ލަންޑަން (އޭޕްރީލް 21) - އިނގިރޭސި ޕްރިމިއާ ލީގުގައި ރޭ ކުޅުނު މެޗުން ވެސްޓް ހޭމް ޔުނައިޓެޑާއި ކްރިސްޓަލް ޕެލަސް ލަނޑެއް ނުޖެހި 0-0 އިން އެއްވަރުވުމުން، ލީގުގެ ފުލުގައި އޮތް ވުލްވްސް، ދެ ވަނަ ޑިވިޝަނަށް ރެލިގޭޓްވެއްޖެ އެެވެ.
ބާކީ ފަސް މެޗު އޮއްވައި، ވުލްވްސް ރެލިގޭޓްވިއިރު، އެ ޓީމަށް 33 މެޗުން ލިބިފައިވަނީ 17 ޕޮއިންޓެވެ. ލީގުގެ 19 ވަނައިގައި އޮތް ބާންލީ އަށް 33 މެޗުން 20 ޕޮއިންޓް ލިބިފައިވާއިރު، އެ ޓީމަށް ވެސް ރެލިގޭޝަނުން ސަލާމަތްވުމަށް އޮތީ ހަނި ފުރުސަތެކެވެ. ލީގުގެ 18 ވަނައިގައި އޮތް ޓޮޓެންހަަމް ހޮޓްސްޕާސް އަށް 33 މެޗުން 31 ޕޮއިންޓް ލިބިފައިވާއިރު، ރޭ ލިބުނު ޕޮއިންޓާ އެކު، ވެސްޓް ހޭމް ވަނީ 33 މެޗުން 33 ޕޮއިންޓް ހޯދައިފަ އެވެ.
ވުލްވްސް އިން އަންނަ ސީޒަނުގެ އިނގިރޭސި ދެ ވަނަ ޑިވިޝަން، ޗެމްޕިއަންޝިޕްގައި ކުޅެން ޖެހޭނެކަން ޔަގީންވެފައިވާއިރު، އެ ޓީމުން އެ ޑިވިޝަނުގައި ކުޅެން މި ޖެހުނީ 2018 ވަނަ އަހަރުގެ ފަހުން ފުރަތަމަ ފަހަރެވެ. މި ސީޒަނުގައި ދަށްކޮށް ފެށި ވުލްވްސް އަށް ކުޑަ ވެސް ތަަފާތެއް އައީ ކޯޗުކަމާ ރޮބް އެޑްވާޑްސް ހަވާލުވި ފަހުންނެވެ. އެ ޓީމުން ލީގުގައި މޮޅުވި ތިން މެޗަކީ ވެސް އެޑްވާޑް އައި ފަހުން ކުޅުނު މެޗުތަކެކެވެ.
ރެލިގޭޝަނުން ސަލާމަތްވާން މަސައްކަަތް ކުރަމުން އަންނަ ނޮޓިންހަމް ފޮރެސްޓާއި ލީޑްސް ޔުނައިޓެޑުން މި ހަފްތާގައި ކުޅުނު މެޗުތަކުން ވަނީ މޮޅުވެފަ އެވެ. ލީޑްސް އަށް 33 މެޗުން 39 ޕޮއިންޓް ލިބިފައިވާއިރު، ފޮރެސްޓުން ވަނީ 33 މެޗުން 36 ޕޮއިންޓް ހޯދައިފަ އެވެ.
ޕެލަސްގެ ސެލްހަސްޓް ޕާކުގައި ރޭ ކުޅުނު މެޗުގައި ވެސްޓް ހޭމަށް ލަނޑެއް ޖަހައިދޭން އެންމެ ރަނގަޅު ހަމަލާއެއް ފޮނުވާލީ ފަހަކަށް އައިސް ރަނގަޅު ފޯމެއްގައި ހުރި ގްރީސްގެ ޑިފެންޑަރު، ކޮންސްޓަންޓީނޯސް މަވްރަޕާނޯސް އެވެ. އޭނާ ފޮނުވާލި ބޯޅަ ޕެލަސްގެ ކީޕަރު، ޑީން ހެންޑަަސަން މަތަކުރި އެވެ. ވެސްޓް ހޭމްގެ ފޯވާޑް، ޓަޓީ ކަސްޓެޔާނޯސް، އޯވަހެޑް ކިކަކުން ފޮނުވާލި ބޯޅައެއް ޕެލަސްގެ ޑިފެންޑަރު، މެކްސެންސް ލަކްރޯއާ އެވެ.
ޕެލަސް އިން އެންމެ ރަަނގަޅު ފުރުސަތެއް ލިބިގެންދިޔައީ، ޖެނުއަރީ ޓްރާންސްފާގައި ޓޮޓެންހަމް ހޮޓްސްޕާސް ދޫކޮށް ޕެލަސްއާ ގުޅުނު ބްރެނަން ޖޯންސަން އަށެވެ. އޭނާ އަށް ގޯލަށް ބޯޅަ ފޮނުވާނުލެވުނެވެ. ޕެލަސްގެ އިސްމާއިލާ ސާ ވަނީ ލަނޑެއް ޖަހައިފަ އެވެ. އެކަމަކު، އެ ގޯލު ބަލައިނުގަތެވެ، ސަބަބަކީ، ސާ ލަނޑު ޖެހުމުގެ ކުރިން، އެ އެޓޭކަށް ފުރުސަތު ތަނަވަސްކޮށްދިންއިރު، ޕެލަސްގެ ފޯވާޑް، ޖިއަން ފިލީޕް މަޓޭޓާ އަތުގައި ބޯޅަ ޖެހުމުންނެވެ.
