ނިމިދިޔަ ލޯކަލް ކައުންސިލްތަކުގެ އިންތިހާބާ ދިމާކޮށް ހދ. ކުޅުދުއްފުށީގައި ބިންގާ އެޅި 2000 ހައުސިން ޔުނިޓުގެ މަސައްކަތް ކުރިއަށްނުދާތީ އެ ޕްރޮޖެކްޓު "މަރުވީ" ކަމަށް ބަލައި "ވަޅުލައިފި" އެވެ.
ކުޅުދުއްފުށީ 2000 ހައުސިން ޔުނިޓުގެ މަސައްކަތް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާ ހަވާލު ކުރީ އޯގަސްޓު، 2025، ގަ އެވެ. އޭގެ ފަހުން އިންޑިއާގެ ކުންފުންޏަކާ ހަވާލުކޮށްގެން އެ ޕްރޮޖެކްޓުގެ ބިންގާ އެޅީ އިންތިހާބު ބޯމަތިވެފައި އޮއްވާ އޭޕްރީލް 1، ގަ އެވެ.
ސިޔާސީ ކަންކަމަށް މަލާމާތުން ރައްދު ދިނުމަށް މަޝްހޫރު ކުޅުދުއްފުށީ ރައްޔިތުން ފަތިހު ހޭލިއިރު، ޕްރޮޖެކްޓުގެ ބިންގާ އެޅި ސަރަހައްދުގައި ވަނީ މަހާނައަކާއި ޒިޔާރަތެއް ހަދައިފަ އެވެ.
"ސަރުކާރަކުން ނޫޅޭ ޕްރޮޖެކްޓު ހިންގާކަށް. ހިންގޭނެހާ ގާބިލުކަމެއް ވެސް ނެތް. ހަމަ ވޯޓު ހޯދަން ރައްޔިތުންނަށް ދެއްކި ދަޅައެއް މިއީ. މިއީ ބޮޑު ދޮގެއް،" މި ނޫހާ ކުޅުދުއްފުށިން ވާހަކަ ދެއްކި މީހަކު ބުންޏެވެ.
ކުޅުދުއްފުށީގައި 2000 ހައުސިން ޔުނިޓު އެޅުމަކީ ރައީސް މުހައްމަދު މުއިއްޒުގެ ރިޔާސީ ވައުދެކެވެ. ފަހުން ވެރިކަމަށް ވަޑައިގެން ރައްޔިތުންގެ މަޖިލީހުގެ އިންތިހާބާ ދިމާކޮށް އެ ރަށަށް ވަޑައިގެން ވެސް މުއިއްޒު އެ ވާހަކަ ދެއްކެވި އެވެ.
"އެހެންވީމާ، މި ސިޓީގެ ތަރައްގީއަށް އަޅުގަނޑުމެން ކޮންމެ ގޮތެއް ވިޔަސް ވަރަށް އިސްކަންދޭނެ. ވަރަށް އިސްކަންދޭނަން. ކެމްޕެއިންގައި އަޅުގަނޑު ވައުދުވީ 2000 ހައުސިންގ ޔުނިޓް އެޅުމަށް. ބަޖެޓުގައި އެކަން ހިމެނިފައި އެ އޮތީ،" ފެބްރުއަރީ، 2024، ގައި މުއިއްޒު ވިދާޅުވި އެވެ.
އެ ޕްރޮކެޖްޓު 2024 ވަނަ އަހަރުގެ ތެރޭގައި ފަށްޓަވާނެ ކަމަށް ވެސް މުއިއްޒު ވިދާޅުވި އެވެ.
"ސޮއިކުރެވިފައި އަދި ނުފެށި އޮތް މަޝްރޫއެއް އެބައޮތް. މި ދެ މަޝްރޫއު ނުލައި، 2000 ހައުސިންގ ޔުނިޓުގެ ވާހަކަ އަޅުގަނޑު ދެންނެވީ. ދެންމެ މޭޔަރު އެ ފާހަގަކުރެއްވީ އެ ދެ މަޝްރޫއު. އެހެންވީމާ، އެ ދެ މަޝްރޫއުގެ ކަންތަކާ އެކީގައި އަދި އިތުރު 2000 ހައުސިން ޔުނިޓުގެ މަސައްކަތް، މި އަހަރުގެ ތެރޭގައި ކުރިއަށް ގެންދިޔުން އަޅުގަނޑުމެންގެ ވިސްނުމަކީ،" އެމަނިކުފާނު ވިދާޅުވި އެވެ.
އޭގެ ފަހުން އެ ޕްރޮޖެކްޓުގެ މަސައްކަތް ކުރިއަށްގެންދަން އެޗްޑީސީއާއެކު ސޮއި ކުރީ މުއިއްޒު ކުޅުފުއްފުއްޓަށް ކުރެއްވި ދަތުރެއްގެ ތެރެއިން އޯގަސްޓު، 2025، ގަ އެވެ. އެ ދުވަހު ވެސް މުއިއްޒު ވިދާޅުވި 2025 ވަނަ އަހަރު ނިމުމުގެ ކުރިން އެ ޕްރޮޖެކްޓުގެ މަސައްކަތް ފަށްޓަވާނެ ކަމަށެވެ.
"އެހެންވީމާ، މިހާރު ފިނޭންސް މިނިސްޓްރީން އެކަމަށްޓަކައި މަގުތަކެއް ފަހިކޮށް، އިރާދަކުރެއްވިއްޔާ، މި އަހަރުގެ ތެރޭގައި، މި އަހަރު ނިމުމުގެ ކުރީގައި، ޑިސެމްބަރު މަހުގެ ތެރޭގައި އެންމެ ލަސްވެގެން ވެސް މި މަޝްރޫއުގެ އަމަލީ މަސައްކަތް މި ސިޓީގައި ފަށައިދޭނަން،" ރައީސް ވިދާޅުވި އެވެ.
އެޗްޑީސީއަށް އެ މަސައްކަތް ކުރިއަށް ނުގެންދެވިގެން އެ މަސައްކަތް ފަހުން ހަވާލު ކުރީ އިންޑިއާގެ ޓީމް ވަން އިންޑިއާ ޕްރައިވެޓް ލިމިޓެޑް ކިޔާ ކުންފުންޏަކާ އެވެ. އޭގެ ފަހުން މަޝްރޫއުގެ ބިންގާ އެޅީ އޭޕްރީލް 1، 2026، ގަ އެވެ.
ނަމަވެސް މިހާތަނަށް ވެސް އެ މަޝްރޫއުގެ އެއްވެސް އަމަލީ މަސައްކަތެއް ކުރިއަކަށް ނުދެ އެވެ.
