މެންޗެސްޓާ (އޭޕްރީލް 19) - އިނގިރޭސި ޕްރިމިއާ ލީގުގައި މިރޭ އާސެނަލް 2-1 އިން ބަލިކޮށް އެންމެ ފަހުގެ މެންޗެސްޓާ ސިޓީން މި ފަހަރުގެ ލީގު ކާމިޔާބު ކުރުމުގެ އުންމީދު ބޮޑުކޮށްފި އެވެ.
މި މެޗުން އާސެނަލް މޮޅުވިނަމަ، ސިޓީއާ ދެމެދު ލީޑެއް ނަގައި، 22 އަހަރު ތެރޭ ފުރަތަމަ ފަހަރަށް ލީގު ޗެމްޕިއަންކަން ހޯދަން އެ ޓީމަށް ބޮޑު ފުރުސަތެއް ފަހިކުރެވޭނެ އެވެ. އެކަމަކު، ސިޓީ އަތުން ބަލިވެ، އާސެނަލަށް 200 ދުވަސް ތެރޭ ފުރަތަމަ ފަހަރަށް މި ހަފްތާގައި ލީގު އެއް ވަނަ ގެއްލުމުގެ ފުރުސަތު އޮތީ ބޮޑުވެފަ އެވެ. އާސެނަލް މި ވަގުތު އެއް ވަނައިގައި އޮތީ ތިން ޕޮއިންޓުގެ ލީޑަކާ އެކު އެވެ. އެއީ، 33 މެޗުން 70 ޕޮއިންޓާ އެކު އެވެ. ދެ ވަަނައިގައި އޮތް ސިޓީ އަށް 32 މެޗުން 67 ޕޮއިންޓް ލިބިފައިވާއިރު، ބުދަ ދުވަހުގެރޭ ބާންލީ އަތުން މޮޅުވެގެން ސިޓީ އަށް ލީގު އެއް ވަނަ އަށް އެރުމުގެ ފުރުސަތު އެބައޮތެވެ.
އިއްތިހާދު ސްޓޭޑިއަމްގައި މިރޭ ކުޅުނު މެޗުގައި ސިޓީން ވަނީ 16 ވަނަ މިނިޓްގައި ލީޑުަނަގައިފަ އެވެ. މިއީ، ސިޓީގެ ފްރާންސް ތަރި، ރަޔާން ޗާކީ، އާސެނަލްގެ ތިން ކުޅުންތެރިން ކައިރިން ދެމިގަތުމަށް ފަހު، އޭރިއާތެރެއިން ގޯލުގެ ތިރި ކަނަށް ބޯޅަ އަމާޒުކޮށްލައިގެން ޖެހި ގޯލެކެވެ. މި ލަނޑު ޖެހުމުގެ ކުރިން، ސިޓީން ފޮނުވާލި ހަމަލާއެއް ގޯލުގެ ދަނޑިއަށް އަމާޒުވިި އެވެ.
ސިޓީ އަށް ލީޑުގައި އޮވެވުނީ މަދުވަގުތުުކޮޅެއްގަ އެވެ. ޗާކީ ލަނޑު ޖެހިތާ 104 ސިކުންތު ފަހުން، އާސެނަލުން ވަނީ އެއްވަރުކޮށްފަ އެވެ. މިއީ ސިޓީގެ ކީޕަރު، ޖިއަންލުއީޖީ ޑޮނަރުންމާ ހެދި ގޯހެއްގެ ފައިދާނަގައި، ކައި ހަވާޓްޒް ޖެހި ގޯލެކެވެ. ސިޓީގެ ފަހަތަށް އައި ބޯޅައެއް ފޮނުވާލުން ލަސްކޮށްލައި، ޑޮނަރުންމާ ޖެހި ބޯޅަ ގޯލަށް ވަނީ ހަވާޓްޒް ފައިގައި ޖެހިފަ އެވެ.
ދެ ވަނަ ހާފުގައި އާސެނަލުން ލަނޑެއް ޖަހަން ކުރި މަސައްކަތުގައި އެބެރެޗީ އެޒޭ އާއި ގަބްރިއެލް މަގާޅައެސް ފޮނުވާލި ހަމަލާތައް ގޯލުގެ ދަނޑިއަށް އަމާޒުވި އެވެ. އަދި، ހަވާޓްޒް ޖެހި ބޯޅައެއް ކީޕަރު ޑޮނަރުންމާ ވަނީ މަތަކޮށްފަ އެވެ. މެޗުން ސިޓީ މޮޅުވި ގޯލު ޖެހީ މެޗުގެ 65 ވަނަ މިނިޓްގައި އާލިން ބްރައުޓް ހާލަންޑް އެވެ. އޭރިއާތެރެއިން ލިބުނު ބޯޅަ ހަވާޓްޒް ވަނީ ގޯލުގެ ތިރީ ކަނަށް ފޮނުވާލައިފަ އެވެ.
އިތުރު ވަގުުތުގެ ތެރޭގައި، އާސެނަލުން އެއްވަރުކުރަން ހަވާޓްޒް އަށް ލިބުނު ފުރުސަތެއްގައި ބޮލުން ޖެހި ބޯޅަ ދިޔައީ ހުރަސްދަނޑިމަތިންނެވެ.
އިނގިރޭސި ޕްރިމިއާ ލީގުގައި މިރޭ 100 ވަނަ މިނިޓްގައި ވާޖިލް ވެން ޑައިކް ބޮލުން ޖެހި ގޯލުން ލިވަޕޫލުން ވަނީ 2-1 އިން އެވަޓަން ބަލިކޮށްފަ އެވެ. މިއީ، އެވަޓަންގެ އާ ސްޓޭޑިއަމްގައި، ހިލް ޑިކިންސަން ސްޓޭޑިއަމްގައި ލިވަޕޫލާ ދެކޮޅަށް ކުޅުނު ފުރަތަމަ މެޗެވެ. މި މެޗުގައި މުހައްމަދު ސަލާހު ލިވަޕޫލަށް ލީޑުނަގައިދިންއިރު، ދެ ވަނަ ހާފުގައި އެވަޓަން އިން އެއްވަރުކުރީ ބޭޓޯ އެވެ.
ސަންޑަލެންޑް ކައިރިން އެސްޓަން ވިލާ މޮޅުވީ 4-3 އިންނެވެ. މި މެޗުގައި އެސްޓަން ވިލާ އިން ދެ ގޯލުގެ ލީޑެއްގައި އޮއްވައި، ސަންޑަލެންޑުން އެއްވަރުކުރި ނަމަވެސް، އިތުރު ވަގުތުގެ ތެރޭގައި، އެސްޓަން ވިލާ މޮޅުކޮށްދިނީ ޓެމީ އަބްރަހަމް އެވެ. ބާންލީ އަތުން ފަހަތުން އަރައި 4-1 އިން ނޮޓިންހަމް ފޮރެސްޓް މޮޅުވިއިރު، އެ ޓީމުގެ ތަރި، މޯގަން ގިބްސް ވައިޓް ވަނީ ހެޓްރިކެއް ހަދައިފަ އެވެ.
އެސްޓަން ވިލާ، ލީގުގެ ހަތަރެއްގައި އޮތީ ތިން ވަނައިގައި އޮތް މެންެޗެސްޓާ ޔުނައިޓެޑާ އެއްވަރަށް 33 މެޗުން 58 ޕޮއިންޓާ އެކު އެވެ. ލިވަޕޫލުން ފަސް ވަނައިގައި އޮތީ 33 މެޗުން 55 ޕޮއިންޓް ހޯދައިގެންނެވެ.
