މެޑްރިޑް (އޭޕްރީލް 30) - ޔުއެފާ ޗެމްޕިއަންސް ލީގުގައި ރޭ ކުޅުނު ސެމީ ފައިނަލް ދެ ވަނަ މެޗުގައި އެތުލެޓިކޯ މެޑްރިޑާއި އާސެނަލުން 1-1 އިން އެއްވަރުވެއްޖެ އެވެ.
ސެމީ ފައިނަލް ފުރަތަމަ މެޗުގައި ޕީއެސްޖީން 5-4 އިން ބަޔާން ބަލިކޮށް، ފޯރިގަދަ މެޗެއް ފެނުނު ނަމަވެސް، ރޭ އާސެނަލާއި އެތުލެޓިކޯ ކުޅުނު ސެމީގައި ދެ ޓީމުން ވެސް ލަނޑު ޖަހާފައިވަނީ ލިބުނު ޕެނަލްޓީ އަކުންނެވެ.
އެތުލެޓިކޯގެ ސްޓޭޑިއަމް ވަންޑާ ޕެޓްރޮޕޮލިޓާނޯ ސްޓޭޑިއަމްގައި ރޭ ކުޅުނު މެޗުގައި އާސެނަލުން ލީޑުނެގީ 44 ވަނަ މިނިޓްގައި ސްވިޑެންގެ ފޯވާޑް، ވިކްޓަ ޔޯކެރޭޝް ޖެހި ޕެނަލްޓީންނެވެ. މިއީ، އޭރިއާތެރެއިން ޔޯކެރޭޝް އަށް އެތުލެޓިކޯގެ ޑިފެންޑަރު ޑޭވިޑް ހަންކޯ ކުރި ފައުލަަކަށް ދިން ޕެނަލްޓީ އެކެވެ. މިއީ، ޕެނަލްޓީއެއްތޯ ޔަގީންކުރަން، ވީޑިއޯ އެސިސްޓަންޓް ރެފްރީ (ވީއޭއާރް) އިން އަންގައިގެން ދަނޑުގަައި ހުންނަ މޮނީޓަރުން ވެސް ބެލި އެވެ.
ފުރަތަމަ ހާފުގައި އެތުލެޓިކޯގެ ހޫލިއަން އަލްވަރޭޒް ފޮނުވާލި ރަނގަޅު ހަމަލާއެއް އާސެނަލްގެ ކީޕަރު ޑޭވިޑް ރާޔާ ވަނީ މަތަކޮށްފަ އެވެ. އެކަމަކު، ދެ ވަނަ ހާފުގެ ކުޅުން ފަށައިގެން 11 މިނިޓް ތެރޭ އެތުލެޓިކޯ އިން އެއްވަރުކުރި އެވެ. މިއީ، ޕެނަލްޓީ އަކުން އަލްވަރޭޒް ޖެހި ލަނޑެކެވެ. މި ޕެނަލްޓީ ދިނީ، އެތުލެޓިކޯގެ މާކޯސް ލޮރެންޓޭ ޖެހި ޝޮޓެއް އާސެނަލްގެ ޑިފެންޑަރު، ބެން ވައިޓް އަތުގައި ޖެހުމުން، ވީއޭއާރް އިން އަންގައިގެން، މޮނީޓަރުން ވެސް ބަލައިފަ އެވެ.
އޭގެ ފަހުން، އެތުލެޓިކޯ އަށް ލީޑުނަގައިދޭން އަންޓުއާން ގްރީޒްމަން ޖެހި ޝޮޓެއް ވަނީ ހުރަސްދަނޑިއަށް އަމާޒުވެފަ އެވެ. އަދި، ފަހުން، އޭރިއާތެރެއިން އެތުލެޓިކޯގެ އަޑެމޯލާ ލުކްމަން އަށް ލިބުނު ފުރުސަތުގައި އޭނާ ފޮނުވާލި ބޯޅައެއް ކީޕަރު ރާޔާ އަތަށް އަމާޒުވިއިރު، ހިލޭޖެހުމަކުން އަލްވަރޭޒް ފޮނުވާލި ބޯޅަ އަމާޒުވީ އަރިމަތީ ދާގަނޑަށެވެ.
މެޗުގެ ރެފްރީ ވަނީ ފަހުން ވެސް އާސެނަލަށް ޕެނަލްޓީއެއް ދޭން ނިންމައިފަ އެވެ. އެ ގޮތުން، އާސެނަލްގެ އެބެރެޗީ އެޒޭ އަށް ހަންކޯ ކުރި ފައުލަކަށް ރެފްރީ ފުރަތަމަ ނިންމީ ޕެނަލްޓީއެއް ދިނުމަށެވެ. އެކަމަކު، ވީއޭއާރް އިން އެންގުމުން، މޮނީޓަރުން ބެލުމަށް ފަހު، ރެފްރީ ނިންމާފައިވަނީ ޕެނަލްޓީއެއް ދޭން ނުޖެހޭ ކަމަށެވެ. އެ ނިންމުމާ މެދު އާސެނަލުން ވަރަށް ބޮޑަށް ނުރުހުން ފާޅުކުރި އެވެ.
ރޭގެ މެޗު އެއްވަރުވުމުން، އާސެނަލުން މި ވަނީ މި ފަަހަރުގެ ޗެމްޕިއަންސް ލީގުގައި ބަލިނުވެ 13 މެޗު ހަމަކޮށްފަ އެވެ. އެންމެ ފަހުން، އެ ޓީމުން ޗެމްޕިއަންސް ލީގެއްގައި ބަލިނުވެ، އެ އަަދަަދަށް މެޗު ހަމަކުރި ފަހަރު ފައިނަލުގައި ކުޅުނެވެ. އެއީ، 2006 ވަނަ އަހަރުގެ ފައިނަލުގައި ބާސެލޯނާ އަތުން އާސެނަލް ބަލިވި ފަހަރެވެ.
މި ފަހަރުގެ ފައިނަލުން ޖާގަ ހޯދަން އަންނަ ހަފްތާގައި އަމިއްލަ ދަނޑުގައި ކުޅޭ މެޗުގައި އާސެނަލުން އެތުލެޓިކޯ ބަލިކުރަން ޖެހޭނެ އެވެ.
