ބުކަރެސްޓް، ރުމޭނިއާ (އޭޕްރީލް 8) - ރުމޭނިއާ ގައުމީ ފުޓްބޯޅަ ޓީމުގެ ކުރީގެ ކެޕްޓަން އަދި ކޯޗު، މިރްސެއާ ލުކެސްކޫ، ހާޓްއެޓޭކެއް ޖެހިގެން ހޮސްޕިޓަލްގައި ފަރުވާދެމުންދަނިކޮށް މަރުވެއްޖެ އެވެ.
މަރުވިއިރު، އުމުރުން 80 އަހަރުގެ ލުކެސްކޫ، ހޮސްޕިޓަލްގައި އެޑްމިޓްކުރީ މިދިޔަ ހަފްތާގެ ތެރޭފައި ޓީމުގެ ޓްރެއިނިންގައި ހުއްޓައި މެއަށް ތަދުވާތީވެ އެވެ. ސިއްހީ ހާލަތު ގޯސްވުމުން، ރުމޭނިއާ ކޯޗުކަމުން ވަކިވި، ލުކެސްކޫ، ހޮސްޕިޓަލްގައި ބާއްވައިގެން ފަރުވާ ދެމުން ދަނިކޮށް، އިތުރު ހާޓް އެޓޭކްތަކެއް ޖެހިގެން ހާލަތު ގޯސްވެ، މަރުވީ އެވެ.
ރުމޭނިއާ ފުޓްބޯޅަ ތާރީހުގައި ހާއްސަ ފަރާތެއް ކަަމަށްވާ ލުކެސްކޫގެ ކޯޗުކަމުގައި، އެ ޓީމުން މި އަހަރުގެ ޖޫން މަހު، އެމެރިކާ، މެކްސިކޯ އަދި ކެނަޑާގައި ބާއްވާ ވޯލްޑް ކަޕަށް ކޮލިފައިވުމަށް، ޔޫރަޕްގެ ކޮލިފައިން ޕްލޭއޮފް ބުރުގައި ކުޅުނެވެ. އެ ގޮތުން، ރުމޭނިއާ ވަނީ ކޮލިފައިން ޕްލޭއޮފްގެ ފުރަތަމަ މެޗުގައި، ތުރުކީ އަަތުން 1-0 އިން ބަލިވެފަ އެެވެ. ލުކެސްކޫގެ ސިއްހީ ހާލަތު ގޯސްވި އެ މެޗު ނިމުނުތާ ތިން ދުވަސް ފަހުންނެެވެ.
ކުޅުންތެރިއެއްގެ ގޮތުގައި، ރުމޭނިއާ ގައުމީ ޓީމަށް 64 މެޗު ކުޅެދިން ލުކެސްކޫ ވަނީ 1970 ވަނަ އަހަރުގެ ވޯލްޑް ކަޕްގައި އެ ޓީމުގެ ކެޕްޓަންކަން ކޮށްފަ އެވެ. ލުކެސްކޫ، އެންމެ ފުރަތަމަ ރުމޭނިއާ ކޯޗުކަމާ ހަވާލުވެ، 1984 ވަނަ އަހަރުގެ ޔޫރޯ ފުޓްބޯޅަ މުބާރާތަށް އެ ޓީމު ކޮލިފައިކޮށްދިނީ، އިޓަލީ، ސްވިޑެން އަދި ޗެކޮސްލޮވާކިއާ ހިމެނޭ ގްރޫޕެއްގެ އެއް ވަނަ ހޯދައިގެންނެެވެ.
ކޯޗިން ކެރިއަރުގައި ގިނަ ކްލަބްތަކެއްގައި މަސައްކަތްކުރި ލުކެސްކޫ ވަނީ 35 ތަށި ހޯދައިފަ އެވެ. އޭނާ ކޯޗުކޮށްދިން ޓީމުތަކުގެ ތެރޭގައި، އިންޓަ މިލާން، ޒެނިޓް ޕީޓާސްބާގް ގަލަތަސަރާއި، ބެސިކްޓާސް އަދި ޑިނަމޯ ކިއޭވް ހިމެނެ އެވެ.
މީގެ އިތުރުން، ޔޫކްރެއިންގެ ޝަހުތަރު ޑޮނެސްކަށް ވެސް ކޯޗުކޮށްދިން ލުކެސްކޫ، ރުމޭނިއާ ގައުމީ ޓީމުގެ ކޯޗުކަމަށް 38 އަހަރު ފަހުން، މީގެ ދެ އަހަރު ކުރިން އެނބުރި އައީ މި ފަހަރުގެ ވޯލްޑް ކަޕަށް އެ ޓީމު ކޮލިފައިކޮށްދޭށެވެ. ރުމޭނިއާގެ އިތުރުން ލުކެސްކޫ ވަނީ ތުރުކީ ގައުމީ ޓީމަށް ވެސް ކޯޗުކޮށްދީފަ އެވެ.
ޕްލޭއޮފްގައި ތުރުކީއާ ދެކޮޅަށް މިދިޔަ ހަފްތާގައި ކުޅުނު މެޗުގެ ކުރިން، މިދިޔަ މަހު މީޑިއާ އަށް ދިން އިންޓަވިއުއެއްގައި ލުކެސްކޫ ވަނީ އޭނާގެ ސިއްހީ ހާލަތު އެންމެ ރަނގަޅު ނޫން ކަމަށް ބުނެފަ އެވެ. އެކަމަކު، ރުމޭނިއާ ޓީމާ ހަވާލުވާނެ ރަނގަޅު ކޯޗެއް ނެތުމުން ވަޒީފާ ދޫކޮށްލެވެން ނެތް ކަމަށް ލުކެސްކޫ ވަނީ ބުނެފަ އެވެ.
