމްޖޭއޭއިން މިއަދު ކޮންޓްރޯލް ކޮމިޝަނަށް ފޮނުވި ސިޓީއެއްގައި ބުނީ ގާނޫނެއްގެ ދަށުން ރެގިއުލޭޓުކުރާ ޕްރޮފެޝަނެއްގައި މަސައްކަތް ކުރާ ބައެއްގެ ކޮމްޕިޓަރު ޑޭޓާ ފުލުހުންނަށް ބެލޭނީ އެ ޕްރޮފެޝަނެއް ރެގިއުލޭޓު ކުރުމުގެ ޒިންމާ މަތިކޮށްފައިވާ އިދާރާއަކުން އެ ޕްރޮފެޝަނެއް ތަމްސީލުކުރަން ކަނޑައަޅާ މީހެއްގެ ހާޒިރުގައި ކަމަށް ގާނޫނުގައި ބަޔާން ކޮށްފައިވާ ކަމަށެވެ.
އެހެންކަމުން، އެމްޖޭއޭއިން އެދިފައި ވަނީ ގާނޫނުގައި ލާޒިމުކޮށްފައިވާ ގޮތަށް ނޫސްވެރިކަން ތަމްސީލު ކުރުމަށް ކޮންޓްރޯލް ކޮމިޝަނުން ކަނޑައަޅާފައިވާ މީހާގެ މައުލޫމާތާއި އެ މީހާގެ މައުލޫމާތު ފުލުހުންނާ ހިއްސާކުރި ތާރީހު އެ ޖަމިއްޔާއާ ހިއްސާކޮށްދިނުމަށެވެ.
އެމްޖޭއޭގެ ސިޓީގައި ހަވާލާދީފައި ވަނީ ޖިނާއީ އިޖުރާއަތުގެ ގާނޫނުގެ 74.4 ވަނަ މާއްދާގެ (ބ) އަދި ޖިނާއީ މައްސަލަތައް ތަހުގީގު ކުރުމުގައި ފުލުހުން އަމަުކުރާނެ އިޖުރާއަތުގެ ގަވާއިދުގެ 155-2 ވަނަ މާއްދާގެ (ށ) އަށެވެ.
ޖިނާއީ އިޖުރާއަތުގެ ގާނޫނުގެ 74.4 ވަނަ މާއްދާގެ (ބ) ގައި ބަޔާންކޮށްފައި ވަނީ ނޫސްވެރިކަމުގެ އިތުރުން ވެސް ގާނޫނީ އަދި ސިއްހީ ދާއިރާ ފަދަ ވަކި އިދާރާއަކުން ރެގިއުލޭޓުކުރާ ޕްރޮފެޝަންއަކަށް ނިސްބަތްވާ ބައެއްގެ ކޮމްޕިޓަރު ޑޭޓާ ބަލައި ފާސްކުރެވޭނީ، ރެގިއުލޭޓު ކުރާ ޕްރޮފެޝަނަލް އިދާރާއަކުން، އެ ޕްރޮފެޝަނެއް ތަމްސީލުކުރަން ކަނޑައަޅާ މީހެއްގެ ހާޒިރުގައި ކަމަށެވެ.
އެކަން އެގޮތަށް ކުރަންޖެހޭނެ ކަމަށް ޖިނާއީ މައްސަލަތައް ތަހުގީގު ކުރުމުގައި އަމަލުކުރާނެ އިޖުރާއަތުގެ ގަވާއިދުގެ 155-2 ވަނަ މާއްދާގެ (ށ) ގައި ވެސް ބަޔާން ކޮށްފައިވެ އެވެ. އެ މާއްދާގެ (އ) ގައި ބަޔާން ކޮށްފައި ވަނީ އެ ގަވާއިދަށް އަމަލުކުރަން ފަށާތާ ތިން މަސްދުވަހުގެ ތެރޭގައި ޕްރޮފެޝަނަލް އިދާރާތައް ތަމްސީލުކުރާނެ ފަރާތްތައް އެ އިދާރާއަކުން ކަނޑައަޅައި، އެ މީހެއްގެ ފޯނު ނަންބަރާއި އީމެއިލް އެޑްރެސް ފުލުހުންނަށް އަންގަންވާނެ ކަމަށެވެ.
