ލަންޑަން (އޭޕްރީލް 23) - ހުސްވެފައިވާ ޗެލްސީގެ ކޯޗުގެ މަގާމާ އެ ޓީމަށް ކުރިން ކުޅުނު މިޑްފީލްޑަރު އަދި އިޓަލީގެ ކްލަބް ކޯމޯގެ ކޯޗު ސެސްކް ފަބްރެގަސް ހަވާލުވުމަކީ ރަނގަޅު ވިސްނުމަކަށް ނުވާނެ ކަމަށް ޗެލްސީ އާއި އާސެނަލްގެ ކުރީގެ މިޑްފީލްޑަރު، އެމަނުއަލް ޕެޓިޓް ބުނެފި އެވެ.
ފަސް އަހަރާއި ބައިގެ ކޮންޓްރެކްޓެއްގެ ދަށުން ޗެލްސީގެ ކޯޗަކަށް ގެނައި، ލިއަމް ރޮސެނިއާ، ތިން މަސް ދުވަހަށް ފަހު މަގާމުން ވަކިކުރީ އިންތިހާ އަށް ޓީމުގެ ރެކޯޑް ދަށްވުމުންނެވެ. ރޮސެނިއާ އަށް ޗެލްސީގެ ކޯޗަކަށް ހުރެވުނީ 104 ދުވަހު އެވެ. ޗެލްސީއާ ހަވާލުވެ، ރޮސެނިއާގެ ކޯޗުކަމުގައި އެ ޓީމު ކުޅުނު 23 މެޗުގެ ތެރެއިން މޮޅުވީ 11 މެޗުންނެވެ. ލީގުގައި ޖެހިޖެހިގެން ފަސް ވަނަ މެޗުގައި ލަނޑެއް ނުޖެހި ބަލިވުމާ އެކު، ޗެލްސީ އަށް ވަނީ 114 އަހަރު ތެރޭ ދަށް ރެކޯޑަކާ ކުރިމަތިލާން ޖެހިފަ އެވެ. ޗެލްސީން ލީގުގައި އެންމެ ފަހުން ޖެހިޖެހިގެން ފަސް މެޗުން ލަނޑެއް ނުޖެހި ބަލިވީ 1912 ވަނަ އަހަރު އެވެ.
ފަސް އަހަރަށް ގެނައި ރޮސެނިއާ ތިން މަހުން ޗެލްސީ ކޯޗުކަމުން ވަކިކޮށްފި
ފަސް އަހަރާއި ބައިގެ ކޮންޓްރެކްޓެއްގެ ދަށުން ޗެލްސީގެ ކޯޗަކަށް ގެނައި، ލިއަމް ރޮސެނިއާ، ތިން މަސް ދުވަހަށް ފަހު މަގާމުން ވަނީ ވަކިކޮށްފައި. ރޮސެނިއާ އަށް ޗެލްސީގެ ކޯޗަކަށް ހުރެވުނީ 104 ދުވަހު. އެންމެ ފަހުން ލީގުގައި ޗެލްސީ ކުޅުނު ފަސް މެޗުން ވެސް ވަނީ ބަލިވެފައި.
ރޮސެނިއާ އަށް 28 މިލިއަން ޑޮލަރުގެ މާލީ ބަދަލެއް ދިނުމަށް ފަހު، މި ސީޒަނުގެ ނިޔަލަށް ޗެލްސީގެ ކޯޗަކަށް ހަމަޖެއްސީ ޔޫތު ޓީމުގެ ކޯޗު، ކަލުމް މެކްފާލޭން އެވެ. ޗެލްސީން އާ ކޯޗެއް ހޯދަނީ އަންނަ ސީޒަނަށެވެ. އެ ޓީމުން ރެއާލް މެޑްރިޑްގެ ކުރީގެ ކޯޗު ޒަބީ އަލޮންސޯ، ބޯންމައުތު ދޫކޮށްލަން ނިންމާފައިވާ އަންޑޯނީ އިރައޯލާ އަދި ފުލަމްގެ ކޯޗު މާކޯސް ސިލްވާ އަށް އަންނަނީ ފާރަލަމުންނެވެ. އަދި، އެންމެ ފަހުން އެ ލިސްޓަށް އިތުރުވީ، ކޯމޯގެ ކޯޗު ފަބްރެގަސް އާއި ބެންފީކާއާ ހަވާލުވެހުރި، ކުރިން ދެ ފަހަރެއްގެ މަތިން ޗެލްސީއާ ހަވާލުވި ކޯޗު، ހޯސޭ މޮރީނިއޯ އެވެ.
ބާސެލޯނާ އާއި މޮނާކޯ އަށް ވެސް ކުޅެފައިވާ ޕެޓިޓް ބުނީ، ޗެލްސީ މި ވަގުތު އޮތީ ބޮޑު މައްސަލަ ގަނޑެއްގެ ތެރޭގައި ކަމަށާއި ފަބްރެގަސްގެ ކޯޗިން ކެރިއަރުގައި އެ ވަރުގެ ރިސްކެއް ނެގުމަކީ ރަނގަޅު ގޮތެއް ނޫން ކަމަށެވެ. އަދި، ފަބްރެގަސް އަށް އެންމެ ރަނގަޅު ގޮތަކީ، ބާސެލޯނާ ކަހަލަ ކްލަބަށް ދިއުން ކަމަށާއި ބޮޑު ކްލަބެއްގެ ބެންޗުން ފުރަތަމަ ތަޖުރިބާ ކުރަން ޖެހޭނީ ބޭނުންވާ ފުޓްބޯޅަ ކުޅެވޭނެ ސަގާފަތެއް އޮތް ކްލަބަކުން ކަން ޕެޓިޓް ވަނީ ފާހަގަކޮށްފަ އެވެ.
"އެހެންވީމަ، ޗެލްސީ އަށް ވުރެން ފަބްރެގަސް އަށް ރަނގަޅުވާނީ ބާސެލޯނާ،" ފްރާންސް ގައުމީ ޓީމަށް 1998 ވަނަ އަހަރުގެ ވޯލްޑް ކަޕް ކާމިޔާބުކޮށްދިން ޓީމަށް ކުޅުނު ޕެޓިޓް ބުންޏެވެ.
މީގެ 14 ވަރަކަށް މަސް ކުރިން، ކޯމޯގެ ކޯޗުކަން ފަބްރެގަސް، 38، އަށް ދިނީ ހަތަރު އަހަރުގެ ކޮންޓްރެކްޓެއްގަ އެވެ. ކޯމޯ އިން 21 އަހަރަށް ފަހު، އިޓަލީގެ ފުރަތަމަ ޑިވިޝަނަށް ޕްރޮމޯޓްވެ، ފަބްރެގަސްގެ ކޯޗުކަމުގައި ރަނގަޅު ކާމިޔާބީތަކެއް ހޯދި އެވެ. ފަބްރެގަސްގެ ކޯޗުކަމުގައި، ކޯމޯ އިން އިޓާލިއަން ލީގުގެ 10 ވަނައިގައި މި ނިމުނު ސީޒަން ނިންމިއިރު، ޗެމްޕިއަންކަން ހޯދި، ނަޕޯލީ ވެސް ބަލިކޮށްފައިވެ އެވެ.
ފަބްރެގަސް އަށް މީގެ ކުރިން އިންޓަ މިލާނާއި ރެއާލް މެޑްރިޑްގެ ހުށަހެޅުމެއް ވެސް ލިބިފައިވެ އެވެ.
