ޒެނިކާ، ބޮސްނިއާ (އޭޕްރީލް 8) - ފީފާ ވޯލްޑް ކަޕް ކޮލިފައިން ޔޫރަޕްގެ ޕްލޭއޮފް ބުރުގެ ފައިނަލުގައި، ޕެނަލްޓީ ޖަހައިގެން ނަތީޖާ ނެރެން ޖެހުނު މެޗުގައި، އިޓަލީގެ ގޯލްކީޕަރު، ޖިއަންލުއީޖީ ޑޮނަރުންމާ ގެންގުޅުނު ޕެނަލްޓީތަކުގެ ކަރުދާސްކޮޅު ފޮރުވި ކަމަށް ބޮސްނިއާގެ ބޯލްބޯއީ، އަފާން ޒިޒްމިޗް ބުނެފި އެވެ.
މެޗުގެ ފުރިހަމަ ވަގުތު ހަަމަވިއިރު، އިޓަލީ އާއި ބޮސްނިއާ އޮތީ 1-1 އިން އެއްވަރުވެފަ އެވެ. ޕްލޭއޮފްގައި ޕެނަލްޓީ ޖަހައިގެން ބޮސްނިއާ އަތުން 4-1 އިން ބަލިވެ، އިޓަލީ އަށް ވަނީ ޖެހިޖެހިގެން ތިން ވަނަ ފީފާ ވޯލްޑް ކަޕުން ފުރުސަތު ގެއްލިފަ އެވެ. ހަތަރު ފަހަރު ވޯލްޑް ކަޕްގެ ޗެމްޕިއަންކަން ހޯދާފައިވާ އިޓަލީ އަކީ ވޯލްޑް ކަޕް ކާމިޔާބުކުރި ގައުމުތަކުގެ ތެރެއިން ޖެހިޖެހިގެން ތިން ވޯލްޑް ކަޕަށް ކޮލިފައިނުވި ފުރަތަމަ ގައުމެވެ.
ބޮސްނިއާގެ މީޑިއާ އަކަށް 14 އަހަރުގެ ޒިޒްމިޗް ދިން އިންޓަވިއުއެއްގައި ބުނެފައިވަނީ، ޑޮނަރުންމާ ހުރި ގޯލުގެ ދަނޑިކައިރީގައި ކަރުދާސްކޮޅެއް އޮތުމުން، އެ ނަގައި، އޭގައި ހުރި އެއްޗެއް ބަލާލިއިރު، އެ ކަރުދާސްކޮޅުގައި ލިޔެފައި އޮތީ ބޮސްނިއާ ކުޅުންތެރިން ޕެނަލްޓީ ޖަހާ ގޮތުގެ އިރުޝާދުތައް ކަމަށެެވެ.
"އަހަރެން ވަގުތުން އެ ކަރުދާސްކޮޅު ނަގައި ފޮރުވީ. އަހަންނަށް އެނގޭ އެއީ ވަރަށް މުހިންމު ކަރުދާސްކޮޅެއްކަން މެޗުން އިޓަލީ މޮޅުވުމަށްޓަކައި. އަހަންނަށް ފެނުނު އެ ކަރުދާސްކޮޅު ނުފެނިގެން ޑޮނަރުންމާ ވަަރަށް މާޔޫސްވެފައި ހުރިތަން،" ބޮސްނިއާގެ ކްލަބެއް ކަމަށްވާ ސެލިކް ޒެނިކާގެ ޔޫތު ޓީމަށް ކުޅޭ ޒިޒްމިޗް ބުންޏެވެ.
ކުރިން ފަހަރުތަކާ ހިލާފަށް އިޓަލީން މި ފަހަރުގެ ފީފާ ވޯލްޑް ކަޕްގެ ޔޫރަޕްގެ ޕްލޭއޮފް ފުރަތަމަ މެޗުން ވަނީ މޮޅުވެފަ އެވެ. އަމިއްލަ ދަނޑުގައި ނޮދަން އަަޔަލެންޑް 2-0 އިން ބަލިކޮށް، ރޭ ޕްލޭއޮފް ފައިނަލުގައި ބޮސްނިއާ ދަނޑަށް ނުކުމެ، ފުރަތަމަ ލީޑުނެގީ 15 ވަނަ މިނިޓްގައި އިޓަލީންނެވެ. މިއީ މޮއިސް ކީން ޖެހި ގޯލަކުން އިޓަލީ އަށް ލިބުނު ލީޑެކެވެ. އޭނާ އަކީ ޖެހިޖެހިގެން ހަ މެޗުގައި އިޓަލީ އަށް ލަނޑު ޖަަހައިގެން ފުރަތަަމަ ކުޅުންތެރިޔާ އެވެ.
އިޓަލީ އަށް މި މެޗުގައި މައްސަލަ ދިމާވީ 41 ވަނަ މިނިޓްގައި އަލެސަންޑްރޯ ބަސްޓޯނީ އަށް ރަތެއް ދައްކައި، މެޗުގެ ބާކީބައިގައި ކުޅުންތެރިއަކު މަދުކޮށް ކުޅެން ޖެހުމެވެ. އިޓަލީގެ ކުޅުންތެރިއަކު މަދުވުމާ އެކު، ބޮސްނިއާ އިން އޭގެ ފަައިދާނަގައި، އެޓޭކްވަރުގަދަކޮށް އެއްވަރުކުރަން ކުރި މަސައްކަތް ކާމިޔާބުކުރީ 79 ވަނަ މިނިޓްގައި ހަރިސް ޓަބާކޮވިޗް ރީބައުންސަކުން ޖެހި ގޯލަކުންނެވެ.
ދެ ވަނަ ހާފުގައި އިޓަލީ އަށް ލީޑުފުޅާކޮށްދޭން ކީން އަށް ލިބުނު ރަނުގެ ފުރުސަތުގައި ފޮނުވާލި ބޯޅަ ދިޔައީ ހުރަސްދަނޑިމަތިންނެވެ. ނަތީޖާ ނެރެން ޕެނަލްޓީ އަށް ދިޔައިރު، އިޓަލީން ޖެހި ތިން ޕެނަލްޓީގެ ތެރެއިން ޕިއޯ އެސްޕޮސީޓޯ އާއި ބްރަޔަން ކްރިސްޓަންޓޭ އަށް ކާމިޔާބެއްނުކުރެވުނެވެ. އެ ޓީމުން ޕެނަލްޓީ ވައްދާލީ ސަންޑްޓްރޯ ޓޮނާލީ އެވެ. އަނެއްކޮޅުން ބޮސްނިއާ އިން ހަތަރު ޕެނަލްޓީ ވެސް ކާމިޔާބުކޮށް އެ ގައުމުގެ ތާރީހުގައި ދެ ވަނަ ފަހަރަށް ވޯލްޑް ކަޕުން ޖާގަ ހޯދީ އެވެ. ބޮސްނިއާ އިން ކުރިން ވޯލްޑް ކަޕް ކުުޅުނީ 2014 ގަ އެވެ. އެއީ، އެންމެ ފަހުން އިޓަލީން ވެސް ވޯލްޑް ކަަޕްގައި ކުޅުނު ފަހަރެވެ.
