ރައީސުލްޖުމްހޫރިއްޔާ، މުހައްމަދު މުއިއްޒު ޒިންމާދާކުރާ ނޫސްވެރިންނަށް ޖިނާއީ ކުށްތަކުގެ ތުހުމަތުކޮށްގެން ބިރުދައްކައި އެ މީހުންގެ އަޑު ކަނޑުވާލަން ކުރާ މަސައްކަތް ވަގުތުން ހުއްޓާލުމަށް ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ދިވެހި ސަރުކާރަށް ގޮވާލައިފި އެވެ.
ނޫސްވެރިންގެ ހައްގުތަކަށް މަސައްކަތްކުރާ ބައިނަލްއަގުވާމީ ޖަމިއްޔާއިން އިއްޔެ ނެރުނު ބަޔާނެއްގައި ދިވެހި ސަރުކާރަށް ގޮވާލާފައި ވަނީ ފުލުހުންގެ ބެލުމުގެ ދަށުގައި ހުރި އަދަދު ނޫހުގެ ބައެއް އިލެކްޓްރޯނިކް ސާމާނު ވަގުތުން ދޫކޮށްލުމަށެވެ. އަދި މި ނޫހުގެ މުވައްޒަފުންގެ ޕާސްޕޯޓު ހިފަހައްޓައި ރާއްޖެއިން ބޭރަށް ދިޔުން މަނާ ކުރުމަށް ނެރެފައިވާ އަމުރުތައް ވަގުތުން އުވާލުމަށް ވެސް އެ ޖަމިއްޔާއިން ވަނީ ކަމާބެހޭ ފަރާތްތަކަށް ގޮވާލައިފަ އެވެ.
"މިނިވަން ނޫހެއް ކަމަށްވާ އަދަދު ނޫހުން ހިފެހެއްޓި ތަކެތި ވަގުތުން ވަގުތަށް ދޫކޮށްލުމަށާއި އެ ނޫހުގެ މުވައްޒަފުންގެ މައްޗަށް ނެރެފައިވާ ދަތުރުފަތުރު ކުރުން މަނާކުރާ އަމުރުތައް އުވައިލުމަށާއި ރައީސުލްޖުމްހޫރިއްޔާއާ ގުޅޭގޮތުން ހަބަރު ފެތުރުން ހުއްޓުވުމަށްޓަކައި ކުރަމުންދާ ޖިނާއީ ތުހުމަތުތައް ހުއްޓާލުމަށް ދިވެހިރާއްޖޭގެ ކަމާބެހޭ އިދާރާތަކަށް ގޮވާލަން،" ސީޕީޖޭގެ ބަޔާނުގައި ބުންޏެވެ.
އަދަދު ނޫހުން "އައިޝާ" ޑޮކިއުމެންޓްރީ ގެނެސްދިންތާ މަސް ދުވަސް ފަހުން ފުލުހުން ޖިނާއީ ތަހުގީގެއް ހިންގަން ފެށީ ހޯމަ ދުވަހުގެ ހެނދުނު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި އެކަމާ ބެހޭގޮތުން މުއިއްޒުއާ ސުވާލުކުރުމުންނެވެ. އެމަނިކުފާނު ދެއްވި ޖަވާބުގައި އެ ތުހުމަތުތައް ދޮގުކުރައްވަމުން، އެ މައްސަލައިގައި ދައުވާކުރާނެ ކަމަށް ވިދާޅުވި އެވެ.
އެއަށް ފަހު، ފުލުހުން ވަނީ އެ ރޭ އަދަދު ނޫހުގެ އޮފީހަށް ކޯޓު އަމުރެއްގެ ދަށުން ވަދެ، ގިނަ އަދަދެއްގެ އިލެކްޓްރޯނިކްސް އެ މުއައްސަސާގެ ބެލުމުގެ ދަށަށް ގެންގޮސްފަ އެވެ.
އެ މައްސަލައިގައި ކޯޓު އަމުރެއްގެ ދަށުން ފިޔާޒު އާއި ހަސަންގެ ޕާސްޕޯޓު ހިފަހައްޓައި، ރާއްޖެއިން ބޭރަށް ފުރުން ވަނީ މަނާކޮށްފަ އެވެ.
އޭގެ އިތުރުން، "އައިޝާ" ޑޮކިއުމެންޓްރީއާ ގުޅިގެން ކަމަށް ބުނެ އިތުރު މީހެއްގެ ޕާސްޕޯޓު ވެސް ފުލުހުން ވަނީ ކޯޓު އަމުރެއްގެ ދަށުން އިއްޔެ ހިފަހައްޓައިފަ އެވެ. އެއީ ކުރިން ރައީސް އޮފީހުގައި މަސައްކަތްކުރި މުވައްޒަފެއްކަން އެނގިފައިވެ އެވެ. ނަމަވެސް، އޭނާއާ "އައިޝާ" ޑޮކިއުމެންޓްރީއާ ހުރީ ކޮން ގުޅުމެއްކަމެއް ފުލުހުން މިހައިތަނަށް ހާމައެއް ނުކުރެ އެވެ.
އެކަމާ ގުޅޭގޮތުން ސީޕީޖޭގެ އޭޝިއާ ޕެސިފިކް ޕްރޮގްރާމްގެ ކޯޑިނޭޓަރު، ކުނާލް މަޖުމްދަރު ވިދާޅުވީ ދީނީ ނިވާފަތްގަނޑު ބޭނުންކޮށްގެން މީޑިއާގެ ގަވާއިދުތަކުގެ ބޭރުން އަމަލުކުރުމަކީ ވަރަށް ނުރައްކާތެރި ނަތީޖާއެއް ނުކުމެދާނެ ކަމެއްކަމަށެވެ.
"އަދަދު ނޫހަށް ވަދެގަތުމާއި ދަތުރުފަތުރުކުރުން [އެ ނޫހުގެ މުވައްޒަފުންނަށް] މަނާކުރުމަކީ ދީނީ އަދި ގައުމީ މަސްލަހަތުގެ ނަމުގައި ތަހުގީގީ ނޫސްވެރިކަން އެއީ ކުށެއްގެ ގޮތުގައި ކަނޑައެޅުމަށް ކުރާ މަސައްކަތެއް،" ކުނާލް ވިދާޅުވި އެވެ.
"ސަރުކާރުގެ އިދާރާތައް ޖަވާބުދާރީ ކުރުވުމުގެ ފުރުސަތު ނޫސްވެރިންނަށް ދޭންޖެހޭނެ."
ސީޕީޖޭއަކީ ނޫސްވެރިންގެ ބަލަދުވެރިއެއްގެ ދައުރު އަދާކުރާ ބައިނަލްއަގުވާމީ ޖަމިއްޔާއެކެވެ. އެ ޖަމިއްޔާއަކީ ދުނިޔޭގެ އެކި ކަންކޮޅުގައި ހަރަކާތްތެރިވާ ނޫސްވެރިންނަށް ކުރިމަތިވާ ބޭއިންސާފާއި ނުރައްކާތައް ދިރާސާކޮށް ނޫސްވެރިންގެ ހައްގުގައި މަސައްކަތް ކުރާ ޖަމިއްޔާއެކެވެ.
