ބާސެލޯނާ (އޭޕްރީލް 23) - ބާސެލޯނާ އަށް ކުޅެމުން އަންނަ ހުނަރުވެރި ފޯވާޑް، ލަމީން ޔަމާލަށް ލިބުނު އަނިޔާގެ ސަބަބުން ސީޒަަން ނިމިއްޖެ އެވެ.
އެހެން ނަމަވެސް، ފަލަމަސްގަނޑަށް ލިބުނު އަނިޔާ އިން ރަނގަޅުވެ، ޖޫން މަހު ފަށާ ފީފާ ވޯލްޑް ކަޕަށް، އުމުރުން 18 އަހަރުގެ ޔަމާލް ފިޓްވާނެ ކަމަށް ސްޕެއިނުގެ މީޑިއާ ރިޕޯޓްތައް ބުނެފި އެވެ. ޔަމާލްގެ ފައިގެ ފަލަމަސްގަނޑަށް އަނިޔާވީ، ސްޕެނިޝް ލީގުގައި ރޭ ސެލްޓަ ވީގޯ އަތުން 1-0 އިން މޮޅުވި މެޗުގައި ޕެނަލްޓީ ޖަހަން އުޅުމުގެ ތެރޭގަ އެވެ.
ޕެނަލްޓީ ޖެހި ގޮތަށް އެނބުރި، ޔަމާލް ވަނީ ބާސެލޯނާގެ ބެންޗަށް ސިގްނަލް ދީ، އަނިޔާވިކަން އަންގައިފަ އެވެ. މެޑިކަލް އޮފިޝަލުންގެ އެހީގައި ދަނޑުން ފައިބައި، ފަރުވާ ހޯދުމަށް ފަހު، އޭގެ ފަހުން ހެދި ޓެސްޓްތަކުން އެނގުނީ، ލިބުނު އަނިޔާ ސީރިއަސް ކަމެެވެ. ސްޕެއިނުގެ މެޑިކަލް ޓީމާ ވާހަކަ ދެއްކުމަށް ފަހު، ބާސެލޯނާ އިން ޔަމާލްގެ ރިހެބިލިޓޭޝަން ޕްލޭން އެކުލަވާލައިފައިވާއިރު، ޖޫން 11 ގައި ފަށާ ވޯލްޑް ކަޕަށް ޔަމާލް ފިޓްވުމުގެ ފުރުސަތު ބޮޑެވެ.
ބާސެލޯނާ މޮޅުކޮށްދިން ޕެނަލްޓީ ޖެހި ވަގުތު ޔަމާލަށް އަނިޔާވެއްޖެ
ސްޕެނިޝް ލީގުގައި ރޭ ސެލްޓަ ވީގޯ އަތުން 1-0 އިން ބާސެލޯނާ މޮޅުކޮށްދިން ޕެނަލްޓީ ޖެހި ވަގުތު އެ ޓީމުގެ ތަރި، ލަމީން ޔަމާލަށް ވަނީ އަނިޔާވެފައި، މެޗުގެ 40 ވަނަ މިނިޓްގައި ޕެނަލްޓީ ކާމިޔާބުކުރި ގޮތަށް ޔަމާލް ވަނީ އަނިޔާވިކަން ބެންޗަށް އަންގައިފައި.
އިންސްޓަގްރާމްގައި ކުރި ޕޯސްޓެއްގައި ޔަމާލް ބުނެފައިވަނީ، އަނިޔާވެގެން ކުޅުމާ ދުރުގައި ހުންނަން ޖެހިފައި މި ވަނީ އޭނާ އެންމެ ބޮޑަށް ދަނޑުމަތީގައި ހުންނަން ބޭނުންވި ދުވަސްވަރުގައި ކަމަށެވެ. އަދި، މި ވަގުތު ލިބިފައިވާ ހިތްދަތިކަން ބަޔާންކޮށްދޭން ވެސް އުނދަގޫ ކަމަށް ޔަމާލް ވަނީ ބުނެފަ އެވެ.
މި ސީޒަނަށް ބަލާއިރު ޔަމާލް ހުރީ ރަނގަޅު ފޯމެއްގަ އެވެ. އޭނާ ވަނީ ލީގުގަައި ކުޅުނު މެޗުތަކަށް އެކަނި ބަލާއިރު، 16 ގޯލު ޖަހައި، 11 ގޯލު ޖަހަން ފުރުސަތު ތަނަވަސްކޮށްދީފަ އެވެ. ސީޒަނުގެ ހުރިހާ މުބާރާތަކަށް ބަލާނަމަ، ހުރިހާ މުބާރާތެއްގައި ކުޅުނު 45 މެޗުން ވަނީ 24 ލަނޑު ޖަހައި، 18 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
ސްޕެއިން ގައުމީ ޓީމާ އެކު، 2024 ވަނަ އަހަރުގެ ޔޫރޯ ފުޓްބޯޅަ މުބާރާތް ކާމިޔާބުކުރި ޔަމާލް ވަނީ ސްޕެއިނަށް ކުޅެދިން 25 މެޗުން ހަ ގޯލު ޖަހައިފަ އެވެ.