އެމްޖޭއޭއިން އެދިފައި ވަނީ މި ހަފުތާގެ ބުރާސްފަތި ދުވަހުގެ މެންދުރުފަހު، 2:00 ގެ ކުރިން އެ މައުލޫމާތު ހިއްސާކޮށްދިނުމަށެވެ.
ނޫސްވެރިކަން ތަމްސީލުކުރަން ކޮންޓްރޯލް ކޮމިޝަނުން ކަނޑައަޅާފައިވާ މީހާގެ މައުލޫމާތު ހޯދުމަށް އެދި އެމްޖޭއޭއިން އެ ކޮމިޝަނަށް ސިޓީއެއް ފޮނުވާފައި މި ވަނީ މިދިޔަ ހޯމަ ދުވަހުގެރޭ އަދަދު ނޫހުގެ އޮފީހަށް ފުލުހުން ވަދެ، މި ނޫހުގެ ނޫސްވެރިން މަސައްކަތް ކުރުމަށް ބޭނުންކުރާ ލެޕްޓޮޕްތަކާއި ކޮމްޕިއުޓަރުތައް ހިމެނޭހެން ގިނަ އަދަދެއްގެ އިލެކްޓްރޯނިކް ވަސީލަތްތައް ފުލުހުން ހިފަހައްޓާފައިވާ ދަނޑިވަޅެއްގަ އެވެ.
އަދަދު ނޫހުގެ އޮފީހަށް ފުލުހުން ވަދެ ބަލައި ފާސްކުރީ، މާޗް 28، ގައި މި ނޫހުގެ ސޯޝަލްމީޑިއާގެ މަންސަތަކުގައި އާންމުކުރި "އައިޝާ" ޑޮކިއުމެންޓްރީއާ ގުޅިގެން އެ މުއްސަސާއިން ހިންގާ ތަހުގީގަކަށް ހެކި ނެގުމަށް ކަމަށް ބުނެ އެވެ.
އެ ޑޮކިއުމަންޓްރީގައި ރައީސުލްޖުމްހޫރިއްޔާގެ އޮފީހުގެ ކުރީގެ މުވައްޒަފަކު ވަނީ ރައީސް މުއިއްޒާއެކު ޒާތީ ގުޅުމެއް އޮތް ކަމަށް ބުނެ ބޮޑެތި ތުހުމަތުތަކެއް ކޮށްފަ އެވެ. އެ މައްސަލައިގެ ޖިނާއީ ތަހުގީގެއް ފަށައި އަދަދުގެ އޮފީސް ރެއިޑުކޮށް އިސްވެރިންގެ ޕާސްޕޯޓު ހިފަހައްޓައި ފުލުހަށް ހާޒިރުވާން ވަނީ އަންގާފަ އެވެ.
އަދަދު އިން އައިޝާ ޑޮކިއުމެންޓްރީ ގެނެސްދިންތާ މަސް ދުވަސް ފަހުން، މި މައްސަލައިގައި ޖިނާއީ ތަހުގީގެއް ފެށީ ހޯމަ ދުވަހު އޮތް ނޫސްވެރިންގެ ބައްދަލުވުމުގައި އެ ޑޮކިއުމެންޓްރީގައި ރައީސްއަށް ކުރި ތުހުމަތުތަކާ ގުޅިގެން ރައީސް މުހައްމަދު މުއިއްޒުއާ އަދަދުގެ ނޫސްވެރިއަކު ސުވާލުކުރި ހިސާބުންނެވެ. އެމަނިކުފާނު ދެއްވި ޖަވާބުގައި އެ ތުހުމަތުތައް ދޮގުކުރަމުން، އެ މައްސަލައިގައި ދައުވާކުރާނެ ކަމަށް ވިދާޅުވި އެވެ.
