ލަންޑަން (އޭޕްރީލް 23) - އިނގިރޭސި ޕްރިމިއާ ލީގުގައި ރޭ 1-0 އިން ބާންލީ ބަލިކޮށް މެންޗެސްޓާ ސިޓީން ލީގުގެ އެއް ވަނަ އަށް ވަނީ ޖެހިލައިފައި.
އާސެނަލަށް އެއް ވަނަ އެ ގެއްލުނީ 200 ދުވަސް އެ މަގާމުގައި އޮތުމަށް ފަހު އެވެ. އާސެނަލާއި ސިޓީ، ކޮންމެ ޓީމެއް 33 މެޗު ކުޅެފައިވާއިރު، ދެ ޓީމަށް ވެސް ވަނީ. 70 ޕޮއިންޓް ލިބިފަ އެވެ. ދެ ޓީމު ވެސް ފައިދާ ގޯލު، 37 ލަނޑާ އެކު އެއްވަރުވެފައިވާއިރު، ސިޓީ އަށް ކުރި ލިބެނީ ޖެހި ގޯލުންނެވެ. ޖެހި ގޯލަށް ބަލާއިރު ސިޓީގެ ތިން ގޯލު އިތުރެވެ.
ރޭގެ ނަތީޖާއާ އެކު، 19 ވަަނައިގައި އޮތް ބާންލީ ވަނީ ރެލިގޭޓްވެފަ އެވެ. ބާކީ ހަތަރު މެޗު އޮއްވައި ބާންލީ ރެލިގޭޓްވިއިރު، އެ ޓީމަކީ މި ސީޒަނުގައި ރެލިގޭޓްވި ދެ ވަނަ ޓީމެވެ. ލީގުގެ އެންމެ ފުލުގައި އޮތް ވުލްވްސް ވެސް ވަނީ ރެލިގޭޓްވެފަ އެވެ. ބާންލީ ދެ ވަނަ ޑިވިޝަނަށް ރެލިގޭޓް މި ވީ ތިން އަހަރު ތެރޭ ދެ ވަނަ ފަހަރަށެވެ. އެ ޓީމަށް 34 މެޗުން ލިބިފައިވަނީ 20 ޕޮއިންޓެވެ.
ބާންލީގެ ދަނޑު ޓާފް މޯގައި ރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު ފަސް ވަނަ މިނިޓްގައި ޖެހީ އާލިން ބްރައުޓް ހާލަންޑް އެވެ. ސިޓީގެ ޖެރެމީ ޑޯކޫ ދިން ބޯޅައެއް ހިފައިގެން ގޮސް، ހާލަންޑް ވަނީ ބާންލީގެ ކީޕަރު، މާޓިން ޑުބްރާވްކާ ގައި މަތިން ގޯލުގެ ދުރު ކަނަށް ބޯޅަ އަމާޒުކޮށްލައިފަ އެވެ. މި މެޗުގައި ސިޓީން ފޮނުވާލި ގިނަ ހަމަލާތަކެއް ޑުބްރާވްކާ ވަނީ މަތަކޮށްފަ އެވެ. އެ ގޮތުން، ފުރަތަމަ ހާފުގައި ޗާކީ ފޮނުވާލި ރަނގަޅު ހަމަލާއެއް ހިމެނެ އެވެ.
ކައުންޓަ އެޓޭކުގައި ބާންލީން ވެސް ނުރައްކާތެރި ހަމަލާތަކެއް ފޮނުވާލެވޭތޯ މަސައްކަތް ކުރަމުން ދިޔައިރު، ސިޓީގެ ގޯލުގައި ހުރި އިޓަލީގެ ޖިއަންލުއީޖީ ޑޮނަރުންމާ ވަނީ އެ ހަމަލާތައް މަތަކޮށްފަ އެވެ. ދެ ވަނަ ހާފުގައި ސިޓީގެ އަންޓުއާން ސެމެންޔޯ އާއި ބެނާޑޯ ސިލްވާ އަދި ނިކޯ އޯރައިލީ އަށް ވެސް ރަނގަޅު ފުރުސަތުތަކެއް ލިބި ބޭނުންނުކުރެވިދިޔައިރު، ނިކޯ ގޮންޒާލޭޒް ފޮނުވާލި ޝޮޓް ދިޔައީ ދަނޑިކައިރިން ބޭރުންނެވެ.
އިނގިރޭސި ޕްރިމިއާ ލީގުގައި ރޭ ބޯންމައުތުން ވަނީ އަމިއްލަ ދަނޑުގައި ފަހު ވަގުތު ލީޑްސް ޔުނައިޓެޑާ 2-2 އިން އެއްވަރުވެފަ އެވެ. ބޯންމައުތުން ދެ ފަހަރެއްގެ މަތިން ލީޑުނެގި މި މެޗުގައި ލީޑްސް އިން އެއްވަރުކުރީ ފަހު ވަގުތުގަ އެވެ. މި ނަތީޖާއާ އެކު ބޯންމައުތުން ބަލިނުވެ ދަމަހައްޓަމުން އަންނަ ރެކޯޑް 14 މެޗަށް އިތުރުކުރިިއިރު، އަންނަ ސީޒަނުގައި ޔޫރަޕްގެ މުބާރާތަކަށް ކޮލިފައިވުމުގެ ފުރުސަތު ވަނީ ބޮޑުކޮށްފަ އެވެ. ބޯންމައުތު ލީގުގެ ހަތް ވަނައިގައި އޮތީ 34 މެޗުން 49 ޕޮއިންޓް ހޯދައިގެންނެވެ.
ލީޑްސް އިން ރޭ ހޯދި ޕޮއިންޓާ އެކު، ރެލިގޭޝަނުން ސަލާމަތްވުމަށް ކުރާ މަސައްކަތަށް ވަނީ އުންމީދު ބޮޑުވެފަ އެެވެ. އެ ޓީމުން މި ވަނީ 34 މެޗުން 40 ޕޮއިންޓް ހޯދައިފަ އެވެ.
